އެމްފައިސާ މެދުވެރިކޮށް އެމްއެންޔޫގެ ކޯސް ފީ ދެއްކޭނެ ގޮތް ހަމަޖައްސަފި

އުރީދޫގެ އެމްފައިސާ މެދުވެރިކޮށް މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ)ގެ ޓިއުޝަން ފީ ދެއްކޭނެ ގޮތް ހަމަޖައްސަފި އެވެ.

އެމްއެންޔޫގައި ބޭއްވި ރަސްމިއްޔާތުގައި ވަނީ މިކަމުގެ އެއްބަސްވުމުގައި ސޮއި ކޮށްފައެވެ. މިއެއްބަސްވުމުގައި އެމްއެންޔޫގެ ފަރާތުން ސޮއި ކުރެއްވީ ޑެޕިއުޓީ ވައިސް ޗާންސިލަރު މުއާވިޔަތު މުހައްމަދެވެ. އަދި އުރީދޫގެ ފަރާތުން އެ އެއްބަސްވުމުގައި ސޮއިކުރެއްވީ އުރީދޫގެ ސީއީއޯ ނަޖީބް ހާން އެވެ.

މިއެއްބަސްވުމާއި ބެހޭ ގޮތުން އުރީދޫ އިން ބުނީ އެމްއެންޔޫގެ ދަރިވަރުން އެމްފައިސާއަށް ރެޖިސްޓާ ކުރުމުން ވަރަށް ފަސޭހައިން ޓިއުޝަން ފީ ދެއްކޭނެ ކަމަށެވެ. މިހިދުމަތުގެ ސަބަބުން ފީ ދެއްކުމަށް ކިޔުއެއްގައި މަޑުކުރަން ނުޖެހޭނެ ކަމަށާއި، އަގުހުރި އެތައް ވަގުތުތަކެއް ސަލާމަތް ކުރެވޭނެ ކަމަށެވެ.

އުރީދޫ އެމްފައިސާއަށް ކޮންމެ ތަނެއްގައި ހުރެގެން ވެސް ފަސޭހަކަމާއެކު ރެޖިސްޓާ ކުރެވޭނެއެވެ. އުރީދޫން އެމް ފައިސާ ތައާރަފްކޮށްފައިވަނީ 2016 ވަނަ އަހަރުގެ ޖުލައި މަހުގައެވެ.

މި ޚިދުމަތުގެ ދަށުން މޮބައިލްގައި ރަޖިސްޓްރީކުރާ އެކައުންޓް މެދުވެރިކޮށް، މޮބައިލް ފޯނު ބޭނުން ކޮށްގެން ފައިސާ ފޮނުވުމާއި، ޕްރީޕެއިޑް އެކައުންޓް ރީޗާރޖް ކުރުމާއި، ވިޔަފާރި ކުރުމުގެ އިތުރުން ބިލްވެސް ދެއްކޭނެއެވެ.