ވޯޓުލުމުގެ ޙައްގުން ނިގުޅައިގެންފަ ބާއްވާ އިންތިހާބެއް ގަބޫލެއް ނުކުރާނެ: ފައިސަލް
ހާއްސައެހީ އަށް ބޭނުންވާ މީހުންނަށް ވޯޓުލުމުގައި އެހީތެރި ވަނީ އީސީގެ އޮފިޝަލުން
އެމްޑީޕީގެ ކެނޑިޑޭޓު އިބްރާހިމް މުހައްމަދު ސޯލިހުގެ ރަނިންގމޭޓު ފައިސަލް ނަސީމް
ވޯޓުލުމުގެ ޙައްގު ނިގުޅައިގަންނަ ގޮތަށް އިލެކްޝަން ކޮމިޝަނުން އަމަލުތަށް ބަހައްޓައިގެން ބާއްވާ އިންތިހާބެއް ދިވެހި ރައްޔިތުން ގަބޫލުނުކުރައްވާނެ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން ރިޔާސީ އިންތިހާބުގައި ވާދަކުރައްވާ އެމްޑީޕީގެ ކެނޑިޑޭޓު އިބްރާހިމް މުހައްމަދު ސޯލިހުގެ ރަނިންގމޭޓު ފައިސަލް ނަސީމް ވިދާޅުވެއްޖެއެވެ.
ފައިސަލް މިހެން ވިދާޅުވީ ހާއްސައެހީ އަށް ބޭނުންވާ މީހުންނަށް ވޯޓުލުމުގައި އެހީތެރިވަނީ އިލެކްޝަން ކޮމިޝަންގެ އޮފިޝަލުން ކަމަށް ކަނޑައަޅާފައިވާ އޮތް އޮތުމަށް އިޝާރަތް ކުރައްވާ ބުދަ ދުވަހުގެ ރޭ އެމްޑީޕީ ހަރުގޭގައި ގުޅިފައިވާ ސިޔަސީ ޕާޓީތަކުން ބޭއްވި ޖަލްސާގައި ވާހަކަ ދައްކަވަމުންނެވެ. ފައިސަލް ވިދާޅުވި ގޮތުގައި ވޯޓުލުމުގެ ޙައްގު ނިގުޅައިގަންނަން މަސައްކަތްތަކެއް ކުރަމުންދާތަން ފެނުމަކީ ރައްޔިތުން ކަންބޮޑުވާ ކަމެއްކެވެ.
"އަޅުގަނޑުމެންނަން މިއަދު މި ފެންނަނީ އެ ފާރާތްތަކަށް (ހާއްސައެހީއަށް ބޭނުންވާ މީހުން) ގާނޫނު އަސާސީން ކަނޑައަޅާވާ މި ޙައްގު ގެއްލިގެންދާ މަންޒަރު. މީ އެއްވެސް ހާލެއްގައި ގަބޫލުކުރެވޭނެ ކަމެއް ނޫން. މިފަދަ ފާރަތްތައް އިޙްތިޔާރު ކުރާ ފާރާތްތަކަށް، އެ ފަރާތުގެ ވޯޓު ލެވޭނެ ގޮތަށް އެއިންތިޒާމް އޮންނަން ޖެހޭނީ ހަމަޖެހިފަ." ފައިސަލް ވިދާޅުވިއެވެ.
ރަނިންގމޭޓަކަށް ފައިސަލް ކަނޑައެޅުމުން މަރުޙަބާ ދަންނަވަނީ -- ފައިލް ފޮޓޯ: ރާއްޖެ.އެމްވީ
ހާއްސަ އެހީއަށް ބޭނުންވާ މީހާގެ ވޯޓުލުމަށް މީހެއް އިޙްތިޔާރުކުރާނީ އެމީހެއްގެ އާއިލާއިންކަން ފާހަގަކުރައްވާ ފައިސަލް ވިދާޅުވީ އެނޫން ގޮތަކަށް ގާނޫނަކުންވެސް ގަވައިދަކުން ވެސް ނިންމިއަސް އެކަން ގަބޫލުކުރަން އުނދަގޫވެލައްވާނެ ކަމަށެވެ.
"ވަކި ގާނޫނެއް އެކަމަށްޓަކައި ހެދިއަސް، އަޅުގަނޑުމެންނަން ވަރަށް އުނދަގޫ ހަމަގެންނަ ބަދަލަކަށް އެއީ ގާނޫނުއަކޭ ބުނަން އެއީ އުނދަގޫ ކަމެއް، އެހެންކަމުން އިލެކްޝަން ކޮމިޝަންގެ މައްޗަށް އަޅުގަނޑު ގޮވާލަން ބޭނުންވަނީ މި ގޮތަށް، ގާނޫނު އަސާސީއާއި ފުށުއަރާ ރައްޔިތުން ގަބޫލުނުރާ މިނިވަން އިންސާފުވެރި އިންތިހާބެއް އަޅުގަނޑުމެންނަށް ނުބޭއްވޭނެ ގޮތަކަށް ކުރާ އެންމެހާ ކަންތައްތަކުން ދުރައްޖެހި ރައްޔިތުން އެދޭ ގޮތަށް ގާނޫނު އަސާސީގައި ބަޔާންކޮށްފައިވާ ގޮތަށް ދިވެހި ރާއްޖޭގައި ބޭއްވޭ ރިޔާސީ އިންތިހާބު ބޭއްވުމަށް" ފައިސަލް ވިދާޅުވިއެވެ.
ހާއްސައެހީ އަށް ބޭނުންވާ މީހުންނަށް ވޯޓުލުމުގައި އެހީތެރި ވަނީ އީސީގެ އޮފިޝަލުން ކަމަށާއި އެއީ އެހެން ގައުމުތަކުގައި ވެސް އިންތިހާބުތަކުގައި އަމަލުކުރާ ދުނިޔޭގެ އެންމެ ބެސްޓް ޕްރެކްޓިސްގެ ގޮތުގައި ބަލައިގެންފައިވާ ގޮތް ކަމަށް އިލެކްޝަންސް ކޮމިޝަނުން ވަނީ ބުނެފައެވެ. އަދި ހާއްސަ އެހީއަށް ބޭނުންވާ ފަރާތްތަކަށް މިފަދަ ގޮތަކަށް ވޯޓުލުގެ އިންތިޒާމުތައް ހަމަޖައްސާފައި ވަނީ އެއްވެސް އިތުރު މީހެއްގެ ނުފޫޒެއް ނެތި، ކޮންމެ މީހަކަށް ވެސް މިނިވަންކަމާ އެކު ވޯޓުލުމުގެ ފުރުސަތު ދިނުމަށް ކަމަށްްވެސް އެ ކޮމިޝަނުން ބުނެފައިވެއެވެ.
މިކަންކަން ފައިސަލް ސިފަކުރީ މިނިވަން އިންސާފުވެރި އިންތިހާބެއް ނުބޭއްވުމަށް އިލެކްޝަން ކޮމިޝަނުން ކުރައްވާ ކަންތައްތަކެއް ކަމަށެވެ. ފައިސަލް ވަނީ ތަކުރާރުކޮށް މިނިވަން އިންފާސުވެރި އިންތިޙާބެއް ބާއްވަދިނުމަށް ގޮވާލައްވާފައެވެ.
