ޗެމްޕިއަންސް ލީގު: ޕޯޓޯ މޮޅުވިއިރު މޮނާކޯ އެއްވަރުވެއްޖެ

ޔުއެފާ ޗެމްޕިއަންސް ލީގުގައި އެފްސީ ޕޯޓޯ ކުޅުނު މެޗު އެ ޓީމުން ކާމިޔާބު ކުރިއިރު މޮނާކޯ އެއްވަރުވެއްޖެއެވެ.

ޗެމްޕިއަންސް ލީގުގެ ގްރޫޕް 'ޖީ' ގައި ރަށުން ބޭރުގައި ބެސިކްޓާސްއާ ދެކޮޅަށް މޮނާކޯ ކުޅުނު މެޗު އެއްވަރު ވެފައި ވަނީ 1-1 ގެ ނަތީޖާ އަކުންނެވެ. މި ދެ ޓީމު މޮނާކޯގެ ދަނޑުގައި މިދިޔަ މަހުގެ 17 ވަނަ ދުވަހު ކުޅުނު މެޗު 2-1 އިން ކާމިޔާބުކުރީ ބެސިކްޓާސްއެވެ. ދެ ޓީމުގެ ފަރާތުން ވެސް ހަމަހަމ ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑުޖަހާ ލީޑު ނަގާފައިވަނީ މޮނާކޯ އިންނެވެ. އެގޮތުން މެޗުގެ ފުރަތަމަ ހާފުގެ އިތުރު ވަގުތުގެ ތެރޭގައި އެ ޓީމަށް މި ލަނޑު ޖަހައިދިނީ ރޮނީ ލޮޕޭޒްއެވެ. އެހެނަސް ލިބުނު ޕެނަލްޓީއެއް ކާމިޔާބުކޮށް ސެންކް ޓޯސަން ވަނީ ބެސިކްޓާސްއަށް ނަތީޖާ ހަމަހަމަ ކޮށްދީފައެވެ.

މި ގްރޫޕުގެ ދެވަނަ މެޗުގައި ޕޯޗުގަލްގެ އެފްސީ ޕޯޓޯ ވަނީ އަމިއްލަ ދަނޑުގައި 3-1 ގެ ނަތީޖާއަކުން މި ސީޒަނުގައި އަލަށް ޗެމްޕިއަންސް ލީގުގައި ވާދަކުރަ ޖަރުމަނުގެ އާރްބީ ލީޕްޒީގް ބަލިކޮށްފައެވެ. މި ދެ ޓީމު މިދިޔަ މަހުގެ 17 ވަނަ ދުވަހު ލީޕްޒީގެގެ ދަނޑުގައި ކުޅުނު މެޗުން 3-2 އިން ޕޯޓޯ ވަނީ ބަލިވެފައެވެ. އެހެނަސް އެ ޓީމުން ވަނީ ބުދަ ދުވަހުގެ ރޭގެ މެޗުގައި ރަނގަޅު ކުޅުމެއް ދައްކައި ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ.

އެގޮތުން ފުރަތަމަ ހާފުގެ 13 ވަނަ މިނެޓުގައި ހެކްޓާ ހެރޭރާ އެ ޓީމަށް ލީޑު ނަގައިދިން އިރު ލީޕްޒީގެގެ ޓީމޯ ވާނާ ވަނީ 48 ވަނަ މިނެޓުގައި ލަނޑެއް ޖަހާ ލީޕްޒީގްއަށް ނަތީޖާ ހަމަހަމަ ކޮށްދީފައެވެ. މެޗުގެ 61 ވަނަ މިނެޓުގައި އެލެކްސް ޓެޔޭސް ތަނަވަސް ކޮށްދިން ފުރުސަތަކުން ޑެނީލޯ ޕެރެއިރާ ވަނީ ލަނޑެއް ޖަހާ އަލުން އަނބުރާ ޕޯޓޯއަށް ލީޑު ނަގައިދީފައެވެ. ޕޯޓޯގެ ތިންވަނަ ލަނޑު މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރ ވަގުތުގެ ތެރޭގައި ވިންސެންޓް އަބޫބަކުރު ތަނަވަސް ކޮށްދިން ފުރުސަތަކުން އެ ޓީމަށް ޖަހައިދިނީ މެކްސިމިލިއާނޯ ޕެރެއިރާއެވެ.

މި ގްރޫޕުގެ ހުރިހާ ޓީމެއް ވެސް ހަތަރު މެޗު ކުޅެފައިވާއިރު ޕޮއިންޓް ތާވަލުގެ އެއްވަނައިގައި 10 ޕޮއިންޓާއެކު އޮތީ ބެސިކްޓާސްއެވެ. ދެވަނައިގައި ހަ ޕޮއިންޓާއެކު އެފްސީ ޕޯޓޯ އޮތްއިރު ތިން ވަނައިގައި ހަތަރު ޕޮއިންޓާއެކު އޮތީ އާރްބީ ލީޕްޒީގްއެވެ. މި ގްރޫޕުގެ އެންމެ ފުލުގައި ދެ ޕޮއިންޓާއެކު އޮތީ މިދިޔަ ސީޒަނުގެ ފްރާންސްގެ ޗެމްޕިއަން މޮނާކޯއެވެ.