ޕްރިމިއާ ލީގުގައި މެންޗެސްޓާ ޔުނައިޓެޑް އަދި ޗެލްސީ ފުރުސަތު ނަގައިލިއިރު، މެންޗެސްޓާ ސިޓީ ލީޑު ފުޅާކޮށްފިއެވެ.

ހޮނިހިރު ދުވަހުގެ ރޭ ޔުނައިޓެޑް ކުޅުނު މެޗުން އެޓީމު އެއްވަރުވީ ލެސްޓާ ސިޓީއާ ވާދަކޮށް 2-2 ގެ ނަތީޖާއަކުންނެވެ.

ލެސްޓާ ދަނޑުގައި ކުޅުނު މިމެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ ޔުނައިޓެޑުންނެވެ. އެގޮތުން އެޓީމުން ވަނީ ލެސްޓާގެ ހާފަށް ބާރުބޮޑުކޮށް ލަނޑުޖެހުމަށް ފުރުސަތުތަކެއް ތަނަވަސްކޮށްފައެވެ.

އެހެން ނަމަވެސް ޔުނައިޓެޑުން ރަނގަޅަށް ކުޅެމުންދަނިކޮށް ލެސްޓާއިން ވަނީ މެޗުގައި ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށް ދިނީ ރިޔާދް މަހްރޭޒްގެ އެހީތެރިކަމާއެކު ޖެމީ ވާޑީއެވެ.

މި ލަނޑާއެކު ޔުނައިޓެޑުން ވަނީ އެޓީމުގެ ކުޅުން އިތުރަށް ވަރުގަދަކޮށް، އެޓޭކްތައް ގިނަކޮށްފައެވެ. އެގޮތުން ފުލުފުލުގައި އެޓީމުންދިޔައީ ލަނޑު ޖެހުމަށް ފުރުސަތު ހޯދަމުންނެވެ.

ފުރަތަމަ ހާފް ނިމުމުގެ ކުރިން ޔުނައިޓެޑަށް ނަތީޖާ ހަމަހަމަކޮށްދިނީ ލިންގާޑްގެ އެހީތެރިކަމާއެކު ހުއާން މަޓާއެވެ. މި ލަނޑާއެކު ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެންވެސް ރަނގަޅަށް ކުޅެމުންދިޔައީ ޔުނައިޓެޑެވެ. އެގޮތުން ލެސްޓާގެ ހާފަށް ބާރުބޮޑުކޮށް އެޓީމުންދިޔައީ ލަނޑު ޖެހުމަށް ފުރުސަތު ހޯދަމުންނެވެ. ޔުނައިޓެޑުން ފުރަތަމަ ފަހަރަށް މެޗުގެ ލީޑު ނެގީ 60 ވަނަ މިނެޓުގައެވެ. މި ލަނޑުވެސް އެޓީމަށް ކާމިޔާބުކޮށްދިނީ މަޓާއެވެ.

ލެސްޓާ އަށް މެޗުގައި އިތުރު ހުރަސްތަކާ ކުރިމަތިވީ 76 ވަނަ މިނެޓުގައި އެޓީމުގެ އަމާޓޭ އަށް ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލުމުންނެވެ. އެހެންނަމަވެސް މެޗުގެ އިތުރުވަގުތުގެ ތެރޭގައި މަގުއެރޭގެ ލަނޑުން ލެސްޓާއިން ވަނީ މެޗުގެ ނަތީޖާ ހަމަހަމަކޮށްފައެވެ.  

މި ނަތީޖާއާއެކު ޔުނައިޓެޑް އޮތީ ކުޅުނު 19 މެޗުން ލިބުނު 42 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. ލެސްޓާ އޮތީ 19 މެޗުން ލިބުނު 27 ޕޮއިންޓާއެކު ޕޮއިންޓް ތާވަލުގެ 8 ވަނައިގައެވެ.

ހޮނިހިރު ދުވަހުގެ ރޭ ޗެލްސީ ކުޅުނު މެޗުން އެޓީމު އެއްވަރުވީ އެވަޓަންއާ ވާދަކޮށް 0-0 ގެ ނަތީޖާއަކުންނެވެ.

