އަމްޖޭގެ ރޭވުމުން ރާއްޖޭގެ ރަށްތަކަށް

މާޗް މަހުގެ 24 ވަނަ ދުވަހު އޮލިމްޕަހަށް އައި ޑައިރެކްޓަރ އަމްޖަދު އިބްރާހިމްގެ 52 ވަނަ ފިލްމު ރޭވުމުން ރާއްޖޭގެ ރަށްތަކުގައި އަޅުވަން ނިންމައިފިއެވެ.

ރޭވުމުންގައި ހަރަކާތްތެރިވާ ތަރިއެއްކަމަށްވާ މުހައްމަދު ޝާޒް(ތަޖޫބެ) ބުނީ ބުރާސްފަތި ދުވަހުގެ ރޭ ހދ. ކުޅުދުއްފުށީގައި ރޭވުމުންގެ ޝޯ އަޅުވާނެ ކަމަށާއި އަދިވެސް އެހެން ރަށްރަށުގައި ފިލްމު އަޅުވަން ނިންމާފައިވާކަމަށެވެ. އޭނާ ބުނީ ހުކުރު ދުވަހުގެ ރޭ 8:30 ގައި މާލެއާއި ހުޅުމާލޭ ޝްވެކް ސިނަމާގައި ފިލްމު އަޅުވާނެ ކަމަށެވެ.

ބެލުންތެރިންގެ ފަރާތުން ފިލްމަށް ދެމުންގެންދާ ތަރުހީބަށް އެޓީމުން ޝުކުރު އަދާކުރެއެވެ.

ރޭވުމުންގެ ލީޑް ރޯލުން ފެނިގެން ދަނީ މުހައްމަދު މަނިކާއި އަލަށް ތައާރަފުވާ ނާޖިފާ އެވެ. މީގެ އިތުރުން މަރިޔަމް ޝަކީލާ (ޝަކިއްތަ)، މުހައްމަދު ޝާޒް (ތަޖޫބެ)، ފައުޒިއްޔާ ހަސަން އަދި ހަސަން މަނިކު (ރޯނު) މި ފިލްމުން ފެނިގެންދާނެއެވެ. މިއީ އަމްޖޭގެ އަމިއްލަ ވާހަކައަކަށް ހަދާފައިވާ ފިލްމެކެވެ. ފިލްމު ކެމެރާ ކޮށްފައިވަނީ މުހައްމަދު އަބޫބަކުރު (މާއެނބޫ) އެވެ. މިއީ ބަޔަކު ރާވައިގެން ހިނގާ ކަންތައްތަކެއް ދައްކުވައިދޭ ލޯބީގެ ބިރުވެރި ފިލްމެކެވެ. ދިރިއުޅުމުގައި ހިނގާ ގިނަ ކަންތައްތަކެއް ފެނިގެންދާ މިފިލްމުގައި ގެވެށި އަނިޔާއާއި، ޖިންސީ ގޯނާ، ކައިވެނިން ބޭރުގައި ގުޅުންހިންގުމާއި، ދުނިޔަވީ ދަހިވެތިކަމުގައި ސިހުރު ފަންޑިތަ ހެދުން ފަދަ ކަންތައްތައް މި ފިލްމުން ފެނިގެންދެއެވެ. ރޭވުމުންގެ ދެވަނަ ބައެއް ގެނެސްދޭގޮތަށް ފިލްމު ނިންމާލާއިރު ފިލްމު ޕްރޮޑިއުސް ކޮށްފައިވަނީ ޖޭޒް އެންޓަޓެއިންމެންޓުން ނެވެ.