ސްކޮޓްލޭންޑުގެ ފުރަތަމަ ޑިވިޝަނުގައި ކުޅެމުން އަންނަ ރޭންޖާސްގެ ކޯޗުގެ މަގާމާއި ހަވާލުވާން ލިވަޕޫލްގެ ލެޖެންޑް ސްޓީވެން ޖެރާޑް އެއްބަސްވެއްޖެ ކަމަށް މީޑިއާތަކުން ބުނެފިއެވެ.

ލިވަޕޫލްގެ 18 އަހަރުން ދަށުގެ ކުޅުންތެރިންގެ ޓީމުގެ ކޯޗުގެ މަގާމު ޖެރާޑް ދޫކޮށްލާފައިވާއިރު ކުރިޔަށް އޮތް ދުވަސްތަކުގައި އޭނާ ރޭންޖާސްގެ ކޯޗުގެ މަގާމާއި ހަވާލުވާނެ ކަމަށް ބެލެވެއެވެ. ހަމައެހެންމެ އޭނާގެ އެސިސްޓަންޓެއްގެ ގޮތުގައި މީގެކުރިން ލިވަޕޫލްއަށް ކުޅުނު ގެރީ މެކްލިސްޓަރ ހަމަޖެހިގެންދާނެ ކަމަށް ވެސް ބެލެވެއެވެ.

ޖެރާޑް ރޭންޖާސްގެ ކޯޗުގެ މަގާމާއި ހަވާލުވެއްޖެ ނަމަ އޭނާ ވާދަކުރަން ޖެހޭނީ މިވަގުތު ސެލްޓިކްއަށް އިރުޝާދު ދެމުން އަންނަ އޭނާގެ ކުރީގެ ކޯޗު ކަމަށްވާ ބްރެންޑަން ރޯޖާސްއާ ދެކޮޅަށެވެ. ރޭންޖާސް މިވަގުތު އަންނަނީ ތާވަލުގެ ދެވަނަ މަގާމު ހޯދުމަށް މަސައްކަތްކުރަމުންނެވެ. އެ ޓީމަށް މި އަމާޒަށް ވާސިލްވުމަށް އޮތް އެންމެ ބޮޑު ހުރަހަކީ ހިބަނިއަން އަދި އެބަޑީންއެވެ. ރޭންޖާސްއިން ބުރަ މަސައްކަތްތަކެއް ކުރަމުން އަންނައިރު ސެލްޓިކުނ ވަނީ އެ ޓީމާއި ދެކޮޅަށް އެންމެފަހުން ކުޅުނު 10 މެޗު ވެސް ކާމިޔާބުކޮށްފައެވެ.

ޖެރާޑް ހޯދުމަށް ރޭންޖާސްއިން އެންމެ ފުރަތަމަ ހުށަހެޅުން ހުށަހަޅާފައިވަނީ މިދިޔަ ހަފްތާގެ ތެރޭގައެވެ. މި މަޝްވަރާތަކުން އެންމެ ބޮޑަށް ޖެރާޑް ޑިމާންޑް ކޮށްފައިވަނީ ރަނގަޅު ބަޖެޓެއް ހޯދުމަށް ކަމަށް ރިޕޯޓުތައް ބުނެއެވެ. އަންނަ ސީޒަނުގައި ބާންލީގެ މިޑްފީލްޑަރު ސްކޮޓް އާފީލްޑް އަދި ހަލް ސިޓީގެ ގޯލްކީޕަރު އެލެން މެކްގްރެގޯގެ އިތުރުން މިލްވޯލްގެ ފޯވާޑް ގްރެގޮރީ ލީ ވެސް ފެނިގެންދާނީ ރޭންޖާސްއިން ކަމަށް ރިޕޯޓުތައް ބުނެއެވެ.

ޖެރާޑާއި ގުޅޭގޮތުން ވާހަކަ ދައްކަމުން ލިވަޕޫލްގެ ކޯޗު ޔާގެން ކްލޮޕް ބުނީ ޖެރާޑް އަކީ އަބަދުވެސް ލިވަޕޫލްގެ ލެޖެންޑެއްގެ ގޮތުގައި ބެލޭނެ ކުޅުންތެރިޔެއް ކަމަށާއި އޭނާ ކުރާ ކޮންމެ ކަމެއްގައި ވެސް ލިވަޕޫލްގެ ފަރާތުން އެއްބާރުލުމާއި އެހީތެރިކަން ލިބޭނެ ކަމަށެވެ. އޭނާ ބުނީ ޖެރާޑް އަކީ ކުޅުންތެރިޔެއްގެ ގޮތުގައި ވަރަށް ގިނަ ތަޖުރިބާތަކެއް ކޮށްފައިވާ މީހެއް ކަމަށާއި އެކަމުގެ ފައިދާ އޭނާ ކޮންމެ ޓީމެއްގައި ހުރި ނަމަވެސް ފެންނާނެ ކަމަށެވެ. ކްލޮޕް ބުނީ އޭނާއަކީ ޓީމެއް ގެންގުޅޭ މީހެއް ނަމަ އަބަދުވެސް ޖެރާޑަށް އޭނާގެ ޓީމުން ފުރުސަތު އޮންނާނެ ކަމަށެވެ.

ޖެރާޑް ވަނީ ލިވަޕޫލްގެ 18 އަހަރުން ދަށުގެ ޓީމާއެކު ރަނގަޅު ނަތީޖާތަކެއް ނެރެފައެވެ.