އެވަޓަން ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ޗެލްސީންނެވެ. އެގޮތުން އެޓީމުން ވަނީ އެވަޓަންގެ ހާފަށް ބާރުބޮޑުކޮށް ރަނގަޅު ހަމަލާތަކެއް އުފައްދާފައެވެ.

އެހެނަމަވެސް ފުރަތަމަ ހާފްގައި ލީޑު ނެގުމަށް އެޓީމަށް ހުސް ފުރުސަތެއް ތަނަވަސްކުރެވިފައެއް ނުވެއެވެ. ފުރަތަމަ ހާފްގައި އެވަޓަންއިން ވަނީ މޮޅު ޑިފެންސެއް ކުރުމުގެ އިތުރުން ކައުންޓާގައި ޗެލްސީގެ ގޯލަށް ނުރައްކާކުރަން މަސައްކަތްކޮށްފައެވެ.

ދެވަނަ ހާފް ފެށިގެން ޗެލްސީން އެޓީމުގެ އެޓޭކްތައް ވަރުގަދަކުރި ނަމަވެސް ލަނޑު ޖަހަން ހުސް ފުރުސަތެއް އެޓީމަށް ތަނަވަސްކުރެވިފައެއް ނުވެއެވެ. ފުރަތަމަ ހާފެކޭ އެއްގޮތަށް ދެވަނަ ހާފްގައިވެސް އެވަޓަން އިން ވަނީ މޮޅު ޑިފެންސެއްކޮށްފައެވެ.

މި ނަތީޖާއާއެކު ޗެލްސީ އޮތީ ކުޅުނު 19 މެޗުން ލިބުނު 39 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. އެވަޓަން އޮތީ ކުޅުނު 19 މެޗުން ލިބުނު 26 ޕޮއިންޓާއެކު ޕޮއިންޓް ތާވަލުގެ ނުވަ ވަނައިގައެވެ.

ޕޮއިންޓް ތާވަލުގައި ސިޓީން ލީޑު ފުޅާކުރީ ހޮނިހިރު ދުވަހުގެ ރޭ އޭއެފްސީ ބޯންމައުތްއާ ދެކޮޅަށް ކުޅުނު މެޗު 0-4 ގެ ނަތީޖާއަކުން ކާމިޔާބުކޮށްގެންނެވެ.

ސިޓީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އެޓީމުންނެވެ. އެގޮތުން އެޓީމުން ވަނީ މެޗުގެ 27 ވަނަ މިނެޓުގައި ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ސާޖިއޯ އަގުއެރޯއެވެ.

މި ލަނޑަށްފަހުވެސް ސިޓީން ވަނީ ބޯންމައުތްގެ ގޯލަށް ނުރައްކާކޮށް ގިނަ ހަމަލާތައް ފޮނުވާލާފައެވެ. އެހެންނަމަވެސް ފުރަތަމަ ހާފް ނިމުނީ ސިޓީއަށް އިތުރު ލަނޑެއް ކާމިޔާބުނުކުރެވި، 0-1 ގެ ނަތިޖާއިން ބޯންމައުތްގެ މައްޗަށް އެޓީމު ކުރީގައި އޮވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ސިޓީގެ ރަހީމް ސްޓާލިން ވަނީ އެޓީމަށް ލީޑުފުޅާކޮށްދީފައެވެ. މި ލަނޑަށްފަހުވެސް ސިޓީން ދިޔައީ މޮޅު ކުޅުމެއް ދައްކަމުންނެވެ.

އެގޮތުން 79 ވަނަ މިނެޓުގައި އެޓީމުގެ ތިން ވަނަ ލަނޑު އަގުއެރޯ ކާމިޔާބުކުރިއިރު، 85 ވަނަ މިނެޓުގައި އެޓީމުގެ ހަތަރު ވަނަ ލަނޑު ކާމިޔާބުކޮށްދިނީ ޑެނީލޯއެވެ.

މި ނަތީޖާއާއެކު ސިޓީ ވަނީ ކުޅުނު 19 މެޗުން 55 ޕޮއިންޓް ހަމަކޮށް ޕޮއިންޓް ތާވަލުގެ އެއްވަނައިގައި 13 ޕޮއިންޓްގެ ލީޑެއް ނަގާފައެވެ. މެޗުން ބަލިވި ބޯންމައުތް އޮތީ ކުޅުނު 19 މެޗުން ލިބުނު 16 ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ.