ފަސް ލައްކަ ރުފިޔާގެ ޖޫރިމަނާގެ މައްސަލަ މިއަދު ސިވިލް ކޯޓުގައި
މައްސަލައިގެ އަޑު އެހުން އޮންނާނީ މެންދުރުފަހު 1:45ގައި
އަބުރުފުޅު ފަންޑަށް މެމްބަރު މުސްތަފާ ފައިސާގެ އެހީއެއް ވެދެއްވަނީ
ރާއްޖެޓީވީ ފަސްލައްކަ ރުފިޔާއިން ޖޫރިމަނާ ކުރި މައްސަލައިގެ އަޑުއެހުމެއް މިއަދު ސިވިލް ކޯޓުގައި އޮންނާނެއެވެ.
ރާއްޖެ ޓީވީގެ 'މިރައީސް' ޕްރޮގްރާމްގައި މިއަހަރުގެ ޖުލައި މަހުގެ 28ވަނަ ދުވަހުގެ ރޭ ތިމަރަފުށީ ދާއިރާގެ މެމްބަރު މުހައްމަދު މުސްތަފާ ދެއްކެވި ވާހަކައަކާއި ގުޅިގެން ބްރޯޑްކާސްޓިން ކޮމިޝަނުން ރާއްޖެ ޓީވީ ފަސް ލައްކަ ރުފިޔާއިން ޖޫރިމަނާކުރި މައްސަލައިގައި ރާއްޖެ ޓީވީއިން ސިވިލް ކޯޓަށް ހުށަހެޅި މިމައްސަލަ މިހާރު އޮތީ ޑިސްޕިއުޓް ރިޒޮލިއުޝަން މަރުހަލާގައެވެ.
ޑިސްޕިއުޓް ރިޒޮލިއުޝަން މަރުހަލާއަކީ ދެފަރާތުގެ މެދުގައި މަޝްވަރާކޮށްގެން މައްސަލައަށް ހައްލެއް ހޯދޭތޯ ބަލާ މަރުހަލާ އެވެ. މައްސަލަ ޝަރީއަތަށް ފޮނުވާނީ އެ މަރުހަލާއިން ހައްލެއް ނުލިބިއްޖެނަމަ އެވެ.
މިމައްސަލައިގެ އަޑު އެހުން އޮންނާނީ މެންދުރުފަހު 1:45ގައެވެ.
ޖޫރިމަނާކުރި މައްސަލައިގައި ބްރޯޑްކާސްޓިންގ ކޮމިޝަނުގެ މައްޗަށް ރާއްޖެޓީވީން ދައުވާކުރާ މައްސަލައިގައި ޑިސްޕިއުޓް ރިޒޮލިއުޝަންގެ ފުރަތަމަ ބައްދަލުވުން ބޭއްވީ މިމަހުގެ 12 ވަނަ ދުވަހުއެވެ. އެ ބައްދަލުވުމުގައި ދައުލަތުން އެދުނީ، ޖަވާބުދާރީވާން ތައްޔާރުވުމަށް ހަފްތާއެއްހާ ދުވަހުގެ މުއްދަތެއް ދިނުމަށެވެ.
ރާއްޖެޓީވީ ޖޫރިމަނާކުރީ، ރާއްޖޭގެ ރައްޔިތުން ނިކުމެ ރައީސުލްޖުމްހޫރިއްޔާ މަގާމުން ބޭރުކުރުމަށް ގޮވައިލައްވައި، މެންބަރު މުސްތަފާ ދައްކަވާފައިވާ ވާހަކައަކީ ރާއްޖޭގައި އޮތް ގާނޫނީ ސަރުކާރެއް ވައްޓާލުމަށާއި، ޣައިރު ގާނޫނީ އަމަލެއް ހިންގުމަށް ރައްޔިތުންނަށް ހިތްވަރު ލިބޭ ގޮތަށް ދައްކަވާފައިވާ ވާހަކައެއް ކަމަށް ބުނެއެވެ.
5 ލައްކަ ރުފިޔާގެ ޖޫރިމަނާގެ އިތުރުން އޭގެ ކުރިން 1 މިލިއަން ރުފިޔާއާއި 2 ލައްކަ ރުފިޔާއިން ރާއްޖެ ޓީވީ ޖޫރިމަނާކުރި މައްސަލަވެސް ރާއްޖެ ޓީވީއިން ވަނީ ކޯޓަށް ހުށަހަޅާފައެވެ.
މިހާރު އަމަލުކުރަމުން އަންނަ އަބުރާއި ބެހޭ ޤާނޫނުގައިވާ ގޮތުން ބްރޯޑްކާސްޓިން ކޮމިޝަނުން މީޑިއާއެއް ޖޫރިމަނާކޮށްފިނަމަ އެމައްސަލަ އިސްތިއުނާފްކުރުމަށް ކޯޓަށް ހުށަހެޅޭނީ ޖޫރިމަނާ ދެއްކުމަށްފަހުއެވެ. ޚިޔާލު ފާޅުކުރުމުގެ ހައްޤު ވަރަށް ބޮޑަށް ހަނިކޮށްފައިވާ މި ޤާނޫނާއި ގުޅޭ ގޮތުން ފާޑުކިޔަމުން ގިނަ ފަރާތްތަކުން ފާހަގަކުރާ ގޮތުގައި މި ޤާނޫން ފާސްކޮށްފައިވަނީ ސީދާ ރާއްޖެ ޓީވީއަށް އަމާޒުކޮށްގެން، މިނިވަން ނޫސްވެރިކަމެއް ކުރުމަށް ރާއްޖެ ޓީވީއިން ކުރަމުންދާ މަސައްކަތަށް ހުރަސްއެޅުމަށެވެ.
ބްރޯޑްކާސްޓިން ކޮމިޝަނުން ރާއްޖެ ޓީވީ ޖޫރިމަނާކުރާ ކޮންމެ ފަހަރަކު ޖޫރިމަނާ ދައްކަން ޖެހޭ މުއްދަތުގައި، ބެލުންތެރިންނާއި ހެޔޮ އެދޭ ފަރާތްތަކުގެ އެހީތެރިކަމާއި އެކު ރާއްޖެ ޓީވީއިން ގެންދަނީ ޖޫރިމަނާ ދައްކަމުންނެވެ.
