ޑާކް ރެއިން އެންޓަރޓެއިންމަންޓް އިން މި އަހަރު ފުރަތަމަ ރިލީޒް ކުރާ ފިލްމު، 'ވަކިން ލޯބިން'ގެ ވަދާއީ ޝޯ ހުކުރު ދުވަހުގެރޭ (މިރޭ) އޮލިމްޕަހުގައި ދައްކާނެއެވެ.

މިރޭ އޮލިމްޕަހުގައި ފިލްމު ދެއްކުމަށް ހަމަޖެހިފައިވާއިރު ޝޯގެ ޓިކެޓް ދަނީ ވިއްކަމުންނެވެ.

މި ފިލްމުގެ ލީޑު ދެ ކެރެކްޓަރގެ ރޯލުން ފެނިގެންދަނީ ޑާކްރެއިން އެންޓަރޓެއިންމަންޓްގެ އެންމެ މަޤުބޫލު ޖޯޑު ކަމުގައިވާ މުޙައްމަދު ޖުމައްޔިލް (ޖުމަލް) އާއި މަރިޔަމް މަޖުދާ (މަޖޫ) އެވެ. މީގެ އިތުރުން މި ފިލްމުގެ މުހިއްމު ރޯލަކުން ނުޒުހަތު ޝުއައިބް (ނުޒޫ) ވެސް ފެނިގެންދެއެވެ.
އައިޝަތު ފުއާދު ލިޔެފައިވާ ވާހަކައަކަށް ހަދާ މި ފިލްމު ޑައިރެކްޓްކޮށްފައި ވަނީ އަލީ ޝިފާޢު (ޗިއްޕެ) އެވެ. ޑާކްރެއިން އެންޓަރޓެއިންމަންޓްގެ ގިނަ ފިލްމުތަކޭކޭ ވެސް އެއްގޮތަށް މި ފިލްމުގެ ވިޒުއަލް އިފެކްޓްސް ހަދާފައި ވަނީ އަޙުމަދު ޝިނާނެވެ. މި ފިލްމަށް ޙުސައިން ޝަދިޔާން (ސޭންޑީ) ކޮސްޓިއުމް ޑިޒައިން ކޮށްދީފައިވާއިރު، މި ފިލްމުގެ މިއުޒިކް ހަދާފައި ވަނީ މުޙައްމަދު އިކްރާމްއެވެ.

'ވަކިން ލޯބިން'ގެ ފަހު ޝޯ މިރޭ އޮލިމްޕަހުގައި ދައްކާއިރު ޑާކްރެއިން އެންޓަޓައިންމަންޓުން ކުރިން ނެރެފައިވާ ދެފިލްމު ކަމަށްވާ 'ވާށޭ މަށާއެކީ' އަދި 'މިއީ ލޯތްބަކީ' ވެސް މިމަހުގައި ވަނީ އަޅުވަން ނިންމާފައެވެ. އެގޮތުން ވާށޭ މަށާ އެކީ މި މަހު 12 ގައި ދައްކަން ހަމަޖެހިފައިވާއިރު މިއީ ލޯތްބަކީ ދައްކާނީ މި މަހު 13 ގަ އެވެ.