އިމާދުއްދީން ސުކޫލް އިރު، ދެކުނު ފަރާތު ކަންމަތީގައި ހުރި ޖަންގްޝަން ފުރި، މުޅި ސަރަހައްދަށް ނަޖިސްތައް ލީކްވެއްޖެ އެވެ.
ފުރުޤާން މިސްކިތާއި، އިމާދުއްދީން ސުކޫލާއި، ދެމެދުގައި އޮންނަ ގޯޅިއަށްވާ ގޮތަށް ހުންނަ އެ ޖަންގްޝަން ފުރި، މުޅި ސަރަހައްދަށް ނަޖިސްތައް ލީކްވާއިރު، އިމާދުއްދީން ސުކޫލްގެ ދަރިވަރުންް ނިކުތުމަށް ބޭނުންކުރާ ދޮރާށިތަކާއި ހަމައަށް ނަޖިސްތައް ވަނީ ފެތުރިފަ އެވެ. އަދި މުޅި ސަރަހައްދަށް ވަސް ހުރިއިރު، އެކަމާއި ގުޅިގެން އިމާދުއްދީންގެ ބެލެނިވެރިން ވަނީ ކަންބޮޑުވުން ފާޅުކޮށްފަ އެވެ.
މެންދުރުން ފެށިގެން، ޖަންގްޝަނުން ލީކުންވާ ފެށިއިރު، މުޅި ސަރަހައްދަށް ނަޖިސް ބޭރުވިއިރުވެސް އެކަމަށް ހައްލެއް ގެނެސްފައެއް ނުވެ އެވެ.
ރާއްޖެ.އެމްވީއާއި ވާހަކަ ދެއްކި ބައެއް ބެލެނިވެރިން ބުނީ، ކުދިން ނެރުމަށް ބޭނުންކުރާ ދޮރާށިތަކާއި ހިސާބަށް ނަޖިސް ލީކުވެފައިވާއިރު، މުޅި ސަރަހައްދުގައި ނަޖިސް ވަސް ހުރި ކަމަށެވެ. އަދި ދަރިވަރުންނަށް އެކަމުގެ ސަބަބުން ސިއްހީ މައްސަލަތަކާއި ކުރިމަތިވެވާނެ ކަމަށް ބެލެނިިވެރިން ބުންޏެވެ.
މީގެ ކުރިންވެސް ދޭތެރެ ދޭތެރެއިން މަގުމަތީ ޖަންކްޝަންތައް ފުރި މަގުމައްޗަށް ނަޖިސް ބޭރުވެ އެވެ. އަދި އެކަމުގެ ޝަކުވާތައް އަބަދުވެސް ރައްޔިތުން ކުރާއިރު، އެކަމަށް ހައްލެއް ހޯދައިދެވިފައެއް ނުވެ އެވެ.
