ކުރީގެ ހޯމް މިނިސްޓަރު އަފީފު ދޫކޮށްލައިފި
ހުކުރު ދުވަހުގެ ރޭގެ އެއްވުމުން ހައްޔަރުކުރި ގިނަ ބަޔަކު ވަނީ ދޫކޮށްލާފައި
ކުރީގެ ހޯމަ މިނިސްޓަރު ހަސަން އަފީފު
ގަދަ ބާރުން ވެރިކަން ދެމެހެއްޓުމަށްޓަކައި ސަރުކާރުން ކުރާ މަސައްކަތާ ދެކޮޅަށް ރައްޔިތުން އަޑު އުފުލުމަށް ބޭއްވި އެއްވުމުގައި ރާއްޖެ ޓީވީއަށް އިންޓަވިއު ދެއްވަނިކޮށް، ހައްޔަރުކުރި ކުރީގެ ހޯމް މިނިސްޓަރު ހަސަން އަފީފު ދޫކޮށްލައިފި އެވެ.
އެމްޑީޕީން ބުނި ގޮތުގައި އަފީފު ދޫކޮށްލާފައިވަނީ ހޮނިހިރު ދުވަހުގެ ރޭގެ ވަގުތެއްގަ އެވެ.
ކުރިން ރައްޔިތުންގެ މަޖިލީހުގެ ތ. އަތޮޅު މެމްބަރުކަން ވެސް ގިނަ ދުވަސްތަކެއް ވަންދެން ކުރެއްވި އަފީފު ފުލުހުންގެ ބެލުމުގެ ދަށަށް ގެންދިޔައީ މަޖީދީ މަގު، މާލޭ ގްރޭންޑް ކައިރިންނެވެ. އަފީފުގެ އިތުރުން ބައެއް އެހެން މީހުން ވެސް ހައްޔަރުކުރި އެވެ.
އަފީފު ހައްޔަރުކުރީ އެއްވެސް އިންޒާރެއް ދިނުމެއް ނެތި އެވެ.
މުޒާހަރާ ކަވަރުކުރަމުން ދިޔަ ރާއްޖެ ޓީވީގެ ނޫސްވެރިޔާ ހުސައިން ހަސަން ވިދާޅުވީ އެއްވުމުމުގެ ތެރެއިން މީހުން ހައްޔަރު ކުރަމުން ދިޔައީ ސުލުހަވެރިކަމާއެކު އަޑު އުފުލަމުން ދަނިކޮށް އަދި ފުލުހުންގެ އަމުރަށް ކިޔަމަންތެރިވަމުން ދަނިކޮށް ކަމަށެވެ.
ސުޕްރީމް ކޯޓްގެ ފެބްރުއަރީ 1 ގެ ހުކުމް ތަންފީޒު ކުރުމަށާއި ރައީސް ޔާމީން ހައްޔަރުކުރުމަށް ގޮވާލައި ހުކުރު ދުވަހުގެ ރޭ މާލޭގައި ބޭއްވި ބޮޑު އެއްވުން ރޫޅާލައި، 141 ހައްޔަރުކުރި އެވެ.
ހޮނިހިރު ދުވަހުގެ ރޭ ކުރި އިހުތިޖާޖުގެ ތެރެއިން ވެސް ގިނަ ބަޔަކު ހައްޔަރު ކޮށްފައިވެއެވެ. އެގެ ތެރެއިން އެއްބަޔަކު ދޫކޮށްފައި ވާއިރު، މި ވަގުތު ފުލުހުންގެ ބަންދުގައި ތިބީ ޖުމްލަ 15 މީހުން ކަމަށް ފުލުހުން ބުނެެވެ.
