ކުވެއިތުގައި ބާއްވާ ގަލްފް ކޯޕަރޭޝަން ކައުންސިލްގެ މައި ސަމިޓުގައި ޤަތަރުގެ އަމީރު ޝެއިޚް ތަމީމް ބިން ހަމަދު އަލް ޘާނީ ބައިވެރިވެވަޑައިގަންނަވާނެ ކަމަށް ޤަތަރުގެ ޚާރިޖީ ވަޒީރު ވިދާޅުވެއްޖެއެވެ.

ޝެއިޚް މުހައްމަދު ބިން އަބްދުއްރަހްމާން އަލް ޘާނީ އާދީއްތަ ދުވަހު ވިދާޅުވީ ދެ ދުވަހުގެ މުއްދަތަށް ކުވެއިތުގެ ވެރިރަށް ކުވައިތު ސިޓީގައި ބާއްވާ ސަމިޓަށް  ޤަތަރުގެ ލީޑަރަށް ދައުވަތު ފޮނުއްވާފައިވާކަމަށެވެ.

މި ފަހަރުގެ ސަމިޓް މި ބޭއްވެނީ ސައުދީ އަރަބިއްޔާއާއި، ޔޫއޭއީއާއި މިސްރުން ޤަތަރާއި ގުޅުންކަނޑާލައި އެ ގައުމަށް ދަތިކުރުމުގެ ފިޔަވަޅު އެޅިތާ ހަ މަސް ފުރޭ ދުވަހުއެވެ.

"އަޅުގަނޑު މާދަން ބައިވެރިވާނަން މިނިސްޓީރިއަލް ކައުންސިލްގައި، އަދި އަމީރް ވަޑައިގަންނަވާނެ ސަމިޓަށް" ވެރިރަށް ދޯހާގައި ބޭއްވި ފޯރަމެއްގައި ޝެއިޚް މުހައްމަދު ބިން އަބްދުއްރަހްމާން އަލް ޘާނީ މީޑިއާތަކަށް ވިދާޅުވެފައިވެއެވެ.

" ޖީސީސީގެ ނިޒާމް ދިރިއޮތުމަކީ މުހިއްމުކަމެއް"

ކުވެއިތުން މިދިޔަ ހަފްތާގައިވަނީ ޖީސީސީގައި ހިމެނޭ ހަ ގައުމަށް ސަމިޓްގައި ބައިވެރިވުމުގެ ދައުވަތު ފޮނުވާފައެވެ. ނަމަވެސް ހުރިހާ ގައުމެއްގެ ލީޑަރުން ބައިވެރިވެރިވެ ވަޑައިގަންނަވާނެކަން ސާފެއް ނުވެއެވެ.

ޖީސީސީއަކީ އެރޭބިއަން ޕެނިންސިއުލާގައި، ބަހްރެއިނާއި، ކުވެއިތާއި، އޮމާނާއި، ގަތަރާއި، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް ހިމެނޭގޮތުން އުފައްދާފައިވާ ސިޔާސީ އަދި އިގްތިސާދީ އިއްތިހާދެކެވެ.

ސައުދީ އަރަބިއްޔާއާއި ޔޫއޭއީއާއި ބަހުރެއިނާ މިސްރުން، ޖޫންމަހުގެ 5ވަނަ ދުވަހު ގަތަރާ ގުޅުންކަނޑާލައި، ދަތިކުރުމުގެ ފިޔަވަޅު އެޅުމާއި ގުޅިގެން ސަމިޓް ބާއްވަފާނެ ކަމާއިމެދު ވަނީ ސުވާލު އުފެދިފައެވެ.

އެ ތިން ގައުމުންވަނީ ޤަތަރުން ޓެރެރިޒަމަށް ފަންޑުކުރާކަމަށް ތުހުމަތުކޮށްފައެވެ. ގަތަރުން ދަނީ އެ ތުހުމަތުތައް ދޮގުކުރަމުންނެވެ.

ކުވެއިތުންވަނީ މައްސަލައަށް ހައްލެއް ހޯދުމަށް މައްސަލަ ފެށުނު ވަގުތުން ފެށިގެން މެދުވެރިއެއްގެ ދައުރު އަދާކުރަން ފަށާފައެވެ.

ޤަތަރުން ބައިވެރިވާނަމަ ސަމިޓް ބޮއިކޮޓްކުރާނެކަމަށް ބަހްރެއިނުން މިދިޔަމަހުވަނީ އިންޒާރު ދީފައެވެ.