އިއްފީގައި އަމީތާބަށް އަހަރުގެ ފިލްމީ ތަރީގެ އެވޯޑް ދޭން ނިންމައިފި

މި ނޮވެމްބަރު މަހުގެ ފަހުކޮޅު ގޯއާގައި ބޭއްވުމަށް ހަމަޖެހިފައިވާ އިންޓަރނޭޝަނަލް ފިލްމް ފެސްޓިވަލް އޮފް އިންޑިއާ (އިއްފި) ގައި މި އަހަރު "އިންޑިއަން ފިލްމް ޕަރސަނަލިޓީ އޮފް ދި އިޔަރ" ގެ އެވޯޑް، ބޮލީވުޑްގެ މެގަ ސްޓާ، އަމީތާބް ބައްޗަންއަށް ދިނުމަށް ނިންމައިފިއެވެ.

"އިންޑިއަން ފިލްމް ޕަރސަނަލިޓީ އޮފް ދި އިޔަރ" އެވޯޑަކީ އިންޑިއާގެ ފިލްމް އިންޑަސްޓްރީއަށް 100 އަހަރު ފުރުން ފާހަގަ ކުރުމަށް، އިންޑިއާގެ އިންފޯމޭޝަން އެންޑް ބްރޯޑްކާސްޓިންގް އިން 2013 ވަނަ އަހަރު އިފްތިތާޙުކުރި އެވޯޑެކެވެ. މިހާތަނަށް މި އެވޯޑް ލިބިފައިވާ ފަންނާނުންގެ ތެރޭގައި ހިމެނެނީ، ވަހީދާ ރަޙްމާން، ރަޖްނީކާންތު، އިލައްޔަރާޖާ، އަދި އެސް.ޕީ ބާލަސުބްރަމާނިޔަމެވެ.

އިންޓަރނޭޝަނަލް ފިލްމް ފެސްޓިވަލް އޮފް އިންޑިއާގެ 48 ވަނަ ފެސްޓިވަލް ހަފްލާ މި އަހަރު ބާއްވަން ހަމަޖެހިފައިވާއިރު، މި ފެސްޓިވަލް ކުރިއަށްދާނީ ނޮވެމްބަރ 20-28 އަށެވެ.

މި ފެސްޓިވަލްގައި ޝާޙްރުކް ޚާން ފަދަ ބޮލީވުޑްގެ މަޝްޙޫރު ގިނަ ތަރިންތަކެއް ބައިވެރިވާއިރު، ފެސްޓިވަލްގައި ބައިވެރިކުރާ ފިލްމުތައް ކަނޑައެޅުމުގައި ހަމަހަމަކަން ނެތް ކަމަށް ބުނެ، ފެސްޓިވަލްގެ ޖޫރީގެ ޗެއާމަންކަމުން ފިލްމު އުފެއްދުންތެރިޔާ ސުޖޯއީ ޖޯޝް ވަނީ އިސްތިޢުފާ ދީފައެވެ.