ޖާބިރުގެ ޕާސްޕޯޓް ކެންސަލް ކުރި މައްސަލަ ކޯޓުން ބޭރުކޮށްލައިފި

މަޝްހޫރު ވިޔަފާރިވެރިޔާ އަބްދުﷲ ޖާބިރުގެ ޕާސްޕޯޓް ކެންސަލް ކުރި މައްސަލައިގައި އޭނާގެ ފަރާތުން ސިވިލް ކޯޓަށް ހުށަހެޅި މައްސަލަ ކޯޓުން ބޭރުކޮށްލައިފި އެވެ.

ޕާސްޕޯޓް ކެންސަލް ކުރި މައްސަލައިގައި ޖާބިރު ދައުވާކުރެއްވީ މޯލްޑިވްސް އިމިގްރޭޝަނާއި ދެކޮޅަށެވެ. މިދިޔަ ހަފުތާގެ ތެރޭގައި އެ މައްސަލަ ސިވިލް ކޯޓުން ބޭރުކޮށްލީ، ޖާބިރުގެ ފަރާތުން ކޯޓަށް ހާޒިރުވާންޖެހޭ ފަރާތް ކޯޓަށް ހާޒިރުނުވުމުންނެވެ.

ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ކަން ވެސް ކުރެއްވި ޖާބިރުގެ ޕާސްޕޯޓް ހިފަހެއްޓިކަން އޭނާއަށް އެނގިވަޑައިގަތީ އިޓަލީގައި ހުންނެވުމަށް ފަހު އިނގިރޭސިވިލާތަށް އެތެރެވެވަޑައިގަންނަވަން އުޅުއްވަނިކޮށް ޖޫން މަހުގެ ތެރޭގައެވެ.

ޕާސްޕޯޓް ކެންސަލް ކޮށްފައި އޮތުމުން ލަންޑަންގެ ގެޓްވިކް އެއާޕޯޓުގައި ޖާބިރު ބަންދުކުރި އެވެ. ނަމަވެސް، ބަންދު ކުރިތާ 15 ގަޑިއިރު ފަހުން މިނިވަންވެ، އެގައުމަށް ޖާބިރު އެތެރެވެވަޑައިގެންނެވި އެވެ.

ޖާބިރު ވިދާޅުވެފައިވާ ގޮތުގައި ލަންޑަނަށް ވަޑައިގަތުމަށް އިޓަލީއިން ފުރާވަޑައިގެންނެވިއިރު ވެސް ޕާސްޕޯޓް ކެންސަލް ކޮށްފައި ނުވެ އެވެ. ނަމަވެސް ދެ ގަޑިއިރެއްހާއިރުގެ ދަތުރަކަށް ފަހު ލަންޑަންގެ ގެޓްވިކް އެއާޕޯޓަށް ވަޑައިގެންނެވިއިރު، ޑިޕްލޮމެޓިކް ޕާސްޕޯޓާއި، އޯޑިނަރީ ޕާސްޕޯޓްވެސް ކެންސަލް ކޮށްފައިވާ ކަމަށް އޭނާ ވިދާޅުވެއެވެ.

މިނިވަން ވެވަޑައިގަތުމަށް ފަހު ކުރެއްވި ޓުވީޓެއްގައި ޖާބިރު ވިދާޅުވީ، ވަގުތުކޮޅަކަށް އޭނާ އެކަހެރިކޮށް، "ނުކިއްސަރު" ފިޔަވަޅެއް އަޅުއްވަން ރައީސް އަބްދުﷲ ޔާމީން މަސައްކަތް ކުރެއްވި ކަމަށާއި، ނަމަވެސް އެކަން ފެއިލްވެފައިވާ ކަމަށެވެ.

މޯލްޑިވްސް އިމިގްރޭޝަނުން ޖާބިރުގެ ޕާސްޕޯޓް ކެންސަލް ކުރީ، އޭނާގެ މައްސަލައެއް ތަހުގީގު ކުރަމުންދާތީވެ، ޕާސްޕޯޓް ކެންސަލް ކޮށް ދިނުމަށް ފުލުހުން އެދުމުންނެވެ.

އެހެން ނަމަވެސް، ތަހުގީގު ކުރަމުންދަނީ ޖާބިރުއާ ގުޅޭ ކޮން މައްސަލައެއް ކަމެއް ފުލުހުންނާއި އިމިގްރޭޝަނުން ވެސް ހާމައެއް ނުކުރެ އެވެ.

ތަހުގީގު ކުރަމުންދާ މައްސަލައަކާއި ގުޅިގެން އޭޕްރީލު މަހުގެ 27 ވަނަ ދުވަހު ފުލުހުން ވަނީ ޖާބިރު ހޯދުމަށްޓަކައި، މާލޭގައި ހުންނަ އޭނާގެ ގެއަށް ގޮސްފައެވެ. ޖާބިރު ހޯދަން ފުލުހުން ދިޔައިރު، އޭނާ އުޅުއްވަނީ ރާއްޖެއިން ބޭރުގައެވެ. ރާއްޖެއިން ބޭރުގައި އޭނާ އުޅުއްވާތާ ވަރަށް ގިނަ ދުވަސް ވެއްޖެ އެވެ.