އިންތިހާބެއް ބޭއްވުމުގެ ކުރިން އިލެކްޝަން ކޮމިޝަނުން ރައްޔިތުންގެ ތާއީދު ހޯދެއްވުން މުހިންމު ކަމަށް ގުޅިފައިވާ ސިޔާސީ ޕާޓީތަކުގެ ރަނިންގމޭޓް ފައިސަލް ނަސީމް ވިދާޅުވެއްޖެއެވެ.

ހޮނިހިރު ދުވަހު ގުޅިފައިވާ ސިޔާސީ ޕާޓީތަކުން ވޯޓު ރީ ރަޖިސްޓްރީ ކުރުމަށް ދޮރުން ދޮރަށް ހިނގުމުގެ ހަރަކާތް ފައްޓަވައި ދެއްވުމަށް ފަހު ވާހަކަ ދައްކަވަމުން ފައިސަލް ވިދާޅުވީ އިލެކްޝަން ކޮމިޝަންގެ ފަސް މެމްބަރުން ވަކި ފަރާތަކަށް ބުރަވެ ތިބެ އިންތިހާބެއް ބޭއްވުމަކީ ރައްޔިތުން އެދޭކަމެއް ނޫންކަން އެބޭފުޅުންނަން ނޭނގޭ ކަމަށްވާނަމަ އެކަން ހަދާންކޮށްދޭ ކަމަށެވެ. މި ވަގުތު އެންމެ އިސްކަމެއްދީގެން ގުޅިފައިވާ ސިޔާސީ ޕާޓީތަކުން ކުރިއަށް ގެންދާ ހަރަކާތަކީ ވޯޓް ރީ ރަޖިސްޓްރީ ކުރުންކަން ފާހަގަ ކުރައްވަމުން ފައިސަލް ވިދާޅުވީ ހާއްސަ އެހީއަށް ބޭނުންވާ މީހުންގެ ވޯޓުލުމުގެ ޙައްގު އިލެކްޝަން ކޮމިޝަނުން ވަނީ ހިފަހައްޓާފަ ކަމަށެވެ.

"ގައުމެއްގައި އިންތިހާބެއް ބޭއްވޭއިރު، އެ އިންތިހާބަކީ ރައްޔިތުންގެ މެދުގައި ބޭއްވިގެންދާ އިންތިހާބެއް، އެ އިންތިހާބު ބޭއްވުމަށްޓަކައި ވަކި ފަރާތަކަށް ނުޖެހޭ އިލެކްޝަން ކޮމިޝަނެން އޮންނަން ޖެހޭ" ފައިސަލް ވިދާޅުވިއެވެ.

ފައިސަލް ވިދާޅުވީ އަތޮޅުތެރެއަށް ނިސްބަތްވާ ވަރަށް ގިނަ ރައްޔިތުން މާލެ، ހުޅުމާލޭގައި ދިރިއުޅެމުންދާ ކަމަށެވެ. ރީ ރަޖިސްޓްރީ ނުކުރެވިގެން އެންމެ ވޯޓެއް ވެސް ބީވެގެން ގޮސްގެން ނުވާނެކަން ފާހަގަ ކުރައްވަމުން ފައިސަލް ވިދާޅުވީ އޯގަސްޓު 11 ގެ ކުރިން ރީ ރަޖިސްޓްރީ ކުރުމުގެ މަސައްކަތް ނިންމާލަ ދެއްވުމަށް ފައިސަލް އެދިވަޑައިގަންނަވާ ކަމަށެވެ. އަދި މަޖިލީސް މެމްބަރުންނާއި އެކު ދާއިރާތަކުގެ ރީ ރަޖިސްޓްރީ ކުރުމުގެ ހަރަކާތުގައި ބައިވެރިވަޑައިގަންނަވަން ފުރުސަތު ލިބިވަޑައިގެންނެވުމަކީ ލިބިވަޑައިގެންނެވި އުފަލެއް ކަމަށް ފައިސަލް ވިދާޅުވިއެވެ.

"އަޅުގަނޑަށް ތިބޭފުޅުންނާއި އެކު މިކަން ފެށުމުގެ ގޮތުން ބައިވެރިވުމުގެ ފުރުސަތު ލިބުމަކީ އެއީ އަޅުގަނޑަށް އިތުރަށް ލިބިގެންދިޔަ  ހިތްވަރަކާއި އަޒުމެއް ކަމަށް ގަބޫލުކުރާ ހިނދު އެންމެހައި ބޭފުޅުންނަން ޝުކުރު ދަންނަވަން" ފައިސަލް ވިދާޅުވިއެވެ.

މަޖިލީހުގެ މެމްބަރުންގެ ތެރެއިން ގުޅިފައިވާ ޕާޓީތަކުގެ މެމްބަރުން ހޮނިހިރު ދުވަހު ދޮރުން ދޮރަން ވަޑައިގެން އެ މެމްބަރުންގެ ދާއިރާގެ ރައްޔިތުން ރީ ރަޖިސްޓްރީ ކުރުމުގައި ދަނީ ހަރަކާތްތެރިވަމުނެވެ. ރަށްވެހިވެފައިވާ ރަށް ނޫން އެހެން ރަށެއްގައި 23 ސެޕްޓެމްބަރުގައި ވޯޓުލާނަމަ އޯގަސްޓް 11 ގެ ކުރިން ރީ ރަޖިސްޓްރީ ކުރަންޖެހެއެވެ. ގުޅިފައިވާ ސިޔާސީ ޕާޓީތަކުގެ ރަނިންގްމޭޓް ފައިސަލް ވެސް ވަނީ ބައެއް ގެތަކަށް ވަޑައިގެން ރީ ރަޖިސްޓްރީ ކުރުމުގެ ހަރަކާތުގައި ބައިވެރިވެ ވަޑައިގެންފައެވެ.