ކަރަންޓު ބިލުގެ މައްސަލައިގައި އިހުތިޖާޖުކުރި 11 އަމީރަކު ހައްޔަރުކޮށްފި
11 އަމީރުންވެސް ވަނީ ހައްޔަރުކުރެވިފައި
އަމީރުން އިހުތިޖާޖުކުރީ ވެރިރަށް ރިޔާޒްގައި ހުންނަ ޤަސްރް އަލް ހުކުމް ގަނޑުވަރުގައި
ސަޢޫދީ ޢަރަބިއްޔާގެ 11 އަމީރަކު، އަމީރުންވެސް ކަރަންޓު ބިލް ދައްކަން ޖެހޭކަމަށް ބުނެ ރަސްގެފާނު ސަލްމާން ބިން އަބްދުލްޢަޒީޒް ނެރުއްވި ޤަރާރަކާއި ދެކޮޅަށް އިހުތިޖާޖުކުރުމުން ހައްޔަރުކޮށްފިއެވެ.
ސަޢޫދީގެ ބަންޑާރަ ނައިބު ސަޢުދު އަލް މުޖީބު ވިދާޅުވީ ޝާހީ އާއިލާގެ 11 އަމީރަކު ޤަސްރު އަލް ޙުކުމް ޝަހީ ގަނޑުވަރަށް ބުރާސްފަތި ދުވަހު ގޮސް، އެތަނުން ނިކުތުމަށް ދެކޮޅު ހަދާފައިވާކަމަށެވެ. މުޖީބު ވިދާޅުވީ ޤާނޫނުގެ ކުރިމަތީގައި އެންމެން ހަމަހަމަވާނެކަމަށާއި، ޝާހީ އާއިލާގެ މެމްބަރުންގެ މައްޗަށްވެސް ޤާނޫން ހިނގާނެކަމަށެވެ.
11 އަމީރުންވެސް ހައްޔަރުކުރުމަށްފަހު މިހާރުވަނީ ބަންދުކޮށްފައެވެ.
މީގެ ކުރިން ސަޢޫދީގެ ޝާހީ ޢާއިލާގެ މެމްބަރުންގެ މައްޗަށް ޤާނޫން ނުހިނގާކަމަށް ބުނެ ގިނަ ބައެއްގެ ފާޑުކިޔުންތައް އަމާޒުވެފައިވީނަމަވެސް، ފަހަކަށް އައިސް އެޤައުމުގެ ޝާހީ އާއިލާގެ ގިނަ މެމްބަރުންތަކެއް އެކި ކުށްތަކުގައި ވަނީ ހައްޔަރުކުރެވިފައެވެ. އަދި ދާދިފަހުން ކޮރަޕްޝަން ނައްތާލުމަށް ކުރާ މަސައްކަތުގެ ތެރެއިންކަމަށް ބުނެ، ސަޢޫދީ ވަލީޢަޙުދު މުޙައްމަދު ބިން ސަލްމާންގެ އަމުރަށްވެސް ބާރުގަދަ އަމީރުންތަކެއް ހައްޔަރުކޮށްފައިވެއެވެ.
