ޔޫޓިއުބް ބަލައިގެން ވިހޭ އަންހެން މީހާގެ ވާހަކަ

ޓިއާ ފްރީމަން ބުނާ ގޮތުން މާ ބަނޑު ދުވަސްކޮޅުގެ އެންމެ ފަހު މަރުހަލާ އާ ހަމައަށް ވެސް އޭނާ އިނީ ބަލިވެ ކަމެއް އޭނާ އަކަށް ނޭގެއެވެ. އެކައުންޓެއްގެ ގޮތުގައި މަސައްކަތް ކުރާ އެމެރިކާގެ ރައްޔިތެއް ކަމަށްވާ ޓިއާ ބުނެފައިވަނީ ދޭތެރެ ދުރުކުރާ ބޭސް ބޭނުން ކުރާތީ ބަލިވެ އިނދެދާނެކަން އޭނާ ގަބޫލެއްވެސް ނުކުރެއެވެ. އެހެންވެ ބަލިވެ އިންކަން އޭނާ އަށް އެނގުމުންވެސް އެވާހަކަ އޭނާ އެހެން މީހެއްގެ ގާތު ބުނާކަށްވެސް ބޭނުމެއް ނުވިއެވެ.

ބަލިވެ އިނދެ ދުވަސް ފުރޭކަން އެނގުމުންވެސް ޓިއާ ގެންދިޔައީ އޭނާގެ ޕްލޭންތަކާ އެއްގޮތައް ދިރިއުޅެއުޅުމުގެ ކަންކަން ކުރަމުންނެވެ. މިގޮތުން އޭނާގެ ރައްޓެއްސަކާ ބައްދަލު ކުރުމަށް މާ ކުރިން ފްލައިޓް ޓިކެޓް ނަގާފައި އޮތުމާއެކު، ރޭވިފައިވާ ގޮތައް އޭނާ ދަތުރަށް ފުރީއެވެ. ދަތުރު ކުރީ ތުރުކީގެ އިސްތަންބޫލަށެވެ.

ފްލައިޓަށް އެރުމާއެކު ޓިއާ އަށް އުނދަގޫތަކެއް އިހުސާސް ކުރެވެން ފެށިކަމަށް އޭނާ ބުންޏެވެ. އެ އުނދަގޫ ތަކަކީ ބޯޓުގެ ސަބަބުން ކުރިމަތިވި ކަމެއް ކަމެއް ނުވަތަ ކެއި އެއްޗެއްގެ ސަބަބުން ކުރިމަތިވި ކަމެއްތޯ އޭނާގެ ހިތާ ހިތާ ސުވާލު ކުރިކަމަށް ބުނެފައިވެއެވެ. އޭނާ ބޮޑަށް ގަބޫލު ކުރީ ކެއި އެއްޗެއްގެ ސަބަބުން މޭ ނުބައިކުރީ ކަމަށާއި ނިދާލުމުން ރަނގަޅުވެދާނެ ކަމުގައެވެ.

ކުޑަކޮށް ނިދިފައި ހޭލެވުނު އިރުވެސް ލުއި ވުމުގެ ބަދަލުގައި އުނދަގޫތައް އިތުރުވެފައިވާ ކަން އޭނާ އަށް އިހުސާސް ކުރެވުނެވެ. މި އުނދަގޫތަކުގެ ތެރޭގައި އުޅެނިކޮށް ބޯޓު ޖައްސާ ފޮށި ނަގާ ހިސާބަށް އޭނާ އަށް އާދެވިއްޖެ އެވެ. އެހާ ހިސާބުން އުނދަގޫތައް ބޮޑުވެގެން އެންމެ ފަހުން އޭނާ ނިންމީ މީ ކޮންކަމަކާ ގުޅޭ އުނދަގޫ ތަކެއްތޯ ދެނެގަތުމަށް ގޫގުލް ކޮށްލާށެވެ. އިސްތަންބޫލްގެ އެއަރޕޯޓުގެ ކަސްޓަމްސް ސަރަހައްދުގައި ހުރެ ގޫގުލް އިން ބެލުމުން އޭނާ އަށް އެނގުނީ މިއީ ވިހެއުމަށް ތައްޔާރު ވެއްޖެ ކަމުގެ ރިހުންތައް ކަމަށާއި، ފެންނަމުންދަނީ އެ ނިޝާން ތައް ކަމުގައެވެ. އޭރު އޭނާއަށް ރަނގަޅަށް ކޮޅަށް ހުންނަން އުނދަގޫވާ ވަރަށް ހަށިގަނޑަށް އުނދަގޫ ވަމުން ދިޔަ ކަމަށް ޓިއާ ބުނެފައިވެއެވެ.

