ޔުނިޓީ ކަޕް 2017: އަލިފުށި ފުޓްސަލް ޓީމު އަދި މަޑަވެލި ރަޓު ޓީމު ފައިނަލަށް

އަތުރަ ސްޕޯޓްސް އިން އިންތިޒާމުކޮށްގެން ބާއްވާ ޔުނިޓީ ކަޕްގެ ފައިނަލުން އަލިފުށި ފުޓްސަލް ޓީމު އަދި މަޑަވެލި ރަޓު ޓީމު ޖާގަ ހޯދައިފިއެވެ.

އާދީއްތަ ދުވަހުގެ ރޭ ކުޅުނު ސެމީފައިނަލް މެޗު މަޑަވެލި ރަޓު ޓީމުން ކާމިޔާބުކުރީ ޓީމް ތިނަދޫއާ ވާދަކޮށް 1-3 ގެ ނަތީޖާއަކުންނެވެ.

މެޗުގައި މަޑަވެލި ރަޓު ޓީމުގެ ލަނޑުތައް ކާމިޔާބުކޮށްދިނީ ނަސީފް ހަސަން، ޒައްމަތު މުހައްމަދު އަދި އަހުމަދު މިންހާޖުއެވެ. ޓީމް ތިނަދޫ އިން ކާމިޔާބުކުރި ހަމައެކަނި ލަނޑު ޖަހައިދިނީ އިބްރާހިމް ޝަނޫންއެވެ. މެޗުގެ މޮޅު ކުޅުންތެރިޔަކަށް ހޮވުނީ މަޑަވެލި ރަޓު ޓީމުގެ ނާއިފް ޝަފީގެވެ.

އާދީއްތަ ދުވަހުގެ ރޭ ކުޅުނު ސެމީފައިނަލް މެޗު އަލިފުށި ޓީމުން ކާމިޔާބުކުރީ ނޮޅިވަރަންފަރު ޔޫތް ޑިވެލޮޕްމެންޓާ ވާދަކޮށް 0-3 ގެ ނަތީޖާއަކުންނެވެ.

މެޗުގައި އަލިފުށި ޓީމުގެ ލަނޑުތައް ކާމިޔާބުކޮށްދިނީ އަހުމަދު ވިޖުދާން، އިބްރާހިމް ފުރުގާން އަދި އަބްދުލް މުހައިމިންއެވެ. މެޗުގެ މޮޅު ކުޅުންތެރިޔަކަށް ހޮވުނީ އަލިފުށި ޓީމުގެ އިބްރާހިމް ފުރުގާންއެވެ.

މުބާރާތުގެ ފައިނަލް މެޗު ކުޅޭނީ އަންގާރަ ދުވަހުއެވެ. ފައިނަލްގައި ބައްދަލުކުރާނީ އަލިފުށި އަދި މަޑަވެލި ރަޓު ޓީމެވެ.

މުޅި ރާއްޖެއަށް ހުޅުވާލައިގެން ކުރިޔަށްގެންދާ މި މުބާރާތުގެ ޗެމްޕިއަން ޓީމަށް 20،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، ރަނަރަޕްއަށް ދިނުމަށް ހަމަޖެހިފައިވަނީ 10،000 ރުފިޔާގެ ފައިސާގެ އިނާމެކެވެ.