ނަޖީބު ރައްޒާޤް ރާއްޖޭގައި ނެންގެވި ފޮޓޯތައް: ރިޓަޔަރ ކުރައްވަން ބޭނުންފުޅުވާކަމުގެ ހެއްކެއް؟!

މެލޭޝިއާގެ ބޮޑުވަޒީރު ނަޖީބު ރައްޒާޤް ދާދިފަހުން ރާއްޖެއަށާއި ސްރީ ލަންކާއަށް ކުރެއްވި ދަތުރުފުޅުގައި ނެންނެގި ފޮޓޯތަކުން ދައްކުވައިދެނީ އެމަނިކުފާނު ސިޔާސީ ކަންކަމުން ރިޓަޔަރކުރައްވަން ބޭނުންފުޅުވެފައިވާކަން ކަމަށް މެލޭޝިއާގެ ބައެއް ނޫސްތަކުން ސުވާލުކޮށްފިއެވެ.

ރާއްޖޭގައި އެމަނިކުފާނު ހުންނެވި ރިޒޯޓުގެ ގޮނޑުދޮށުގައި ނެންގެވި ފޮޓޯއެއްގެ އިތުރުން އިއްޒުއްދީން ފާލަމުގައި ނެންގެވި ފޮޓޯއަކީ ވަރަށް 'ޓޫރިސްޓް' ފޮޓޯތަކެކެވެ.

މިފޮޓޯތަކުގެ އިތުރުން ނަޖީބު ރައްޒާޤްވަނީ އެމަނިކުފާނުގެ އެންމެ ހަގު ކާފަދަރިކަލުންނާއިއެކުވެސް ފޮޓޯއެއް ނަންގަވާ ސޯޝަލް މީޑިއާއަށް ދޫކުރައްވާފައެވެ.

އަދި މީގެ އިތުރުން އޮޅުކޮށްގެން ގެންގުޅުއްވާ ބުޅަލެއްގެ ފޮޓޯވެސް ދާދިފަހުން ޓްވީޓްކުރެއްވިއެވެ.

ބައެއް ފަރާތްތަކުން ވަނީ މިފޮޓޯތަކަށް ސަމާސާ ރާގެއްގައި ފާޑުވެސް ކިޔާފައެވެ. އެގޮތުން ކުރީގެ ބޮޑުވަޒީރު މަހާތީރު މުހައްމަދުގެ އުނދަގުލެއް ދެން ނެތީތޯ ސުވާލު ކޮށްފައިވާއިރު، ދެން އޮންނަ އިންތިޚާބެއްގައި ކާމިޔާބު ލިބިވަޑައިގަންނަވާނެކަމުގެ ޔަޤީންކަން ނަޖީބު ރައްޒާޤަށް ލިބިވަޑައިގަތީތޯވެސް ބައެއް ފަރާތްތަކުން ސުވާލުކޮށްފައިވެއެވެ.

ނިމިގެން މިދިޔަ 2017ވަނަ އަހަރަކީ ނަޖީބަށް އުނދަގޫ އަހަރެކެވެ. އަދި ކުރީގެ ބޮޑުވަޒީރު މަހާތީރު މުހައްމަދާއި ނަޖީބު ރައްޒާޤްއާއިމެދު މައްސަލަ އިތުރަށް ގޯސްވި އަހަރެކެވެ. ވެރިކަންކުރާ އަމްނޯ ޕާޓީގެ އިސް ވެރިޔަކަށް މަހާތީރުގެ ބަހުގެ ހަމަލާއެއް އަމާޒުވެއްޖެނަމަ އެބޭފުޅެއްގެ ސިޔާސީ ކެރިއަރު މީގެ ކުރިން ނިމުނުނަމަވެސް، ނަޖީބު ރައްޒާޤްވަނީ މަހާތީރުގެ ބަހުގެ ހަމަލާތަކުން ސަލާމަތްވެ، އެޕާޓީ ކުރިއަށްވުރެ ހަރުދަނާކުރައްވާފައެވެ.

މިހުރިހާ ކަމަކާއިއެކުވެސް 2018ވަނަ އަހަރާއިވެސް ނަޖީބު ރައްޒާޤް ކުރިމަތިލައްވަނީ ކޮރަޕްޝަންގެ ބޮޑެތި ތުހުމަތުތަކަކާއިއެކުގައެވެ.