ޝަޚްސު އޮޅުވާލި ކަމަށް ބުނާ މައްސަލަ: ޝަރީއަތަށް ކިތާބީ ހެކި ހުށަހަޅައިފި، ހުކުމް ކުރުން ހޯމަ ދުވަހު!
27 ކިތާބީ ހެކި ހުށަހެޅި
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމުން
ސަރުކާރު ހިންގާ ޕާޓީ ޕީޕީއެމްގެ ހުއްދަ ހޯއްދެވުމެއް ނެތި، އެ ޕާޓީގެ ލޯގާ އާއި ދިދަ ބޭނުންކޮށްފައިވާ ކަމަށް ބުނެ، ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫންގެ މައްޗަށް ދައުލަތުން އުފުލާފައިވާ ޝަޚްސު އޮޅުވާލުމުގެ ދައުވާއާ ގުޅިގެން ފާރިސްގެ ދިފާއުގައި ކޯޓަށް ހުށަހެޅި ކިތާބީ ހެކިތައް ޝަރީއަތަށް ހުށަހަޅައިފިއެވެ.
ކްރިމިނަލް ކޯޓުގައި ބުރާސްފަތި ދުވަހު ބޭއްވި އަޑުއެހުމަކީ އެ މައްސަލައިގެ ހުލާސާ ބާޔާން އިއްވުމަށް ބޭއްވި އަޑުއެހުމެކެވެ. ނަމަވެސް އަޑުއެހުން ފެށުމާ އެކު ފާރިސްގެ ވަކީލުން ވަނީ އެ މައްސަލައިގައި ފާރިސްގެ ފަރާތުން ދިފާއުގައި ހުށަހެޅި ކިތާބީ ހެކިތައް ޝަރީއަތުގެ މަޖިލީހުގައި ހުށަހެޅުމުގެ ފުރުސަތު ކުރިން ނުލިބޭ ކަމަށާއި އެފުރުސަތު ދެއްވުމަށް އެދޭ ކަމަށް ދަންނަވާފައެވެ.
ފާރިސްގެ ފަރާތުން ކިތާބީ ހެކި ހުށަހެޅުމަށް ދައުލަތުގެ ވަކީލުން އިއުތިރާޒު ނުކުރައްވާ ކަމަށް ވިދާޅުވުން މި މައްސަލަ ބައްލަވާ ގާޒީ އިބްރާހީމް އަލީ ވަނީ ކިތާބީ ހެކި ހުށަހެޅުމަށް ފުރުސަތު ދެއްވާފައެވެ. އަދި ފާރިސްގެ ފަރާތުން ވަނީ މިމައްސަލާގައި 27 ކިތާބީ ހެކި ޝަރީއަތަށް ހުށަހަޅާފައެވެ.
ފާރިސްގެ ފަރާތުން ހުށަހެޅި ކިތާބީ ހެކީގެ ގޮތުގައި ހިމެނެނީ، އެ މައްސަލައިގެ ތަހުގީގުގެ ވީޑިއޯ ރެކޯޑިން އާއި އެ މައްސަލަ ބަލައިދޭން އެދި ޕީޕީއެމް ނާއިބު ލީޑަރުގެ ހައިސިއްޔަތު އަބްދުއްރަހީމް އަބްދުﷲ ފުލުހުންނަށް ފޮނުވާފައިވާ ސިޓީ އާއި ފާރިސް ޕާޓީން ވަކިކުރުމާ ގުޅިގެން ޕީޕީއެމާއި އިލެކްޝަންސް ކޮމިޝަނުން އެކި ފަރާތްތަކަށް ފޮނުވާފައި ހުރި ސިޓީތަކުގެ އިތުރުން ފާރިސް ޕާޓީން ވަކިކުރި ފަހުން ވެސް މަޖިލީހުގައި އޭނާ ޕީޕީއެމް ތަމްސީލުކުރި ކަން އެނގޭނެ ލިޔުންތަކެކެވެ.
