މަޝްހޫރު ބަތަލާ ސްރީދޭވީ އާއި ޕްރޮޑިއުސަރު ބޯނީ ކަޕޫރުގެ އަންހެން ދަރި ޖާންވީ ކަޕޫރު، ދުނިޔޭގެ މަޝްހޫރު މަޖައްލާއެއް ކަމަށްވާ "ވޯގް"ގެ ކަވަރއަށް ތައްޔާރުވެއްޖެއެވެ.
ޖާންވީ ކަޕޫރު، 21، ވޯގްގެ ކަވަރ އަށް ފޮޓޯ ޝޫޓް ކުރާނީ މާދަމާ ކަމަށް ޚަބަރުތައް ބުނެއެވެ. ޚަބަރުތައް ބުނާ ގޮތުގައި ވޯގްގެ ކަވަރއަށް ތައްޔާރު ވުމަށް ޖާންވީ ވަނީ 7 ގަޑިއިރަށް ނިދުމާއި ޖިމް ޖެއްސުމާއި ރަނގަޅު ކާނާ ބޭނުންކުރުން ފަދަ ތައްޔާރީތައް އެއް ހަފްތާ ކުރިން ވާންފަށާފައެވެ.
ޖާންވީގެ މަންމަ ސްރީދޭވީގެ މަރާއި ގުޅިގެން ޖާންވީ އުޅެންޖެހުނު ހިތްދަތިކަމުން އަރައިގަންނަން މަސައްކަތް ކުރަމުންދާއިރު އޭނާގެ ގާތްމީހަކާއި ހަވާލާދީ އިންޑިއާގެ ނޫހެއްގައި ރިޕޯޓްކޮށްފައިވާ ގޮތުގައި ކުރިން ހަމަޖެހިފައިއޮތީ ވޯގްގެ ކަވަރ ގައި ޖާންވީއާއި އޭނާގެ މަންމަ އެއްކޮށް ފެންނަ ފޮޓޯއެއް ޝާއިއު ކުރުމަށެވެ.އަދި އެއަށް ސްރީދޭވީވެސް ތައްޔާރުވިކަމަށް ވަނީ ރިޕޯޓް ކޮށްފައެވެ.
ޖާންވީ ވަނީ މީގެ ކުރިން ޕީޕަލްސްގެ މެގަޒިންގެ ކަވަރ އިން ވެސް ފެނިގެން ގޮސްފައެވެ. އެއީ ސްރީދޭވީ މަރުވުމުގެ ކުރިންނެވެ. އޭގައި ޖާންވީ ފެނިފައިވަނީ މަންމަ ސްރީދޭވީއާއި އެކުގައެވެ.
މާދަމާ އޮންނަ ވޯގް ގެ ޝޫޓިންގައި ޖާންވީއާއި އޭނާގެ ކޮއްކޮ ޚުޝީ ކަޕޫރު ފެނިގެންދާނެކަމަށް ޚަބަރުތައް ބުނެއެވެ. އަދި މި ޝޫޓިން ކުރިއަށްދާ ވަގުތު އެދެމީހުންނާއިއެކު ސްރީދޭވީގެ ގާތް ރަހުމަތްތެރިއް ކަމަށްވާ އަދި މަޝްހޫރު ޑައިރެކްޓަރ/ޕްރޮޑިއުސަރ ކަރަން ޖޯހަރާއި މަނީޝް މަލްހޯތުރާ ބައިވެރިވާނެކަމަށްވެސް ޚަބަރުތއް ބުނެއެވެ.
ޖާންވީއާއި ޚުޝީގެ ފޮޓޯތައް ނަގަން ހަމަޖެހިފައިވަނީ މުމްބާއިގެ ހިޕް ރޫފްޓޮޕް ރެސްޓޯރެންޓާއި ބާ ޑޯމް އިންޓަރކަންޓިނެންޓަލް މެރައިން ޑްރައިވްގައެވެ.
