އުތުރު ކޮރެއާ އިން އަނެއްކާވެސް ބެލިސްޓިކް މިސައިލެއް އުދުއްސާލަން އުޅޭ ކަމުގެ ރޭޑިއޯ ސިގްނަލްތަކެއް ލިބިފައިވާ ކަމަށް ޖަޕާނުން ބުނެފިއެވެ.
އުތުރު ކޮރެއާ އިން ދޭތެރެދޭތެރެއިން މިސައިލްތައް އުދުއްސަމުން ގެންދާއިރު، މިދިޔަ ސެޕްޓެމްބަރު މަހުން ފެށިގެން ވަނީ މިސައިލްތައް އުދުއްސުން މަޑު ޖައްސާލާފައެވެ.
އެންމެ ފަހުން އުތުރު ކޮރެއާ އިން އުދުއްސާލީ ޖަޕާނުގެ ހޮކައިޑޫ މަތިން އުދުއްސާލި ރޮކެޓެކެވެ.
އުތުރު ކޮރެއާ އިން އަނެއްކާ ވެސް ބެލިސްޓިކް މިސައިލެއް އުދުއްސާލަން އުޅޭ ކަމުގެ ރޭޑިއޯ ސިގްނަލްތަކެއް ލިބިފައިވާ ކަމަށް ޖަޕާނުން ބުނެފައިވާއިރު އެކަމާ ބެހޭގޮތުން ޖަޕާނުގެ އޮފިޝަލުން ރޮއިޓާސް އަށް ބުނެފައި ވަނީ "ލިބިފައިވާ ސިގްނަލްތަކުން އަވަހަށް މިސައިލެއް އުދުއްސާލަން އުޅޭ ކަމަށް އަދި ނުނިންމޭނެ ކަމަށެވެ."
ޖަޕާނުގެ ކިއޯޑޯ ނިއުސް އެޖެންސީ އިން ހޯމަ ދުވަހު ރިޕޯޓުކޮށްފައި ވަނީ ރޭޑިއޯ ސިގްނަލްތަކެއް ލިބުމާ ގުޅިގެން ޖަޕާނުގެ ސަރުކާރުން ވަނީ ހައި އެލާޓުގައި ކަމަށާއި އުތުރު ކޮރެއާ އިން މަދު ދުވަސްކޮޅެއްގެ ތެރޭގައި މިސައިލެއް އުދުއްސާލަފާނެ ކަމަށް ބެެެލެވޭ ކަމަށެވެ.
ބައިނަލްއަގްވާމީ ދުނިޔެއިން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި، މިސައިލް ޓެސްޓްތައް ކުރުން ހުއްޓާލުމަށް ތަކުރާރުކޮށް އުތުރު ކޮރެއާއަށް އަންގަމުންނެވެ. ނަމަވެސް އާދައިގެމަތިން އުތުރު ކޮރެއާއިން ދަނީ ބައިނަލްއަގްވާމީ ދުނިޔެއަށް ބީރުކަންފަތެއް ދެމުންނެވެ.