މީގެ އިތުރުން، ޕީޕީއެމްގެ ނާއިބު ރައީސްކަމުގެ މަގާމުންނާއި ކައުންސިލްގެ މަގާމުން އަބްދުއްރަހީމް ވަކިކުރައްވާފައިވާ ކަމަށް ޕީޕީއެމް ރައީސް މައުމޫން އަބްދުލްގައްޔޫމް ފޮނުއްވި ސިޓީ އާއި ޕާޓީގެ ރައީސްގެ ހައިސިއްޔަތުން ރައީސް މައުމޫނަށް ލިބިދޭ ބާރުތަކާއި އަބްދުއްރަހީމް މަގާމުން ވަކިކުރެވިދާނެކަން ޕާޓީގެ އަސާސީ ގަވާއިދާއި ހިންގާ ގަވާއިދުން ލިބިދޭކަން ހަމަކުރުމަށް އެ ލިޔެކިޔުންތަކުގެ އިތުރުން، ފާރިސްއަކީ ޕީޕީއެމް މެމްބަރެއްކަން ހާމަކޮށްދޭ ލިޔެކިޔުންތައް ވެސް ހުށަހަޅާފައި ވެއެވެ.
މީގެ އިތުރުން، ޕީޕީއެމްގެ އެއް މުއައްސިސް ކަމަށްވާ ފާރިސް ޕީޕީއެމްގެ ދިދަ އާއި ލޯގޯ ބޭނުން ކުރުމަކީ ކުށެއް ނޫންކަން ހާމަކޮށްދޭ ލިޔެކިޔުންތައް ހިމެނެއެވެ. އަދި އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އަމިއްލަ ގޮތުން ވާދަކުރައްވައި މަޖިލިސް ގޮނޑި ކާމިޔާބު ކުރެއްވި ނައިފަރު ދާއިރާގެ މެމްބަރު އަހުމަދު ޝިޔާމާއި މަހިބަދޫ ދާއިރާގެ މެމްބަރު އަހުމަދު ތޯރިގްގެ ކެމްޕެއިން ފޮޓޯތަކެއް ވެސް ފާރިސްގެ ފަރާތުން ހުށަހެޅިއެވެ.
އަމިއްލަ މެމްބަރުންގެ ގޮތުގައި މަޖިލީހަށް ހޮވިވަޑައިގަތް އެ ދެ މެމްބަރުންގެ އެ ފޮޓޯތައް ފާރިސްގެ ފަރާތުން ހުށަހެޅީ ޕީޕީއެމްގެ ދިދަ އާއި ލޯގޯ ބޭނުންކޮށްގެން އެ މެމްބަރުން އިންތިހާބުގައި ކެމްޕެއިންކޮށް އަދި އެކަމުގެ ޝަކުވާ ޕާޓީއާ ހިއްސާކޮށްފައި ވީ ނަމަވެސް އެ ދެ މެމްބަރުން މައްސަލަ ނުބަލައި، ފާރިސްގެ މައްސަލަ ބެލުމަކީ ގާނޫނުއަސާސީގައި ބުނާ ހަމަހަމަކަމާ ހިލާފު ކަމެއް ކަމަށް ސާބިތު ކުރުމަށެވެ.
ކެނޑިޓޭޓުންގެ ބަހުސްގައި މެމްބަރު ސިޔާމް ދެއްކެވި ވާހަކަތަކެއްގެ ވީޑިއޯ ވެސް ފާރިސްގެ ފަރާތުން ހުށަހެޅިއެވެ.
ތިތާބީ ހެކި ހުށަހެޅުމުން ގާޒީ ވިދާޅުވީ އާދިއްތަ ދުވަހު ހުލާސާ ބަޔާން އިއްވުން އޮންނާނެ ކަމަށެވެ. ނަމަވެސް ދިފާއި ވަކީލުން ވިދާޅުވީ މިއަޑުއެހުމުގައި ސަރީއަތަށް ކިތާބީ ހެކި ހުށަހެޅުމުގެ ފުރުސަތު ދިނުމް ހުށަހެޅި ކަމަށާއި އަދި ކިތާބީ ހެއްކާ ބެހޭ ގޮތުން ވާހަކަ ދައްކަން އިތުރު އަޑުއެހުމެއް ބާއްވައި ދިނުން އެދޭ ކަމަށެވެ. އަދި އާދިއްތަ ދުވަހު ކްރިމިނަލް ކޯޓުގައި ދިފާއީ ވަކީލުން ވަޑައިގަންނަވަންޖެހޭ އެހެން ޝަރީއަތުގެ އަޑުއެހުމެއް ތާވަލް ކޮށްފައިވާތީ އާދިއްތަ ދުވަހު ހުލާސާ ބަޔާން ތައްޔާރު ކުރުމަށް ދަތިތަކެއް އެބަހުރިކަން ފަހަގަކުރެއްވިއެވެ.
