އުމުރުން 102 އަހަރުގެ އިޓަލީ އަންހެނަކު ކޮރޯނާ ވައިރަސް ބަލިން ގަދަވެއްޖެއެވެ.

އިޓާލިކާ ގްރޮންޑޯނާ ނަމަކަށް ކިޔާ މި އަންހެން މިހާ ބަލިން ގަދަވުމުން، މިއީ ފާއިތުވި ހަފްތާގެ ތެރޭގައި ބަލިން ގަދަވި 100 އަހަރުން މަތީގެ ދެވަނަ މީހާއެވެ.

މި އަންހެން މީހާ ކޮރޯނާވައިރަސް އަށް ފަރުވާ ހޯދުމަށް އިޓަލީގެ އުތުރުގެ ސަރަހައްދެއް ކަމަށްވާ ޖެނޯއާގެ ހޮސްޕިޓަލެއްގައި 20 ދުވަސް ހޭދަ ކުރި ކަމަށް ސީ.އެން.އެން އިން ބުނެފައިވެއެވެ.

މި އަންހެން ބަލިން ގަދަވުމުން އޭނާ އަށް ފަރުވާ ދިން ޑޮކްޓަރަކު ބުނީ، މިއީ މިބަލީގައި އުޅެމުންދާ އިޓަލީގެ އެތައް ހާސް މީހުންނަށް ލިބުނު އުއްމީދެއް ކަމަށެވެ.

ހޮސްޕިޓަލުން ބުނީ، މި އަންހެން މީހާ އެޑްމިޓް ކުރީ ހިތުގެ ބަލީގައި ކަމަށާއި، އެޑްމިޓް ކުރި ފަހުން، ކޮވިޑް-19 ގެ އަލާމާތްތައް ހުރުމުން ޓެސްޓް ކުރި އިރު ކޮރޯނާވައިރަސް ބައްޔަށް ޕޮސިޓިވްވީ ކަމަށެވެ.

ޑޮކްޓަރުން ބުނީ އޭނާ ބަލިން ގަދަވީ މާ ބޮޑު ފަރުވާއެއް ދީގެން ނޫން ކަމުގައެވެ.

102 އަހަރުގެ މި އަންހެން މީހާ ކޮރޯނާވައިރަސް އިން ގަދަވެފައިވާ އިރު މި ހަފްތާގެ ތެރޭގައި އިޓަލީގެ އުތުރު ސަރަހައްދަކުން އުމުރުން 101 އަހަރުގެ ފިރިހަނަކުވެސް ވަނީ ހަމަ މި ބަލިން ގަދަވެފައެވެ.

މި ދެމީހުންނަކީވެސް އެތައް މިލިއަން ބަޔަކު އެ ބައްޔެއްގައި ދުނިޔޭގެ އެކި ކަންކޮޅުތަކުން މަރުވި ސްޕެނިޝް ފްލޫގެ ދުވަސްވަރު އުފަންވި ދެމީހުންކަން މީޑިއާ ރިޕޯޓުތަކުގައި ފާހަގަ ކޮށްފައިވެއެވެ.

ސިއްހީ މާހިރުން ވިދާޅުވާ ގޮތުގައި ކޮރޯނާވައިރަސް ޖެހިގެން ދުނިޔެ ދޫކުރާ މީހުންގެ ތެރޭގައި ގިނައީ އުމުރުން ދުވަސްވީ އަދި ދާއިމީ އެކި ބަލިތަކުގައި އުޅޭ މީހުންނެވެ.

ބަލިން ގަދަވުމާއެކު ގްރޮންޑޯނާ މިހާރުވަނީ ހޮސްޕިޓަލުން ގެއަށް ބަދަލު ވެފައެވެ.

އިޓަލީ އަކީ ކޮރޯނާވައިރަސްގެ ނުރައްކާ އެންމެ ބޮޑަށް ކުރިމަތިވެފައިވާ އެއް ގައުމެވެ. ބަލިޖެހިފައިވާ 86000 މީހުން ރެކޯޑް ކުރެވިފައި ވާއިރު މިހާތަނަށް ކޮރޯނާވައިރަސް ޖެހިގެން އިޓަލީން 9100 މީހުން ވަނީ މަރުވެފައެވެ.