އަންނަ ރިޔާސީ އިންތިޚާބުގައި ހުރިހާ ދިވެހިން ވެސް ނުކުމެވަޑައިގެން ބޯކޮށް ވޯޓް އަޅައިފިނަމަ މި ސަރުކާރު ބަލިކުރެވޭނެ ކަމަށް އެމްޑީޕީގެ ލީގަލް ޑައިރެކްޓަރު ހިސާން ހުސެއިން ވިދާޅުވެއްޖެއެވެ.
ތުޅާދޫގައި ގުޅިފައިވާ ޕާޓީތަކުން ހޮނިހިރު ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ހިސާން ވިދާޅުވީ، ދިވެހި ރާއްޖެ އަނބުރާ ދިވެހިންނަށް ހޯދައި ދިނުމަށް މި އަނިޔާވެރިކަމުން ދިވެހިން ސަލާމަތްކޮށް ކަސްތޮޅު އަޅާފައި އޮތް އޮތުން ނިމުމަކަށް ގެންނަން ޖެހޭ ކަމަށެވެ.
އަދި ގުޅިފައިވާ ޕާޓީތަކުން ކުރާ ބުރަ މަސައްކަތުން އެ މިނިވަންކަން ދިވެހިން އެދޭ ގޮތަށް ހޯދައިދެވޭނެ ކަމަށް ޔަގީންކަން އެބައޮތް ކަމަށް ހިސާން ވިދާޅުވިއެވެ.
އޭނާ ވިދާޅުވިގޮތުގައި ރައީސް ޔާމީން ވެރިކަން ކުރައްވަނީ ދައުލަތެއްގެ ސިފައިގައެއް ނޫނެވެ. އަދި އިންސާފުވެރި ދައުލަތެއް ގާއިމްވެގެން ދިއުމަކީ އެބޭފުޅުން އެންމެ މުހިއްމުކަން ދޭނެ އެއްކަންތައް ކަމަށާއި، ދައުލަތެއްގެ ސިފައިގައި އިންސާފުވެރި މުޖުތަމައުއެއް އެބޭފުޅުންގެ ވެރިކަމެއްގައި ގާއިމްކޮށް ދެއްވާނެ ކަމަށެެވެ.
"ދައުލަތެއް ދައުލަތެއް ސިފައިގައި ހިނގާނީ މުއައްސަސާތައް މިނިވަން ކަމާއިއެކު ހިނގުމުން. އެ ފުރުސަތު ދީގެން ހިންގާވެރިކަމެއް އަޅުގަނޑުމެން ހޯދައިދޭނަން" ހިސާން ވިދާޅުވިއެވެ.
ހިސާން ވިދާޅުވި ފަނޑިޔާރުގޭގައި ތިއެްބެވި ފަނޑިޔާރުންނަށް އިންސާފުވެރިކަމާއި އެކު ހުކުމް ކުރެވި، ވަޒީފާގެ ބިރެއް ނެތި މުވައްފުންނަށް ހަރަކާތްތެރި ވެވޭނެ މާހައުލެއް ދާދި އަވަހަށް ގާއިމްކުރެވިގެން ދާނެކަމަށެވެ.
