ރައްޔިތުންގެ މަޖިލީހުގެ ކޮމެޓީތަކުން ދައުލަތުގެ ކަމާބެހޭ އިދާރާތަކަށް މައުލޫމާތު ހޯދުމަށް އެދުމުން އެކަށީގެންވާ ގޮތެއްގައި މައުލޫމާތު ފޮރުކޮށް ނުދޭ މައްސަލަ ފެންމަތިވަމުންދާތީ އެކަމާ  ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީގެ މެމްބަރުން ކަންބޮޑުވުން ފާޅުކުރައްވައިފި އެވެ.

ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީން ހޯމަ ދުވަހު ބޭއްވި ބައްދަލުވުމުގައި އެކޮމެޓީން ވަނީ އެކޮމެޓީއަށް ހުށަހެޅިފައިވާ ހަ މައްސަލައަކާގުޅިގެން މަޝްވަރާކުރައްވާފަ އެވެ. އެ މައްސަލަތަކާއި ގުޅިގެން ދައުލަތުގެ ކަމާބެހޭ އިދާރާތަކުން މައުލޫމާތު ހޯދުމަށް ހުށަހަޅާފައިވީނަމަވެސް އެ މައުލޫމާތުތައް ލިބިފައި ނުވާތީ ކޮމެޓީގެ މެމްބަރުންކަމަށްވާ މަރަދޫ ދާއިރާގެ މެމްބަރު އިބްރާހީމް ޝަރީފް އާއި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ކޮމެޓީތަކުން މައުލޫމާތު ހޯދުމަށް ދައުލަތުގެ އިދާރާތަކަށް މައުލޫމާތު ހޯދުމަށް ހުށަހެޅުމުން ފުރިހަމަ މައުލޫމާތު ނުލިބޭ މައްސަލައަކީ މިހާރު ވަރަށް ބޮޑު މައްސަލައެއް ކަމަށެވެ. އަދި މަޖިލީހުގެ ކޮމެޓީން މައުލޫމާތު ހޯދުމަށް އެދުމުން މައުލޫމާތު ފޯރުކޮށް ނުދޭ އިދާރާތަކާމެދު ފިޔަވަޅު އެޅުމަށް ވެސް ރޮޒައިނާ ވަނީ ގޮވާލައްވާފަ އެވެ.

ހޯމަ ދުވަހު ބާއްވާ ކޮމެޓީގެ ބައްދަލުވުމުގައި, ތ. އަތޮޅުގައި އެމްޓީސީސީން ދެމުން އަންނަ ފެރީގެ ހިދްމަތާ ގުޅޭ މައްސަލާގައި ތ. އަތޮޅު ކައުންސިލަށް ފޮނުވި ސިޓީއަށް މިހާތަނަށް ޖަވާބެއް ލިބިފައިނުވާތީ އާއި އެމައްސަލައަކީ ރައްޔިތުންނާ ގުޅުންހުރި މައްސަލައަކަށްވާތީ އަލުން ސިޓީ ފޮނުވައިގެން އެމައްސަލައިގެ ތަފްސީލް ހޯދުމަށް ވަނީ ނިންމާފަ އެވެ.

ދައުލަތުގެ ކަމާބެހޭ އިދާރާތަކުން ޖަވާބުދާރީ ނުވާ މައްސަލަ ފެންމަތިވެ، މެމްބަރުން ކަންބޮޑުވުން ފާޅުކުރައްވާފައި ވަނީ އއ. ފެރިދޫ، އައްސޭރި މުހައްމަދު ރަޝީދު ބަލަހައްޓަމުންދާ ބިމެއް އެރަށު ކައުންސިލުން ކުއްޔަށް ދިނުމާ ގުޅޭ މައްސަލައާ ގުޅިގެން ވެސް އެރަށު ކައުންސިލަށް ފޮނުވި ސިޓީއަށް ޖަވާބެއް މިއަދާ ހަމައަށް  ލިބިފައިނުވާތީ އެވެ. ނަމަވެސް މި މައްސަލާގައި ނިންމާފައި ވަނީ ފެރިދޫ ކައުންސިލުން އެ ބިން ކުއްޔަށް ދިނުމުގައި މައްސަލައެއް  އޮތް ކަމަށް ހުށަހެޅިފައިވާ ލިޔެކިޔުންތަކުން ފެންނަން ނެތް ކަމަށެވެ. އެހެންކަމުން އެމައްސަލަ ވަނީ ނިންމާ ފައިލް ކޮށްފަ އެވެ.

