އައްޑޫއަށް އިބޫ ވެވަޑައިގަންނަވާ ވައުދުތައް އިއްވުން ދެން އޮންނަ ދަތުރުފުޅެއްގައި
ހިނގާފައިވާ ކަންކަން ބަލައި، އިންސާފު ހޯދައިދޭނަން: އިބޫ
އިބޫ އައްޑޫ ސިޓީ ހުޅުދޫގައި
ގުޅިފައިވާ ޕާޓީތަކުގެ ވެރިކަމެއްގައި އައްޑޫ ސިޓީއަށް ކޮށްދޭނެ ކަންތައްތައް، އެ ސިޓީއަށް ދެން ވަޑައިގަންނަވާ ދަތުރުފުޅެއްގައި އިއުލާން ކުރައްވާނެ ކަމަށް އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ) ވިދާޅުވެއްޖެވެ.
އައްޑޫ ސިޓީ އާއި ފުވައްމުލަކަށް ކުރައްވަމުން ގެންދަވާ ދަތުރުފުޅުގައި އެ ސިޓީގެ ހުޅުދޫއަށް ވަޑައިގެން، ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން އިބޫ ވިދާޅުވީ ރައީސް އަބްދުﷲ ޔާމީންގެ ސަރުކާރުގައި އައްޑޫއަށް ކުރެއްވި ކަމެއް ފެންނަން ނެތް ކަމަށެވެ.
އިބޫ އާއި ފައިސަލް އައްޑޫގައި
ރާއްޖެއަށް ތަރައްގީ ގެނެވޭނީ އައްޑޫ ސިޓީ ތަރައްގީ ކޮށްގެން ކަމަށް ވިދާޅުވެ، އިބޫ ވިދާޅުވީ ރައީސް ޔާމީން އެ ސިޓީއަށް ވެވަޑައިގެންފައިވާ ވައުދުތައް ފުއްދައިދީފައި ނުވާ ކަމަށެވެ.
ގުޅިފައިވާ ޕާޓީތަކުން އިންތިހާބު ކާމިޔާބު ކުރުމަށްފަހު، ނޮވެމްބަރު މަހު ވެރިކަމާ ހަވާލުވެވަޑައިގަންނަވާނެ ކަމަށާއި އެއަށް ފަހު އައްޑޫ ސިޓީގައި މަޝްރޫތައް ފެށިގެންދާނެ ކަމަށާއި ތަރައްގީ އެނގި ކަށަވަރު ވެގެންދާނެ ކަމަށް، އިބޫ ވިދާޅުވި އެވެ.
"އަޅުގަނޑުމެންގެ ވެރިކަމެއް ނޮވެމްބަރު 11 ވަނަ ދުވަހުގައި ފެށިގެންދާއިރު، އެ މަޝްރޫއުތައް ފެށިގެންދާނެ،" އިބޫ ވިދާޅުވިއެވެ.
އެމަނިކުފާނު ވިދާޅުވީ ގުޅިފައިވާ ޕާޓީތަކުގެ ވެރިކަމެއްގައި އިންސާފު ގާއިމުކޮށް، އިންސާފު ހޯދައި ދެއްވާނެ ކަމަށެވެ. އެގޮތުން ވޭތުވެދިޔަ މުއްދަތުގައި ހިނގާފައިވާ ކަންތައްތައް ބަލައި، އިންސާފު ހޯދައި ދެއްވާނެ ކަމަށް އިބޫ ވިދާޅުވިއެވެ.
އައްޑޫ ސިޓީއާއި ފުވައްމަލަކަށް ފެއްޓެވި ދަތުރުފުޅުގައި އެމަނިކުފާނު ފުވައްމުލަކު ސިޓީއަށް ވަޑައިގަންނަވާނީ ހޮނިހިރު ދުވަހުގެ ހަވީރުއެވެ.
