މިފަހަރު ޗެމްޕިއަންސް ލީގުގެ ފެވަރިޓުންނަކީ ސިޓީ އަދި ޕީއެސްޖީ: މެސީ

މިފަހަރު ޔުއެފާ ޗެމްޕިއަންސް ލީގުގެ ފެވަރިޓުންނަކީ މެންޗެސްޓާ ސިޓީ އަދި ޕެރިސް ސެއިންޓް ޖާމެއިން (ޕީއެސްޖީ) ކަމަށް ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ ބުނެފިއެވެ.

މަޝްހޫރު ކުޅިވަރު ނޫހެއްކަމަށްވާ "މާސާ" އަށް ދިން އިންޓަވިއުއެއްގައި މެސީ ބުނީ މިފަހަރު ޗެމްޕިއަންސް ލީގުގައި ފެވަރިޓުންނަކީ ސިޓީ އަދި ޕީއެސްޖީ ކަމަށާއި، އެ ދެ ޓީމުވެސް ފެންނަނީ ވަރަށް ވަރުގަދަކޮށް ކަމަށެވެ.

މެސީ ބުނީ ކުޅުމަށް ބަލާއިރު ސިޓީ އަދި ޕީއެސްޖީން މިހާތަނަށް މުބާރާތުގައި ފެވަރިޓުންނަކީ އެ ދެ ކްލަބުކަން ދައްކާފައިވާ ކަމަށެވެ. އެހެންނަމަވެސް އޭނާ ބުނީ މުބާރާތުގެ ބޮޑު ބައި އަދި އޮތީ ކުރިޔަށް ކަމަށާއި، އެއްވެސް ކްލަބަކަށް ފަސޭހަނުވާނެކަމަށެވެ.

ރެއާލް މެޑްރިޑާ ބެހޭގޮތުން ވާހަކަދައްކަމުން މެސީ ބުނީ މި ސީޒަނުގައި އެ ކްލަބުން ހޯދާ ނަތީޖާއަކީ އެއްވެސް ބަޔަކު އުންމީދުކުރި ނަތީޖާތަކެއް ނޫން ކަމަށާއި، އެހެންނަމަވެސް އެޓީމަކީ އަބަދުވެސް ސީޒަންގެ ފަހުކޮޅު ހުރިހާ ކަމެއް ހާސިލްކުރަން މަސައްކަތްކުރާ ކްލަބެއް ކަމަށެވެ. އެގޮތުން މިފަހަރުވެސް ސީޒަންގެ ފަހުކޮޅު ރަނގަޅު ނަތީޖާތައް ހޯދުމަށް އެޓީމުން މަސައްކަތްކުރާނެ ކަމަށްވެސް މެސީ ވަނީ ބުނެފައެވެ.

މީގެއިތުރުން މެސީ ބުނީ ބަޔާން އަކީވެސް ރެއާލްއަކާ އެއްފަދައިން ކޮންމެ ސީޒަނެއްގައިވެސް ފަހުވަގުތު ފޯމަށް އެޅި ކަންތައްތައް ހާސިލްކުރާ ކްލަބެއް ކަމަށެވެ.

އެހެންނަމަވެސް މެސީ ބުނީ މިވަގުތު ގަބޫލުކުރަން ޖެހޭ ހަގީގަތަކީ އެންމެ ރަނގަޅު ފޯމެއްގައި އޮތް ދެ ކްލަބަކީ ސިޓީ އަދި ޕީއެސްޖީ ކަމަށާއި، އެ ދެ ކްލަބުން ރަނގަޅު ނަތީޖާތަކެއް ހޯދަމުން އަންނަ ކަމަށެވެ.

މި ސީޒަނުގައި ބާސާވެސް އަންނަނީ މޮޅު ކުޅުމެއް ދައްކަމުންނެވެ. މި ސީޒަނުގައި އެޓީމު 12 މެޗު ކުޅެފައިވާއިރު، އެއްވެސް މެޗަކުން ބަލިވެފައެއްނުވެއެވެ. އޭގެ ތެރެއިން 11 މެޗު އެޓީމުން ކާމިޔާބުކުރިއިރު، އެއް މެޗުން ވަނީ އެއްވަރުވެފައެވެ. ބާސާ އޮތީ ހަތަރު ޕޮއިންޓްގެ ލީޑަކާއެކު ޕޮއިންޓް ތާވަލުގެ އެއްވަނައިގައެވެ.

ޗެމްޕިއަންސް ލީގުގައި ބާސާ ވަނީ ފަސް މެޗު ކުޅެފައެވެ. އޭގެތެރެއިން ތިން މެޗު އެޓީމުން ކާމިޔާބުކުރިއިރު، ދެ މެޗުން ވަނީ އެއްވަރުވެފައެވެ. ގްރޫޕް ސްޓޭޖުގައި ބާސާ އަށް އެއް މެޗު ބާކީ އޮތް އިރު، އެޓީމު ވަނީ ގަދަ 16 އަށް ދަތުރުކޮށްފައެވެ.