މަދޫރީ ޑިކްސިޓްގެ ފުރަތަމަ މަރާޓީ ފިލްމު "ބަކެޓްލިސްޓް" ހިންދީ ބަހުން ޑަބްކޮށްގެން ގެނެސްދޭނީ ކަރަން ޖޯހަރު ކަމަށް އޭނާ ބުނެފިއެވެ.
ކަރަން ކޮށްފައިވާ ޓްވީޓެއްގައި ބުނެފައި ވަނީ "ބަކެޓްލިސްޓް" ޑަބް ކުރާނީ އޭނާ ކަމަށެވެ. މީގެ ކުރިން ވެސް ކަރަން ވަނީ ތެލުގޫ ފިލްމު "ބާހުބަލީ2" ވެސް ހިންދީ ބަހުން ޑަބްކޮށްގެން ގެނެސްދީފައެވެ.
"ބަކެޓްލިސްޓް"އާ ބެހޭ ގޮތުން ވާހަކަ ދައްކަމުން މަދޫރީ މީގެ ކުރިން ބުނެފައި ވަނީ މިއީ "ކޮންމެވެސް ނަސީބެއް ލިބޭނެ ގޭބިސީއެއް" ދައްކުވައިދޭ ފިލްމެއް ކަމަށެވެ. މިފިލްމުން ދެނީ ހަމައެކަނި އުއްމީދާއި ހިތްވަރު ނޫން ކަމަށާއި ހަގީގީ އިހުސާސްތަކާ އެކު ދިރިއުޅުމަށް ހިތްވަރު މި ފިލްމުން ދައްކުވައިދޭނެ ކަމަށް އޭނާ ބުންޏެވެ.
ބަކެޓްލިސްޓް ޑައިރެކްޓްކުރަނީ ތޭޖާސް ޕްރަބާ ވިޖޭ ދެއޯސްކާރްއެވެ.
މަދޫރީ މަރާޓީ ފިލްމަކުން ފެނިގެންދާއިރު އޭނާ މިހާރު ވަނީ މަރާޓީ ފިލްމަށް ޚާއްސަކޮށްގެން ޕްރޮޑަކްޝަން ހައުސްއެއް ވެސް ހުޅުވާފައެވެ. މިދިޔަ މާޗްމަހުގެ ތެރޭގައި ހުޅުވާފައިވާ މަރާޓީ ޕްރޮޑަކްޝަން ހައުސްއާ ބެހޭ ގޮތުން މަދޫރީ ބުނެފައި ވަނީ އޭނާ ހުޅުވައިފައިވާ ޕްރޮޑަކްޝަން ހައުސްއަކީ މަރާޓީ ފިލްމުތަކަށް ޚާއްސަ ކޮށްގެން ހަދާފައިވާ ޕްރޮޑަކްޝަން ހައުސްއެއް ކަމަށެވެ. އެ ޕްރޮޑަކްޝަން ހައުސްގެ ނަމަކީ އާރްއެންއެމްއެވެ. އެއީ މަދޫރީ އާއި އޭނާގެ ފިރިމީހާގެ ނަމުގެ ފެށޭ އަކުރުތަކެވެ.
