ނަސްލީ ތަފާތުކުރުމާއި ދެކޮޅަށް ތަމްރީން ދިނުމަށް ސްޓާރބަކްސްގެ އެތައްހާސް ކެފޭއެއް ބަންދުކޮށްފި

މަޝްހޫރު ކޮފީ ޗެއިން ސްޓާރބަކްސްއިން އަމިއްލައަށް އޮޕަރޭޓްކުރާ ކެފޭތަކުގެ ތެރެއިން އެމެރިކާގައި އޮޕަރޭޓްކުރާ 8000 ކެފޭ، އެކުންފުނީގެ ހުރިހާ މުވައްޒަފުންނަށް ނަސްލީ ތަފާތުކުރުންތައް ނައްތާލުމާއި ބެހޭ ގޮތުން ތަމްރީން ދިނުމަށްޓަކައި ބަންދުކޮށް ފިއެވެ.

ސްޓާރބަކްސްއިން މިފިޔަވަޅު އެޅީ އެކުންފުނިން އެމެރިކާގެ ފިލަޑެލްފިއާގައި ހިންގާ ކެފޭއެއްގެ ތެރޭގައި ހިނގި ނަސްލީ ތަފާތުކުރުންތަކެއްގެ ސަބަބުން އެކުންފުންޏާއި ދެކޮޅަށް އެމެރިކާގެ މުޒާހަރާތަކެއްކޮށް، ސްޓާރބަކްސް ކޮފީ ބޮއިކޮޓްކުރުމަށް ގޮވާލާ ކެމްޕޭނެއް މުޅި އެމެރިކާގައި ފެށުމާއިއެކުއެވެ. ފިލަޑެލްފިއާގައި ހުންނަ ސްޓާރބަކްސް ކެފޭއެއްގެ ތެރޭގައި ކަޅު ނަސްލުގެ 2 މީހަކު، އިތުރު މީހަކު އަންނަންދެން އެއްޗަކަށް އޯޑަރނުކޮށް އެތަނުގައި ތިއްބައި، އެމީހުން އެތަނަށް ވަނީ ހުއްދަ ނެތި ކަމަށް ބުނެ ކެފޭގެ މެނޭޖަރ ފުލުހުންނަށް ރިޕޯޓްކުރުމާއިއެކު، ފުލުހުން ވަނީ އައިސް، އެދެމީހުން ހައްޔަރުކޮށްފައެވެ. މީގެ ކުރިންވެސް މިފަދަ އެތައް ކަމެއް ސްޓާރބަކްސްގެ ކެފޭތަކުގައި ހިނގާފައިވާއިރު، އޭޕްރީލް މަހުގެ 12 ވަނަ ދުވަހުގެ ޙާދިސާއާއި ގުޅިގެން އަނެއްކާ ވެސް އެވާހަކަތައް ވެސް ފެންމަތިވިއެވެ.

އަންގާރަ ދުވަހު އެ ކޭފޭ ބަންދުކޮށްފައިވަނިކޮށް އެތަނުގެ ކުރިމަތިން ހުރަސްކުރި ބައެއް މީހުންވަނީ މި ތަމްރީނުތަކުގެ ނަސްލީ ތަފާތުކުރުން ހުއްޓިދާނެތޯ ސުވާލުކޮށްފައެވެ.

ސުވާލުކުރި ބައެއް މީހުންނާއި ހަވާލާދީ އަލްޖަޒީރާގައި ބުނެފައިވަނީ ވަކި ބެންޗް މާކެއް ކަނޑަނާޅައި ނަސްލީ ތަފާތުކުރުމާއި ބެހޭގޮތުން ދެވޭ އެއްދުވަހުގެ ތަމްރީނެއް އެކަނި ނުފުދޭކަމަށެވެ.

ދުނިޔޭގެ 70 ގައުމެއްގައި 25،000 ކޮފީ ޝޮޕް ހިންގަމުން އަންނަ ސްޓާރބަކްސްއިން އެމެރިކާގެ އިތުރުން ދުނިޔޭގެ އެހެން ގައުމުތަކުގައިވެސް މި ތަމްރީނުތައް ހިންގުމަށްވަނީ ވައުދުވެފައެވެ.

"ސްޓަރބަކްސްގެ އެގްޒެކްޓިވް ޗެއަރމަން ހަވަރޑް ޝޫލްޒް ސީއެންއެންގައި ވިދާޅުވީ ނަސްލީ ތަފާތު ކުރުންތައް ހައްލުކުރުމަށް ދަސްކޮށްދިނުމަށް ހަތަރު ގަޑިއިރަށް ހިންގާ ތަމްރީނަކުން ނުފުދޭކަމަށް ގަބޫލުކުރެވޭކަމަށެވެ.

ގިނަ އަދަދެއްގެ ކެފޭތައް ބަންދުކުރުމުން، އެދުވަހު އެކަނިވެސް ސްޓާރބަކްސްއަށް 12 މިލިއަން އެމެރިކާ ޑޮލަރާއި 14 މިލިއަން ޑޮލަރާއި ދެމެދުގެ ގެއްލުން ލިބޭނެކަމަށް އެކުންފުނިން އަންދާޒާކުރެއެވެ.

މުވައްޒަފުންނަށް ހިންގޭ ތަމްރީން ޕްރޮގްރާމަށް ފަހު ކުރިއަށް އޮތްތަނުގައި ސްޓާރބަކްސްގެ ވަޒީފާއަށް ނިކުންނަ ހުރިހާ މުވައްޒަފުންނަށް މިތަމްރީން ދެވޭނެކަމަށް އެކުންފުނިން ބުނެއެވެ.

ނަސްލީ ތަފާތުކުރުން ހުއްޓުވުމާއި ބެހޭ ތަމްރީންތަކަށް މުޤަރަރެއް ތައްޔާރުކޮށްދނުމުގައި މަދަނީ ހައްޤުތަކާއި ބެހޭ އިސް ބައެއް ފަރާތްތަކާއި ރައީސް އޮބާމާގެ ދުވަސްވަރު އެމެރިކާގެ ބަންޑާރަ ނައިބު އެރިކް ހޯލްޑަރ ހިމެނިވަޑައިގަންނަވައެވެ.

މި މުގައްރަރު އަދި އާއްމެއް ނުކުރެއެވެ.

ފިލަޑެލްފިއާގައި ހިނގި ޙާދިސާއަށްފަހު ސްޓާރބަކްސްގެ ޗީފް އެގްޒެކެޓިވް ކެވިން ޖޯންސަން ވިދާޅުވެފައިވަނީ އެއީ ފިލާވަޅު ލިބިގަންނަން ޖެހޭ ދަނޑިވަޅެއްކަމަށެވެ. އަދި އެއީ މިމައުޟޫއަށް ވާހަކަ ދައްކަން ލިބޭ ފުރުސަތެއްގެ ގޮތުގައިވެސް ދެކެން ޖެހޭކަމަށެވެ. ޖޯންސަން ވަނީ ފިލަޑެލްފިއާގެ ކެފޭގެ ތެރެއިން ނަސްލީ ތަފާތުކުރުންތަކާއި ކުރިމަތިލާން ޖެހުނު ދެމީހުންނާއި ބައްދަލުކޮށްފައެވެ.