ރާއްޖެޓީވީ ނައިޓްގައި ބައިވެރިވުމަށް އަންކިތާ މާލެ އައިސްފި
ރާއްޖެ ޓީވީ ނައިޓްގެ ނަމުގައި ހުކުރު ދުވަހުގެ ރޭ ބާއްވާ ޝޯގައި އަންކިތާ ލޮކާންޑޭ ޕާފޯމް ކުރާނެ
އަންކިތާ ލޮކާންޑޭ
ހުކުރު ދުވަހުގެ ރޭ ޣިޔާސުއްދީން އިންޓަނޭޝަނަލް ސްކޫލްގައި އޮންނަ ރާއްޖެޓީވީ ނައިޓްގައި ބައިވެރިވުމަށް ބޮލީވުޑްގެ ތަރި އަންކިތާ ލޮކާންޑޭ މާލެ އައިސްފިއެވެ.
ރާއްޖެ ޓީވީ ނައިޓްގެ ނަމުގައި ޑިސެމްބަރު މަހުގެ 15 ވަނަ ދުވަހު ބާއްވާ ޝޯގައި އަންކިތާ ލޮކާންޑޭ ޕާފޯމް ކުރާނެއެވެ.
އަންކިތާ ލޮކާންޑޭއަކީ ޒީ ޓީވީން 2009 ވަނަ އަހަރު ގެނެސްދިން މަޝްހޫރު ޑްރާމާ ސީރީޒް "ޕަވިތުރާ ރިޝްތާ"އިން މަޝްހޫރުވި ބަތަލާއެކެވެ.
އަންކިތާ ވަނީ ސެލެބްރިޓީ ޑާންސް ޝޯއެއް ކަމަށްވާ "ޖަލަކް ދިކްލާޖާ"ގައި ވެސް ބައިވެރިވެ ޕާފޯމް ކޮށްފައެވެ.
މީގެ އިތުރުން ހިންދީ ސީރީޒް "އޭކް ތީ ނާއިކާ" އިން ވެސް އޭނާ ވަނީ ފެނިގެން ގޮސްފައެވެ. އަންކިތާ ލޮކާންޑޭއަށް ވަނީ "ޕަވިތުރާ ރިޝްތާ" އިން އެވޯޑްތަކެއް ވެސް ލިބިފައެވެ. އޭގެ ތެރޭގައި 2010 ވަނަ އަހަރު "އިންޑިއަން ޓެލެވިޝަން އެކަޑަމީ އެވޯޑް"، "ފޯތު ބޮރޯ ޕްލަސް ގޯލްޑް އެވޯޑްސް: ބެސްޓް އެކްޓްރެސް އިން ލީޑް ރޯލް"(2011)، "އިންޑިއަން ޓެލީ އެވޯޑްސް" (2012)، އަދި 2014 ވަނަ އަހަރު "ސްޓާ ގިލްޑް އެވޯޑްސް: ބެސްޓް އެކްޓްރެސް އިން ޑްރާމާ ސީރީޒް" ލިބިފައިވެއެވެ.
އަންކިތާ ލޮކާންޑޭގެ ފުރަތަމަ ބޮލީވޫޑް ފިލްމަކީ އަންނަ އަހަރު ނެރުމަށް ހަމަޖެހިފައިވާ "މަނީކަރްނިކާ: ދަ ކުއީން އޮފް ޖާންސީ" އެވެ. ކަންގަނާ ރެނައުޓް ލީޑްރޯލުން ފެނިގެންދާ މި ފިލްމު ސިނަމާތަކަށް އަންނާނީ އަންނަ އަހަރުގެ އެޕްރީލް މަހުގެ 28 ގައެވެ.