ޓިއާގެ ތަރުޖިބާތައް ލިޔަމުން އޭނާ ބުނެފައިވަނީ އެހިސާބުން އޭނާ ހުރީ ބޭރު ގައުމެއްގައި ކަމާއި، އެތާނގައި އިނގިރޭސި ބަހުން މީހުން ވާހަކަ ނުދައްކާ ކަމާއި، އެތަނުގެ އިމަޖެންސީ ނަމްބަރެއް އެއްޗެއް ނޭގޭ ކަމާއި އެހެން ކަމުން ރަނގަޅުވާނީ އަވަހަށް ކުރިން ބުކިން ހަދާފައިވާ ހޮޓަލަށް ދިއުން ކަން ވިސްނި އެގޮތަށް ކަންކުރީ ކަމުގައެވެ.

ހޮޓަލުން އޭނާ އަށް ކޮޓަރިއަށް ވަދެވުމާއެކު އޭނާ ނިންމީ ވިހެއުމަށް ހަދާނެ ގޮތް ބެލުމަށް ޔޫޓިއުބަށް ވަންނާށެވެ. ޔޫޓިއުބް އިން އޭނާ ބެލީ ފެނުގެ ތެރޭގައި ކުދިން ވިހާ ގޮތަކީ ކޮބާތޯއެވެ. އެއާއެކު ކޮޓަރީގެ ފާޚާނާގެ ބިލިގާ އަށް ތަފާނާ ފެން އެޅުމަށްފަހު އޭގެ ތެރެއަށް އެރި ޔޫޓިއުބްގައި ކިޔައިދީފައިވާ ގޮތަށް ކަންތައް ކޮށް ވިހެއީ ކަމަށް އޭނާ ބުނެފައިވެއެވެ. އޭނާ ބުނީ އެކަނިމާ އެކަނި ވިހާ އަދި ކުއްޖާގެ ފޫޅު ބުރިކޮށް މި ހުރިހާ ކަމެއް ކޮށް ނިންމާލި އިރުވެސް ބިރު ނުގަންނަ ކަމަށާއި ހާސް ނުވާ ކަމަށެވެ. އޭނާ ވިސްނައިގެން ހަދަމުން ގެންދިޔައީ ވިހެއުމަށް ހަދަން ޖެހޭ ގޮތްތައް ކަމަށްވެސް ބުނެފައިވެއެވެ.

ޖެހިގެން އައި ދުވަހު އޭނާ ދިޔައީ ދަތުރު ހަމަޖެހިފައި އޮތް ގޮތައް ކުރިއަށް ގެންދިއުމަށް އިސްތަންބޫލް އެއަރޕޯޓަށެވެ. އޭނާ ބުނީ އޭގެ ކުރީ ދުވަހު ވިހޭ ދަރިފުޅު ގޮވައިގެން ސީދާ އެއަރޕޯޓަށް ދާން ނިންމީ އަލަށް އުފަންވި ކުއްޖަކު ގޮވައިގެން ދަތުރު ކުރަން ބޭނުންވާ ލިޔެކިޔުން ތަކަކީ ކޮބައިކަން އޭނާ އަށް އެނގިފައި ނެތުމާއެކު އެކަން އެންމެ ރަނގަޅަށް ސާފު ކުރެވޭނީވެސް އެއަރޕޯޓުން ކަމަށް ވިސްނިގެން ކަމަށެވެ.

އެއަރޕޯޓުގެ އޮފިޝަލުންނާ ބައްދަލުކޮށް އޭނާގެ ދަރިފުޅަށް އިޝާރާތް ކޮށް ބުނީ އޭނާ އަކީ އިންސާނުން ޓްރެފިކް ކުރާ މީހެއް ނޫން ކަމަށެވެ. އެއާ އެކު އޮފިޝަލުންގެ އެހީ އާ އެކު، ތުރުކީގައި ހުންނަ އެމެރިކާ އެމްބަސީން އޭނާގެ ދަރިފުޅަށް އުފަން ދުވަހުގެ ސެޓްފިކެޓް ހަދައިދިން ކަމަށް ވެއެވެ.

ދަރިފުޅުގެ ނަމަކަށް ޓިއާ ކީ ޒޭވިއާ އާޓާ އެވެ.

މިހިނގި ހުރިހާ ކަމެއް ޓިއާ ވަނީ ޓުވިޓަރ މެދުވެރިކޮށް ތަފްސީލް ތަކާ އެކު އާއްމު ކޮށްފައެވެ. އަދި މިވާހަކަތައް މިހާރުވަނީ ވައިރަލް ވެފައެވެ.