ދެ މެމްބަރުން ދޫކޮށްލީ ހައްޔަރު ކުރިތާ ހަތަރު ގަޑިއިރު ފަހުން
މުޒާހަރާގެ ތެރޭގައި އަމީތު (ކ) އަދި އަބުދުﷲ- ފޮޓޯ/ ރާއްޖެއެމްވީ
ސިޔާސީ ލީޑަރުން މިނިވަން ކުރުމަށް ސުޕްރީމް ކޯޓުން ކުރި އަމުރު ތަންފީޒު ކުރުމަށް ގޮވާލައި ކުރަމުންދާ ސިލްސިލާ މުޒާހަރާ ތެރެއިން ހައްޔަރު ކުރި މަޑުއްވަރީ ދާއިރާގެ މެމްބަރު މުހައްމަދު އަމީތު އާއި ތިނަދޫ ދެކުނު ދާއިރާގެ މެންބަރު އަބްދުﷲ އަހްމަދު (އަބުޅޯ) ދޫކޮށްލައިފިއެވެ.
އެ ދެ މެމްބަރުން ބަންދުން ދޫކޮށްލީ ހައްޔަރަށް ގެންދެވުނުތާ ހަތަރު ގަޑިއިރުފަހުންނެވެ. އަމީތާއި އަބުޅޯއާއެކު ދޫކޮށްލި މީހުންގެ ތެރޭގައި ގުޅިފައިވާ ޕާޓީތަކުގެ ސިޔާސީ އެކްޓިވިސްޓު، އަލީ ޝާހިދު (ސްޓެޕް އައްޔަ) ވެސް ހިމެނެއެވެ.
ބަންދުން ދޫކޮށްލުމާއެކު އަބުދުﷲ ކުރެއްވި ޓްވީޓެއްގައި ވިދާޅުވީ އަޒުމާ ހިތްވަރަކަށް ބަދަލެއް ނާންނާނެ ކަމަށާއި ގާނޫނުއަސާސީ ނަގަހައްޓައި ދެމެހެއްޓުމަށް ކުރާ މަސައްކަތުގައި ފަސްޖެހުމެއް ނެތް ކަމަށެވެ.
އަމީތު ދޫކޮށްލިކަން އާންމުނަށް ކަށަވަރުކޮށްދިނުމަށް އޭނާ ވެސް ވަނީ ޓްވީޓެއް ކުރައްވާފައެވެ.
އަމީތާއި އަބްދުﷲ މިއަދު ހައްޔަރުކުރި އިރު ރޭގެ މުޒާހަރާގައި ގަލޮޅު ދެކުނު ދާއިރާގެ މެންބަރު އަހްމަދު މަހްލޫފް ވެސް ވަނީ ހައްޔަރުކޮށްފައެވެ.
ފެބްރުއަރީ މަހުގެ އެއް ވަނަ ދުވަހު ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ނެރުނު އަމުރު ތަންފީޒު ކުރުމަށް ގޮވާލައި މާލެ އާއި ރާއްޖޭގެ އެކި ކަންކޮޅުތަކުގައި ސިލްސިލާ މުޒާހަރާތައް ކުރިއަށް ގެންދާތާ މިއަދަކީ 23 ވަނަ ދުވަހެވެ.