ށ. ފޯކައިދޫ ބަނދަރުގެ މައްސަލާގައި  ކޮމެޓީގެ މުގައްރިރު ރިޔާޒު ރަޝީދު ވިދާޅުވީ 2016 އަދި 2017 ވަނަ އަހަރުގެ ދައުލަތުގެ ބަޖެޓްގައި އެ ބަނދަރުގެ މަޝްރޫއު ހިމެނިފައިނުވާތީ އެމައްސައްކަތް ނުފަށާކަމަށް ހައުސިންގ މިނިސްޓްރީ ބުނެފައިވާ ކަމަށެވެ. އަދި ސަރުކާރުން ބަނދަރުތައް ހަދަމުންދާ ތަރުތީބަށްބަލާ އަންނަ އަހަރުގެ ދައުލަތުގެ ބަޖެޓްގައި ފޯކައިދޫ ބަނދަރުގެ މަޝްރޫއު ހިމެނޭކަން ނުވަތަ ނޫންކަން މިހާތަނަށް އެނގިފައިނުވާކަމަށް ރިޔާޒު ވިދާޅުވި އެވެ.

ނޮވެމްބަރު 18، 2015 ގައި ހދ. ކުޅުދުއްފުށި ނިކަމާގޭގައި ހިނގާދިޔަ އަލިފާނުގެ ހާދިސާގައި ގެއްލުމުގެ ބަދަލު ދީފައިނުވާތީ ހުށަހަޅުއްވާފައިވާ މައްސަލާ ގުޅިގެން ރިޔާޒު ރަޝީދު ވިދާޅު މިކަމުގެ މައުލޫމާތު އޮޅުން ފިލުވުމަށް ޑިޒާސްޓަރ މެނޭޖްމަންޓް ސެންޓަރަށާއި މޯލްޑިވްސް ޕޮލިސް ސާރވިސްއަށް ލިޔުމުން އެންގެވުމުން އެ ދެ މުއައްސަސާއިން ވަނީ މައުލޫމާތުދީފަ ކަމަށެވެ. ނަމަވެސް މިމައްސަލަ ފުލުހުން އަދިވެސް ތަހުގީގު ކުރަމުންދާތީ އެމައްސަލަ އިހަށް ބޭއްވުމަށް ކޮމެޓީގެ މުގައްރިރު ވަނީ ނިންމާފަ އެވެ.

މާލެއާއި ހުޅުލެއާ ދެމެދު ފެރީ ހިދްމަތްދޭ ފަރާތްތަކުން ފޮނުވާފައިވާ ޖީއެސްޓީ ނެގުމާ ގުޅޭ މައްސަލައާ ގުޅިގެން ރިޔާޒު ވިދާޅުވީ ފެރީގެ ހިދްމަތްދޭ ފަރާތްކާއި ޓްރާންސްޕޯޓް އޮތޯރިޓީއާ ދެމެދު ވެފައިވާ އެއްބަސްވުމުގައި ވަނީ 10ރ އަށް ވިއްކާ ޓިކެޓުގެ އަގުން ޖީއެސްޓީ ދައްކާގޮތަށް ކަމަށެވެ. އަދި އެމައްސަލައަކީ އެ ދެ ފަރާތުން ވާހަކަދައްކައިގެން ހައްލުކުރެވޭނެ ކަމެއް ކަމަށް ވިދާޅުވެ މިމައްސަލަވެސް ކޮމެޓީން ވަނީ ނިންމާ ފައިލްކޮށްފަ އެވެ.

އައްޑޫ ސިޓީގެ ރައްޔިތުންނަށް ދުވަހުން ދުވަހަށް ބޭނުންވާ ހިދްމަތްތައް ލިބުމުގައި ކުރިމަތި ވަމުންދާ ދަތިތަކާ ގުޅޭ މައްސަލައާ ގުޅިގެން ރިޔާޒު ވިދާޅުވީ އެމައްސަލައަށް މެމްބަރުން މަޝްވަރާ ކޮށްލުމަށް ވަގުތު ބޭނުންވާނެ ކަމަށް ބެލެވޭތީ ދެން ބޭއްވޭ ކޮމެޓީގެ ބައްދަލުވުމަށް އެމައްސަލަ އެޖެންޑާ ކުރައްވާނެ ކަމަށެވެ.