މީގެ އިތުރުން، ހުލާސާ ބަޔާން އިއްވުމުގެ ކުރިން ދައުލަތުން ޝަރީއަތަށް ހުށަހެޅި ހެކީންގެ ބަޔާންތައް ހޯދުމަށް ސިޓީއަކުން ކޯޓުގައި އެދިފައިވާނެ ކަމަށާއި މިއަދާ ހަމައަށް ވެސް އެ ބަޔާންތައް ލިބިފައި ނުވާ ކަމަށެވެ. ހުލާސާ ބަޔާން ހުށަހެޅުމުގެ ކުރިން ހެކިންގެ ހެކިބަހާ ގުޅޭ ގޮތުން ވާހަކަ ދެއްކުމަށް އިތުރު ފުރުސަތު ބޭނުންވާ ކަމަށް ވެސް ދިފާއީ ވަކީލުން ވިދާޅުވިއެވެ.
ގާޒީ ވިދާޅުވީ އެބަޔާންތައް ދޫކުރެވިފައި ނުވަނީ އެބަޔާންތަކުގައި ހެކިދިން ފަރާތްތައް ސޮއިކޮށްފައި ނުވާތީ ކަމަށާއި އެހެންކަމުން އެބަޔާންތަކުގައި ސޮއި ކުރުމަށް ފަހު، ހުލާސާ ބަޔާން އިއްވައި އަޑުއެހުމުގެ ކުރިން ފޯރުކޮށްދޭނެ ކަމަށެވެ. އަދި އެކަމާ ގުޅިގެން ދައްކަން ބޭނުންވާ ވާހަކަތައް ހުލާސާ ބަޔާނުގައި ހިމެނިދާނެ ކަމަށް ވެސް ގާޒީ ވިދާޅުވިއެވެ.
ގާޒީ ވިދާޅުވީ ހޯމަ ދުވަހުގެ 13:30 ގައި ހުލާސާ ބަޔާން އިއްވުމަށް ޝަރީއަތުގެ އަޑުއެހުން އޮންނާނެ ކަމަށެވެ. އަދި ހުލާސާ ބަޔާން އިއްވުމަށް އިތުރު ފުރުސަތެއް ނުދެވޭނެ ކަމަށް ވެސް ގާޒީ ވިދާޅުވިއެވެ. އަދި އިތުރު ކަމެއް ސާފުކުރަން ނުޖެހޭ ނަމަ ދެން އޮންނާނީ ހުކުމްކުރުން ކަމަށް ވެސް ގާޒީ ވިދާޅުވިއެވެ.
ޝަހްޝު އޮޅުވާލުމުގެ މި ދައުވާ ފާރިސްގެ މައްޗަށް ސާބިތުވެއްޖެ ނަމަ މަދުވެގެން ހަތަރު މަހާއި 24 ދުވަހުގެ ޖަލު ހުކުމެއް އަންނާނެއެވެ. އެ ހުކުމް އަޔަސް މެމްބަރުކަމުގެ ގޮނޑިއެއް ނުގެއްލޭނެއެވެ. އެކަމަކު ހުކުމުގެ މުއްދަތުގައި މަޖިލީހަށް ހާޒިރެއް ނުވެވޭނެއެވެ.
ޝަހްސު އޮޅުވާލުމުގެ ދައުވާގެ އިތުރުން ގާނޫނާ ހިލާފަށް ސަރުކާރު ވައްޓާލަން އުޅުމުގެ ތުހުމަތުގައި ޓެރަރިޒަމްގެ ދައުވާއަކާއި ރިޝްވަތު ދިނުމުގެ ދައުވާއެއް ވެސް ފާރިސްގެ މައްޗަށް ދައުލަތުން ކުރެއެވެ.
