އަންނަ އީދުގައި ރިލީޒްކުރާ ސަލްމާން ޚާންގެ ރޭސް3 ގެ ޓްރެއިލާއަށް 50 މިލިއަން ވިއުސް ޔޫޓިއުބުން ލިބިއްޖެއެވެ.
މި ޓްރެއިލާގައި ސަލްމާންޚާންގެ މޮޅު އެކްޓިން ފެނިގެންދާއިރު އެ އެކްޓިންއަށް އެތައް ބައެއްގެ ތައުރީފު ދަނީ އޮހެމުންނެވެ.
ބޮބީ ޑިއޯލް އާއި ޖެކްލިން ފެނާންޑޭޒް އާއި ޑެއިޒީ ޝާހު، ސާޒިބް ސަލީމް އަދި އަނިލް ކަޕޫރާއި އެކު ސަލްމާން މި ފިލްމުން ފެނިގެންދާއިރު މި ފިލްމުގައި ސަލްމާން ވަނީ އޭނާ އަމިއްލައަށް ލަވައެއް ލިޔެފައެވެ. އެ ލަވަޔަކީ ލޯބީގެ ލަވައެކެވެ. އެ ލަވައިގެ މިއުޒިކް ހަދާފައި ވަނީ ވިޝާލް މިޝްރާއެވެ. މި ފިލްމުގައި ސަލްމާން އަމިއްލައަށް ހަދާފައިވާ ދެ ލަވައެއް ވަނީ ހިމަނާފައެވެ.
މީގެ އިތުރުން ސަލްމާންގެ ލޯބިވެރިޔާ ކަމަށް ބުނާ ޔޫލިއާ ވަންތުރަގެ ލަވައެއް ވެސް މި ފިލްމުގައި ހިމެނިފައިވާ ކަމަށް އެންމެ ފަހުގެ ޚަބަރުތައް ބުނެއެވެ.
މި ފިލްމުގެ ފުރަތަމަ ބައި ރިލީޒްކޮށްފައި ވަނީ 2008 ވަނަ އަހަރުއެވެ. "ރޭސް 2" ރިލީޒް ކޮށްފައި ވަނީ 2013 ގައެވެ. މި ދެ ފިލްމްގައި ވެސް ސައިފް އަލީ ޚާން ލީޑް ރޯލުން ފެނިގެންދިޔަ އިރު މި ފަހަރުގެ ފިލްމުން އޭނާ ފެނިގެން ނުދާނެއެވެ.
