ނިމިދިޔަ އަހަރު މޯލްޑިވްސް ޕޮލިސް ސާރވިސް އަށް ހުށަހެޅުނު މައްސަލަތައް މަދު ކަމަށް އެ މުއައްސަސާ އިން ބުނެފިއެވެ.

އެގޮތުން 2016 ވަނަ އަހަރުގެ ޖެނުއަރީ އިން ފެށިގެން ޑިސެމްބަރު މަހުގެ ނިޔަލަށް ޖުމްލަ 13،568 މައްސަލައެއް ފުލުހުންނަށް ހުށަހެޅިފައިވާއިރު 2017 ވަނަ އަހަރުގެ އެ މުއްދަތުގައި ހުށަހަޅާފައި ވަނީ ޖުމްލަ 12775 މައްސަލަ ކަމަށް ރެކޯޑްތަކުން ދައްކައެވެ.

މިދިޔަ އަހަރު ފުލުހުންނަށް ހުށަހެޅިފައިވާ މައްސަލަތަކަށް ބަލާއިރު މާރާމާރީ އާއި ވައްކަމާއި ފޭރުމާއި މަސްތުވާތަކެތީގެ މައްސަލަތަކާއި ޓްރެފިކްގެ މައްސަލަތަކާއި ޖިންސީ ގޯނާކުރުމާއި އަދި ގެވެށި އަނިޔާގެ މައްސަލަތަކާއި ވަގު ލިޔެކިޔުން ގެންގުޅުމުގެ މައްސަލަތަކާއި މަކަރާއި ހީލަތް ހެދުމުގެ މައްސަލަތަކާއި އަދި މީގެ އިތުރުން ގެއްލިގެން ހުށަހެޅުނު ތަކެތީގެ މައްސަލަތައް މަދުކަން ވަނީ ފާހަގަކޮށްފައެވެ.

ފުލުހުންނަށް ހުށަހެޅުނު މައްސަލަތަކުގެ ތެރެއިން މާރާމާރީގެ 770 މައްސަލަ މިދިޔަ އަހަރު ހުށަހެޅި ފައިވާއިރު 2016 ވަނަ އަހަރު ހުށަހެޅިފައިވަނީ މާރާމާރީގެ 782 މައްސަލައެވެ. ވައްކަމުގެ 3،617 މައްސަލައެއް 2016 ވަނަ އަހަރު ހުށަހެޅި ފައިވާއިރު މިދިޔަ އަހަރު ހުށަހެޅި ފައިވަނީ ވައްކަމުގެ 3،503 މައްސަލައެވެ. ފުލުހުންނަށް ހުށަހެޅިފައިވާ ފޭރުމުގެ މައްސަލަތަކަށް ބަލާއިރު، ފޭރުމުގެ 716 މައްސަލައެއް 2016 ވަނަ އަހަރު ހުށަހެޅި ފައިވާއިރު 2017 ވަނަ އަހަރު ހުށަހެޅި ފައިވަނީ ފޭރުމުގެ 662 މައްސަލައެކެވެ.

ފުލުހުންނަށް ހުށަހެޅިފައިވާ މަސްތުވާތަކެތީގެ މައްސަލަތަކަށް ބަލާއިރު، 2016 ވަނަ އަހަރު 2،378 މައްސަލައެއް ހުށަހަޅާފައި ވެއެވެ. އަދި 2017 ވަނަ އަހަރު ހުށަހެޅިފައި ވަނީ މަސްތުވާތަކެތީގެ 2،038 މައްސަލައެވެ. އަދި 2016 ވަނަ އަހަރު ޓްރެފިކްގެ 2،242 މައްސަލައެއް ހުށަހެޅިފައިވާއިރު 2017 ވަނަ އަހަރު ހުށަހެޅިފައިވާ ޓްރެފިކްގެ މައްސަލަތައް މަދެވެ. އެގޮތުން 2017 ވަނަ އަހަރު ހުށަހެޅިފައި ވަނީ ޓްރެފިކްގެ މުޅި ޖުމްލަ 2،105 މައްސަލައެވެ.

