ދެވަންސޫރަ އަންނަ ފެބްރުއަރީ 6 ގައި
18 ޑިސެމްބަރު 2017 | ހޯމަ 07:30މިއީ މީހެއްގެ މަރެއްގެ ތަހުގީގު ހޯދުމަށް އަންހެނަކު ކުރާ މަސައްކަތް ދައްކުވައިދޭ ފިލްމެއް
ދެވަންސޫރައިގެ ޕޯސްޓަރ
ދިވެހި ފިލްމު ދެވަންސޫރައިގެ އެންމެ ފަހުގެ ޝޫޓިން މިހާރު ނިމިފައިވާ ކަމަށާއި އަންނަ ފެބްރުއަރީ މަހުގައި އެ ފިލްމު ސިނަމާތަކަށް އަންނާނެ ކަމަށް ފިލްމުގެ ޑައިރެކްޓަރ ޔޫސުފް ޝަފީއު (ޔޫއްޕެ) ބުނެފިއެވެ.
ދެވަންސޫރައިގެ ސްކްރީން ޕްލޭވެސް ލިޔެފައިވަނީ ޔޫއްޕެއެވެ. ޔޫއްޕެ ރާއްޖެއެމްވީ އަށް ބުނީ ފިލްމު ކަނޑައެޅިފައިވާ ދުވަހަށް އެޅުވުމަށް އެންމެ ފަހުގެ ތައްޔާރީތައް މިހާރު ވަމުން ދާކަމަށެވެ. ދެވަންސޫރަ އަކީ ޔޫއްޕެ ޕްރޮޑަކްޝަން، ސްޓޫޑިއޯ ގްރީން، އެޕެކްސް ޕިކްޗާސް، ބްލެކް މީޑިއާ އިންކް، ޝައި ޕްރޮޑަކްޝަން، އެންވިޝަން އެންޓަޓެއިންމަންޓް އަދި މައި ޑްރީމް އެންޓަޓެއިންމަންޓް ގުޅިގެން ގެނެސްދޭ ފިލްމެކެވެ. މި ފިލްމުން ފެނިގެންދާ ތަރިންގެ ތެރޭގައި ޔޫސުފް ޝަފީއު(ޔޫއްޕެ)، އަލީ އާޒިމް (ދޮން އައްޔަ)، ފާތުމަތު އާޒިފާ (އަޒޫ)، އަހުމަދު ސައީދު، ފައިސަލް، ނާޝިދާ މުހައްމަދު(ނާއްކޮ)، އަހުމަދު އީސަ (އާނަންދު)، ޖާދުﷲ ގެ ޖާދުﷲ އިސްމާއީލް (ޖާދު)، މަރިޔަމް ޝަކީލާ އަދި މަރިޔަމް ހަލީމްގެ އިތުރުން އަލަށް ތައާރަފްވާ ޝިފާއެވެ. ޝިފާ އަކީ މި ފިލްމުގެ ލީޑު ރޯލުން ފެނިގެންދާ ތަރިއެކެވެ.
މި ފިލްމަކީ މިހާރު ރާއްޖޭގެ މުޖުތަމައުގައި ހިނގާ ކަންތައްތައް ދައްކުވައިދޭ، މީހެއްގެ މަރެއްގެ ހަގީގަތް ހޯދުމަށް އަންހެނަކު ކުރާ މަސައްކަތް ދައްކުވައިދޭ ފިލްމެކެވެ.
މާލެ، ވިލިމާލެ އަދި ހުޅުމާލޭގައި މަންޒަރުތައް ނަގާފައިވާ މި ފިލްމުގެ ޓްރެއިލާ މިހާރު ވަނީ ލޯންޗުކޮށްފައެވެ. ދެވަންސޫރައަކީ ޔޫއްޕެ ޕްރޮޑަކްޝަނުން ގެނެސްދޭ 25 ވަނަ ފިލްމެވެ. އަދި އެއީ އޭނާގެ 30 ވަނަ ޑައިރެކްޝަނެވެ.
