އެމްޑީޕީ އޮފީހުގެ ބިއްލޫރިގަނޑު ތަޅާލައިފި

އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މައި އޮފީހަށް އަނެއްކާވެސް ހަމަލާދީފިއެވެ.

އަންގާރަ ދުވަހުގެރޭ ދަންވަރު އެމްޑީޕީގެ އޮފީހުގެ ދޮރަށް އެއްޗެއް އެއްލައި، ދޮރުގެ ބިއްލޫރިގަނޑުވަނީ ތަޅާލާފައެވެ. ހަމަލާ ދިންތާ ކުޑަ ވަގުތުކޮޅެއް ފަހުން އެތަނަށް ފުލުހުން ގޮސް ހަރަކާތްތެރިވެފައިވެއެވެ.

Advertisement

ސޯސަންމަގުގައި ހުންނަ އެމްޑީޕީގެ އޮފީހަށް ދޭތެރެދޭތެރެއިން މިފަދަ ހަމަލާތައް ދެއެވެ. އެގޮތުން އެއޮފީހުގެ ބިއްލޫރިގަނޑު ތަފާތު އެތައް ފަހަރުމަތިން ތަޅާލާފައިވާއިރު، ކަޅު ތެޔޮވެސް ޖަހާފައިވެއެވެ. އަދި އެމްޑީޕީ އޮފީހުގެ ރިސެޕްޝަނާއި ބޭރު ދޮރުގައި އަލިފާންވެސް ރޯކޮށްފައިވެއެވެ. އެހެންނަމަވެސް މިއިން އެއްވެސް ހާދިސާއެއްގައި ހަމަލާދޭ މީހަކު ހައްޔަރުކޮށްފައެއް ނެތެވެ.

ފުލުހުންގެ ފޮރެންސިކްސް ޓީމެއް އެމްޑީޕީ އޮފީހަށް ވަދެ އަންގާރަ ދުވަހުގެ ރޭ މައްސަލަ ތަހުޤީޤުކުރަން ވަނީ ފަށާފައެވެ.

ފުލުހުން އެމްޑީޕީ އޮފީހުގެ އެތެރޭގައި

އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވިދާޅުވީ ފުލުހުން އެތަނަށް ދިޔަނަމަވެސް އެމްޑީޕީ އޮފީހަށް އަންގާރަ ދުވަހުގެރޭ ދިން ހަމަލާ ފެންނަ ގޮތަށް ހުރި ސީސީޓީވީ ކެމެރާތަކުގެ ތެރެއިން އެމްޑީޕީ އޮފީހުގައި ހުރި ކެމެރާ ފިޔަވައި ދެން އެންމެ ކައިރިންވެސް ކެމެރާއެއް ހުރީ ހެލްތު މިނިސްޓްރީ ހިންގާ ރޯޝަނީ ބިލްޑިންގްގައި ކަމަށާއި، އެ ކެމެރާތަކުގެ ފުޓޭޖް ސަރުކާރުން ދީފާނެކަމާއިމެދު އެތަނަށް ދިޔަ ފުލުހުން ސުވާލު އުފެއްދިކަމަށެވެ. އަދި އެމްޑީޕީ އޮފީހުގެ ކެމެރާ ފުޓޭޖްވެސް ފުލުހުންނާއި ހަވާލުކޮށްފިނަމަ އެއަށް ވާނެ ގޮތް އެތަނަށް ދިޔަ ފުލުހުންނަށް ނޭނގޭކަމަށާއި، ފުޓޭޖްގެ ކޮޕީއެއް ހައްދާފައި ފުލުހުންނާއި ހަވާލުކުރުމަށް އެތަނަށް ދިޔަ ފުލުހުން އެދުނުކަމަށް އަނަސް ވިދާޅުވިއެވެ.

އެމްޑީޕީ އޮފީހަށް ހަމަލާދިނުމާއި ގުޅިގެން ގުޅިފައިވާ އިއްތިޙާދުގައި ހިމެނޭ ޢަދާލަތު ޕާޓީއިން ވަނީ އެކަމާއި ކަންބޮޑުވުން ފާޅުކޮށްފައެވެ. އަންގާރަ ދުވަހުގެ ރޭ ކުރި ޓުވީޓެއްގައި އެޕާޓީއިން ބުނީ ގުޅިފައިވާ އިއްތިޙާދުގައި ހިމެނޭ ޕާޓީތަކަށް މިފަދައިން ދޭ ހަމަލާތަކަކީ މިނިވަން އިންސާފުވެރި އިންތިޚާބަކަށް އެޅޭ ހުރަހެއްކަމަށެވެ.

އެމްޑީޕީ އޮފީހަށް އަންގާރަ ދުވަހުގެރޭ ހަމަލާދިން އިރު، ނިމިގެން ދިޔަ ހަފްތާގައި އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) ކެމްޕޭން ކުރައްވަމުން ގެންދަވަނިކޮށް އެމަނިކުފާނުގެ ހަށިކޮޅަށް ހަމަލާދިނުމަށް ބަޔަކު ވަނީ މަސައްކަތްކޮށްފައެވެ. ނޫސްވެރިންނާއި އާއްމުންގެ އެތައް ބައެއްގެ ކުރިމަތީގައި އެހާދިސާ ހިނގުމުން ފުލުހުން ވަނީ އެކަން ތަހުޤީޤުކުރާކަމަށް ބުނެފައެވެ. އެހެންނަމަވެސް ހޯމް މިނިސްޓަރ އަޒްލީން އަހުމަދު ފަހުން ވިދާޅުވީ އެހަމަލާދިނީ ކާކުކަން ސާފުނުވާކަމަށެވެ.