ފުލުހުންނަށް ހުށަހެޅިފައިވާ ޖިންސީ ގޯނާ އާއި ގެވެށި އަނިޔާގެ މައްސަލަތަކަށް ބަލާއިރު 2016 ވަނަ އަހަރު ހުށަހެޅުނު މައްސަލަ ތަކަށް ވުރެ 2017 ވަނަ އަހަރު ހުށަހެޅުނު މައްސަލަތައް މަދުކަން ފުލުހުން ވަނީ ފާހަގަކޮށްފައެވެ. އެގޮތުން 2016 ވަނަ އަހަރު ޖިންސީ ގޯނާގެ 467 މައްސަލައެއް ހުށަހެޅިފައިވާއިރު 2017 ވަނަ އަހަރު ހުށަހެޅިފައިވަނީ 417 މައްސަލައެވެ. ގެވެށި އަނިޔާގެ 305 މައްސަލައެއް 2016 ވަނަ އަހަރު ހުށަހެޅިފައިވާއިރު 2017 ވަނަ އަހަރު ހުށަހެޅި ފައިވަނީ ގެވެށި އަނިޔާގެ 279 މައްސަލައެކެވެ.

ވަގު ލިޔެކިޔުން ގެންގުޅުމުގެ 97 މައްސަލައެއް 2016 ވަނަ އަހަރު ފުލުހުންނަށް ހުށަހަޅާފައިވާއިރު 2017 ވަނަ އަހަރު ހުށަހެޅާފައި ވަނީ 86 މައްސަލައެވެ. މުދަލަށް ގެއްލުން ދިނުމުގެ 359 މައްސަލައެއް 2016 ވަނަ އަހަރު ހުށަހެޅިފައިވާއިރު 2017 ވަނަ އަހަރު މައްސަލަ ހުޅަހެޅުނު މިންވަރު އިތުރުވެފައިވާކަން ވަނީ ފާހަގަކޮށްފައެވެ. އެގޮތުން މުދަލަށް ގެއްލުން ދިނުމުގެ 455 މައްސަލައެއް 2017 ވަނަ އަހަރު ހުށަހެޅިފައިވެއެވެ. ޗެކްބައުންސްގެ 265 މައްސަލައެއް 2016 ވަނަ އަހަރު ހުށަހެޅިފައިވާއިރު 2017 ވަނަ އަހަރު ހުށަހެޅިފައި ވަނީ 287 މައްސަލައެކެވެ.

މަކަރާއި ހީލަތުން ފައިސާ ހޯދުމުގެ 523 މައްސަލައެއް 2016 ވަނަ އަހަރު ހުށަހެޅިފައިވާއިރު 2017 ވަނަ އަހަރު ހުށަހެޅިފައިވަނީ 518 މައްސަލައެކެވެ. މީގެ އިތުރުން ތަކެތި ގެއްލިގެން ހުށަހެޅޭ މައްސަލަތަކަށް ބަލާއިރު 2016 ވަނަ އަހަރު 1829 މައްސަލައެއް ހުށަހެޅިފައިވާއިރު 2017 ވަނަ އަހަރު ހުށަހެޅިފައި ވަނީ 1655 މައްސަލައެވެ.

ކުށްތައް ރިޕޯޓްކޮށްފައިވާ މިންވަރު މަދުވެފައިވާ ކަމަށް ރިޕޯޓްތަކުން ދައްކާ އިރު ފާއިތުވި އަހަރު ތަފާތު ހަމަލާތަކުގައި މަރުވެފައިވާ މީހުންގެ އަދަދު ފުލުހުންގެ ރިޕޯޓްގައި ހިމަނާފައެއް ނުވެއެވެ.