އީކުއޭޓާ އައްޑޫ ސިޓީ އިންޓަނޭޝަނަލް މެރަތަން އަންނަ އަހަރަށް ފަސްކޮށްފި

އީކުއޭޓާ އައްޑޫ ސިޓީ އިންޓަނޭޝަނަލް މެރަތަން އަންނަ އަހަރަށް ފަސްކޮށްފިއެވެ.

ރަނާސް މޯލްޑިވްސް އާއި ނަސީރު ސްޕޯޓްސް އެކަޑަމީއާ ގުޅިގެން ބާއްވާ މި މެރަތަން ފަސްކޮށްފައި ވަނީ، މެރަތަންގައި ވާދަކުރުމަށް ބޭރުން އަންނަ އެތްލީޓުންގެ ވިސާ ހަމަނުޖެހުމުގެ އިތުރުން އެހެނިހެން ބައެއް ކަންތައްތައް ހަމަނުޖެހިގެން ކަމަށް މައުލޫމާތު ލިބެއެވެ.

މި މެރަތަންގައި ރާއްޖޭގެ އިތުރުން ދުނިޔޭގެ އެކި ކަންކޮޅުތަކުން އެތްލީޓުން ބައިވެރިވާއިރު، މިހާރު މެރަތަން ބޭއްވުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހުގެ ދެވަނަ ދުވަހެވެ. އެގޮތުން މެރަތަންގައި ވާދަކުރުމުގެ ފުރުސަތު މިހާރު ވަނީ އިތުރުކޮށްފައެވެ.

ރާއްޖެއެމްވީއަށް މައުލޫމާތު ދެމުން ރަނާސް މޯލްޑިވްސްގެ ރައީސް ނަސީރު އިސްމާއިލް ވިދާޅުވީ، މެރަތަންގައި ވާދަކުރުމަށް ގިނަ އެތްލީޓުން ރާއްޖެ އަންނާނެ ކަމަށާއި، މެރަތަންގެ ސަބަބުން ރާއްޖެ އިތުރަށް ޕްރޮމޯޓްވެ، އައްޑޫ ސިޓީއަށް ވެސް ފައިދާތަކެއް ވެގެންދާނެ ކަމަށެވެ.

މި މެރަތަންގައި ޖުމްލަ ހަތް ކެޓަގަރީ ހިމެނޭއިރު، ވަނަވަނައަށްދާ ފަރާތްތަކަށް ފައިސާގެ ބޮޑެތި އިނާމުތައް ވަނީ ހުށަހަޅާފައެވެ.

އެގޮތުން އެންމެ ބޮޑު ފައިސާގެ އިނާމެއް ހުށަހަޅާފައި ވަނީ މެރަތަންއޯޕަން ކެޓަގަރީގެ ވަނަތަކަށެވެ. މެރަންގެ އެއްވަނަ އަށް 5،000 ޑޮލަރު ހުށަހަޅާފައިވާއިރު، ދެވަނަ ފަރާތަކަށް 3،000 ޑޮލަރު ވަނީ ހުށަހަޅާފައެވެ. ތިންވަނަ އަށްދާ ފަރާތަށް 2،000 ޑޮލަރު ހުށަހަޅާފައިވާއިރު، ހަތަރުވަނަ އަށްދާ ފަރާތަށް 500 ޑޮލަރު ވަނީ ހުށަހަޅާފައެވެ. އަދި ފަސްވަނަ އަށް ދާފަރާތަކަށް 250 ޑޮލަރު ވަނީ ހުށަހަޅާފައެވެ.