ލޯކަލް ކައުންސިލް އިންތިޚާބުގެ ނަތީޖާއާއެކު އަލުން ސަރުކާރު އެކުލަވާލަން ރަނިލް މަސައްކަތް ކުރައްވަނީ

އަވަށްޓެރި ސްރީލަންކާގައި މިމަހުގެ 10 ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިޚާބުގައި ވެރިކަން ކުރާ ކޯލިޝަނަށް ލިބުނު ބޮޑު ނާކާމިޔާބާއިއެކު، އަލުން ސަރުކާރު އެކުލަވާލުމުގެ ހުއްދައަކަށް ބޮޑުވަޒީރު ރަނިލް ވިކްރަމަ ސިންހަ ރައީސް މައިތިރިޕާލާ ސިރިސޭނާގެ އަރިހުން އެދިވަޑައިގެންފިއެވެ.

ސިރިސޭނާގެ ފްރީޑަމް ޕާޓީއާއި ރަނިލް ވިކްރަމަސިންހަގެ ޔުނައިޓެޑް ނޭޝަނަލް ޕާޓީއިން ކޯލިޝަން ހަދައިގެން ވެރިކަމަށް އައިނަމަވެސް، ކައުންސިލް އިންތިޚާބުގައި ދެޕާޓީއިން ވާދަކުރީ ވަކިންނެވެ. ލޯކަލް ކައުންސިލް އިންތިޚާބުގައި އާދަޔާ ޚިލާފު ބޮޑު ކާމިޔާބީއެއް ހޯދައި ސަރުކާރު ބަލިކުރީ ކުރީގެ ރައީސް މަހިންދަ ރާޖަޕަކްސަގެ ޕާޓީއިންނެވެ.

މައުލޫމާތު ލިބިފައިވާ ގޮތުގައި ރަނިލް އެކުލަވާލާ ސަރުކާރު ވާނީ ޔޫއެންޕީގެ ސަރުކާރަކަށެވެ. އަދި ޤާނޫނު ހަދާ މަޖިލީހުގެ އަޣުލަބިއްޔަތު ރަނިލް އަށް ހޯއްދެވިއްޖެނަމަ، އެމަޖިލީހުގައި ތިއްބެވި ފްރީޑަމް ޕާޓީގެ މެމްބަރުން ޔޫއެންޕީއަށް ގުޅުމަށް އެމެމްބަރުންނަށް އަންގަވަން ސިރިސޭނާ ވަނީ ނިންމަވާފައެވެ.

ޤާނޫނު ހަދާ މަޖިލީހުގައި ސަރުކާރެއް އެކުލަވާލެވޭ ވަރުގެ އަޣުލަބިއްޔަތެއް އޮތްތޯ ނުވަތަ ނޫންތޯ ރަނިލް ހާމަކުރައްވާނީ އަންނަ ބުރާސްފަތިިިި ދުވަހުގެ ކުރިިންނެވެ.

އިދިކޮޅު ޓެމިލް ނެޝަނަލް އެލަޔަންސްއިން ވަނީ ސަރުކާރުގައި ބައިވެރިނުވި ނަމަވެސް، ޔޫއެންޕީއިން އެކުލަވާލާ ސަރުކާރަކަށް ތާޢީދުކުރާނެ ކަމަށް ބުނެފައެވެ.

އަނެއްކޮޅުން އިންތިޚާބުގެ ނަތީޖާއަށް ބަލައި، ޤާނޫނު ހަދާ މަޖިލިސް އުވާލައި، އަލުން އިންތިޚާބު ބާއްވަން ކުރީގެ ރައީސް މަހިންދަ ރާޖަޕަކްސަ ވަނީ ގޮވާލައްވާފައެވެ.

ރާޖަޕަކްސަ ދާދި ފަހުން އުފެއްދެވި ޕޮޑުޖާނަ ޕެރަމުނަ ޕާޓީއިން ވަނީ އިންތިޚާބުގައި ބޮޑު ކާމިޔާބީއެއް ހޯދާފައެވެ. އިންތިޚާބަށްފަހު ނޫސްވެރިންނާއި ވާހަކަ ދައްކަވަމުން ރާޖަޕަކްސަ ވިދާޅުވީ މިހާރު ކުރިމަތިވެފައިވާ ސިޔާސީ ހަލަބޮލިކަމަށް ހައްލެއް ގެނައުމަށް ޤާނޫނު ހަދާ މަޖިލިސް އުވާލައި، އަލުން އިންތިޚާބު ބާއްވަން ޖެހޭ ކަމަށެވެ.