ޝްރައްދާ ކަޕޫރުވެސް މިއަހަރު ކައިވެނި ކުރަނީ؟

މިއަހަރު ވެފައިވަނީ ބޮލީވުޑްގެ ތަރިންނަށް ކައިވެނީގެ މޫސުމަކަށެވެ.

މިއަހަރުގެ ތެރޭގައި ދީޕިކާ ޕަދުކޯންއާއި ރަންވީރު ސިންގް ކައިވެނި ކުރާނެ ކަމަށް އަޑުތައް ފެތުރިފައިވާއިރު ސޯނަމްއާއި އޭނާގެ ދުވަސްވީ ލޯބިވެރިޔާ އާނަންދް އަހޫޖާ ކައިވެނިކުރާނެކަމަށް ވެސް ވަނީ އަޑުތައް ފެތުރިފައެވެ.

އެންމެ ފަހުގެ ޚަބަރުތައް ބުނާ ގޮތުގައި ޝްރައްދާ ކަޕޫރުވެސް މިއަހަރު ކައިވެނި ކުރާނެކަމުގެ އަޑުތައް ވަނީ ފެތުރިފައެވެ.

ޝްރައްދާ އުޅެނީ ކައިވެނިކުރަން ކަމަށް އަޑުތައް ފެތުރިފައިވަނީ އޭނާ އަންގާރަ ދުވަހު އިންސްޓަގްރާމަށް ލާފައިވާ ފޮޓޯއަކުންނެވެ. އިންޑިއަން ހެދުމެއް ހިފަހައްޓައިގެން ޝްރައްދާ ހުރި އެ ފޮޓޯގައި އޭނާ ޖަހާފައިވަނީ މިއަހަރުގެ އެންމެ ބޮޑު "ހަލްދީ" އަށް އޭނާ ތައްޔާރު ވަމުންދާ ކަމަށެވެ. ހަލްދީއަކީ އިންޑިއާގެ ހިންދޫން ކައިވެނިކުރުމުގެ ކުރިން ގައިގައި އުނގުޅާ ރީނދޫއަކަށް ކިޔާ ނަމެކެވެ. އޭނާ މިހެން ބުނުމުން އެއީ ކައިވެނި ކުރަން އުޅޭ ވާހަކަ ކަމަށް ބެލެވެއެވެ. އެ ފޮޓޯއަށް ކޮމެންޓް ކޮށްފައިވާ ގިނަ ފަރާތްތަކުން ވެސް ވަނީ ޝްރައްދާ ކައިވެނި ކުރަން އުޅެނީތޯއާއި ކައިވެނި ކުރާނީ ކޮން ދުވަހަކުންތޯ ސުވާލު ކޮށްފައެވެ.

އެހެން ނަމަވެސް ޝްރައްދާ އެ ކޮމެންޓްތަކަށް ޖަވާބު ދީފައެއް ނުވެއެވެ.

ޝްރައްދާ މިވަގުތު އުޅެނީ ފިލްމުތަކާއިގެން އަވަދިނެތިއެވެ. އޭނާ މިހާރު ޝޫޓްކުރަމުން އަންނަނީ ރާޖް ކުމާރު ރާއޯ އާއި އޭނާ އެކީގައި ފެނިގެންދާ ފުރަތަމަ ފިލްމު ސްޓްރީގެ ޝޫޓިންއާއިގެންނެވެ. އޭނާ މިއަހަރު ފެނިގެންދާނެ އެއް ފިލްމަކީ ޝާހިދު ކަޕޫރާއި އެކު ފެނިގެންދާ ފިލްމު ބައްޓީ ގުލް މީޓާ ޗާލޫއެވެ. އެ ފިލްމުގެ ޝޫޓިން ނިމުމަކަށް އައިސްފައިވާއިރު ޝްރައްދާ ފެނިގެންދާ ތެލުގޫ ފިލްމު ސާހޯގެ ޝޫޓިން މިހާރު ވަނީ ނިންމާފައެވެ. މަޝްހޫރު ޓެލުގޫ ފިލްމު ބާހުބަލީއިން މަޝްހޫރު ކަމެއް ހޯދި ޕްރަބާސްއާއި އެކު ލީޑު ރޯލުން ފެނިގެންދާ ސާހޯ މިއަހަރު ސިނަމާތަކަށް އަންނާނެއެވެ.