ވިސާގެ މައްސަލާގައި ގެއްލުންވާނީ ދިވެހި ނިކަމެތި ރައްޔިތުންނަށް: އަމީތު
ރާއްޖޭގެ އިމިގްރޭޝަނުން ބުނަނީ އިންޑިއާ ރައްޔިތުންނަށް ވިސާ ދިނުން ހުއްޓާނުލާ ކަމަށް
މެމްބަރު މުހައްމަދު އަމީތު
ބަދަލު ހިފުމުގެ ގޮތުން އިންޑިއާގެ ރައްޔިތުންނަށް ވިސާ ނުދީ ހިފެހެއްޓުމުން ދަތިކަން އިހުސާސް ކުރަންޖެހޭނީ ދިވެހި ރައްޔިތުންނަށް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެ އެވެ.
އަމީތު މިހެން ވިދާޅުވީ މި ފަހަކަށް އައިސް އިންޑިއާއި ދިވެހިރާއްޖެއާ ދެމެދު އުފެދިފައިވާ ހިތްހަމަ ނުޖެހުންތަކާއި ގުޅިގެން ދެ ގައުމުގެ ރައްޔިތުންނަށް ދިމާވެފައިވާ ވިސާގެ މައްސަލައާ ގުޅިގެންނެވެ.
އަމީތު އެ ޓްވީޓް ކުރައްވާފައިވަނީ ރާއްޖޭގައި މަސައްކަތް ކުރަން އަންނަ އިންޑިއާ ރައްޔިތުންނަށް ވިސާ އާއި ވޯކް ޕާމިޓް އާކުރުމުގައި މައްސަލަތަކެއް ދިމާވަމުންދާތީ އެކަމުގެ ކަންބޮޑުވުންތައް އިންޑިއާގެ ސަރުކާރުން ހާމަކޮށްފައި ވަނިކޮށެވެ.
އިންޑިއާ ރައްޔިތުންނަށް ވިސާގެ މައްސަލަ ދިމާވެފައި ވަނިކޮށް، ދިވެހި ސަރުކާރު ހިންގާ މައިޕާޓީ ޕީޕީއެމް ޕާލަމެންޓްރީ ގްރޫޕްގެ ލީޑަރ އަހުމަދު ނިހާނު ހުސައިން މަނިކު އިންޑިއާގެ ޗެންނާއީއަށް ވަޑައިގަތުމުން އެގައުމަށް އެތެރެވުމުގެ ފުރުސަތު ނުދީ ވަނީ އަނބުރާ ފޮނުވާލައިފަ އެވެ.
ނިހާން ވިދާޅުވީ އިންޑިއާއަށް އެތެރެވުމުގެ ހުއްދަ ނުދީ އޭނާ އަނބުރާ ފޮނުވާލީ އޭނާއަކީ ރާއްޖޭގެ ސަރުކާރަށް ނިސްބަތްވާ ބޭފުޅަކަށްވެފައި އިންޑިއާ އިން ދިވެހި ސަރުކާރާ މެދު ހިތްހަމަނުޖެހޭތީ ކަމަށް ވެދާނެ ކަމަށެވެ. އަދި އެއީ ބުލީ ކުރުމުގެ އަމަލެއްކަމަށް ނިހާނު ވިދާޅުވި އެވެ.
ނިހާނަށް ދިމާވި އެ މައްސަލައާއި ގުޅިގެން ރާއްޖޭގައި ހުންނަ އިންޑިއާގެ ސަފީރު ދިވެހި ސަރުކާރުގެ ފޮރިން މިނިސްޓްރީއަށް ހާޒިރު ކޮށްފައިވެއެވެ. އިންޑިއާ ސަރުކާރުން ބުނެފައިވަނީ އެމައްސަލަ ބަލަމުންދާ ކަމަށެވެ.
އަމީތު ވިދާޅުވީ އިންޑިއާގެ ރައްޔިތުންނަށް ވިސާ ނުދީ ހިފެހެއްޓުމުން އޭގެ ދަތިކަން އިހުސާސް ކުރަންޖެހޭނީ ޒަރޫރީ އެކި ބޭނުންތަކުގައި އިންޑިއާއަށް ދަތުރުކުރާ ދިވެހިންނަށްކަމަށެވެ. އަދި ދިވެހި ސަރުކާރުން މިކަންކުރަނީ "ބަދަލު" ހިފުމެއްގެ ގޮތުން ކަމަށް އަމީތު ސިފަކުރެއްވި އެވެ. އަމީތު ވިދާޅުވީ ޕީޕީއެމްގެ ޕީޖީ ލީޑަރު ނިހާނަށް އިންޑިއާއަށް ނޭރުވުމުން ވަޑައިގަންނަވާނީ ސިންގަޕޫރަށްކަމަށެވެ. އެހެން ނަމަވެސް އާދައިގެ ދިވެހިރައްޔިތު މީހާއަށް ހަދާނީ ކިހިނެތްތޯ އަމީތު ވަނީ ސުވާލުކުރައްވާފައެވެ.
