ޕްރިމިއާ ލީގު: ސިޓީ، ޗެލްސީ، ލިވަޕޫލް އަދި އާސެނަލް މޮޅުވެ މަގާމު ދަމަހައްޓައިފި

ޕްރިމިއާ ލީގުގައި މެންޗެސްޓާ ސިޓީ، ޗެލްސީ، ލިވަޕޫލް އަދި އާސެނަލް މޮޅުވެ އެޓީމުތަކުގެ މަގާމު ޕޮއިންޓް ތާވަލުގައި ދަމަހައްޓައިފިއެވެ.

ހޮނިހިރު ދުވަހުގެ ރޭ ކުޅުނު މެޗުން ސިޓީ މޮޅުވީ ވެސްޓްބްރޮމްވިޗް އަލްބިއޮންއާ ވާދަކޮށް 2-3 ގެ ނަތީޖާއަކުންނެވެ.

ވެސްޓްބްރޮމް ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ ސިޓީންނެވެ. މި ލަނޑު 10 ވަނަ މިނެޓުގައި އެޓީމަށް ކާމިޔާބު ކޮށްދިނީ ލީރޯއި ސާނޭއެވެ. އެހެން ނަމަވެސް އޭގެ ތިން މިނެޓުފަހުން ރޮޑްރިގޭޒް ވަނީ ވެސްޓްބްރޮމް އަށް ނަތީޖާ ހަމަހަމަ ކޮށްދީފައެވެ.

ވެސްޓްބްރޮމް އިން ނަތީޖާ ހަމަހަމަކުރިތާ ދެ މިނެޓު ފަހުން ފެނާންޑީނިއޯ ވަނީ ލަނޑެއް ކާމިޔާބުކޮށް، ސިޓީއަށް އަނބުރާ ލީޑު ހޯދައިދީފައެވެ. މި ލަނޑަށްފަހު ސީޓީން ވަނީ މެޗުގެ ކޮންޓްރޯލް ހޯދާ ވެސްޓްބްރޮމްގެ ގޯލަށް ނުރައްކާކޮށް ގިނަ ހަމަލާ ފޮނުވާލާފައެވެ.

ފުރަތަމަ ހާފް ނިމުނީ 1-2 ގެ ނަތީޖާއިން ވެސްޓްބްރޮމްގެ މައްޗަށް ސިޓީ ކުރީގައި އޮވެގެންނެވެ.

ދެވަނަ ހާފް ފެށިގެން ސިޓީން އެޓީމުގެ އެޓޭކްތައް އިތުރަށް ވަރުގަދަކޮށްފައިވާއިރު، ލަނޑު ޖެހުމަށް ވެސް އެޓީމުންދިޔައީ ފުރުސަތު ހޯދަމުންނެވެ. ސިޓީއަށް ލީޑު ފުޅާކޮށްދިނީ 64 ވަނަ މިނެޓުގައި ރަހީމް ސްޓާލިންއެވެ.

މި ލަނޑުތަކާއެކު މެޗު ނިމެންދަނިކޮށް، އިތުރުވަގުތުގައި ވެސްޓްބްރޮމް އަށް ނަތީޖާގެ ފަރަގު ކުޑަކޮށްދިނީ ފިލިޕްސްއެވެ. މި ނަތީޖާއާއެކު ސިޓީ ވަނީ ކުޅުނު 10 މެޗުން 28 ޕޮއިންޓް ހަމަކޮށްފައެވެ. މެޗުން ބަލިވި ވެސްޓްބްރޮމް އޮތީ ކުޅުނު 10 މެޗުން ލިބުނު 10 ޕޮއިންޓާއެކު ޕޮއިންޓް ތާވަލުގެ 14 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން ޗެލްސީ މޮޅުވީ އޭއެފްސީ ބޯންމައުތްއާ ވާދަކޮށް 0-1 ގެ ނަތީޖާއަކުންނެވެ.

ބޯންމައުތް ދަނޑުގައި ކުޅުނު މި މެޗުގެ ފުރަތަމަ ހާފްގައި ޗެލްސީގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، އެޓީމަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

މި މެޗުގައި ބޯންމައުތް އިން ވަނީ ވަރުގަދަ ޑިފެންސެއްކޮށް، ޗެލްސީ ހިފެހެއްޓުމަށް ގިނަ މަސައްކަތެއް ކޮށްފައެވެ. ނަތީޖާއެއްގެ ގޮތުން ފުރަތަމަ ހާފް ނިމުނީ ދެޓީމުންކުރެ ޓީމަކަށް ލަނޑެއް ނުޖެހި އެއްވަރުވެގެންނެވެ.

ދެވަނަ ހާފް ފެށިގެން ޗެލްސީން ވަނީ ކުރިޔަށް ގިނަ ބޯޅަތަކެއްލާ ކުޅުން ވަރުގަދަކޮށްފައެވެ. އެގޮތުން އެޓީމުން ވަނީ 51 ވަނަ މިނެޓުގައި މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެޑެން ހަޒާޑްއެވެ.

މި ލަނޑަށްފަހުވެސް ޗެލްސީއަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ. މީގެއިތުރުން ބޯންމައުތްއަށްވެސް ވަނީ ދެވަނަ ހާފްގެ ފަހުކޮޅު ނަތީޖާ ހަމަހަމަކުރުމަށް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ޗެލްސީ ވަނީ ކުޅުނު 10 މެޗުން 19 ޕޮއިންޓް ހަމަކޮށް، ޕޮއިންޓް ތާވަލުގެ ހަތަރުވަނައިގައި ހަމަޖެހިލާފައެވެ. މެޗުން ބަލިވި ބޯންމައުތް އޮތީ ކުޅުނު 10 މެޗުން ލިބުނު ހަތަރު ޕޮއިންޓާއެކު ޕޮއިންޓް ތާވަލުގެ 19 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން ލިވަޕޫލް މޮޅުވީ ހަޑަސްފިލްޑް ޓައުންއާ ވާދަކޮށް 0-3 ގެ ނަތީޖާއަކުންނެވެ.

މި މެޗުގެ ފުރަތަމަ ހާފްގައި ލިވަޕޫލްއަށް ލަނޑު ޖެހުމަށް ހުރަސްތަކާ ކުރިމަތިވިއެވެ. އެގޮތުން ހަޑަސްފިލްޑުން ވަނީ ފުރަތަމަ ހާފްގައި މޮޅު ޑިފެންސެއްކޮށް ލިވަޕޫލް ހިފަހައްޓާފައެވެ. ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

އެހެންނަމަވެސް ދެވަނަ ހާފް ފެށިގެން ލިވަޕޫލް އިން ވަނީ އެޓޭކްތައް އިތުރަށް ވަރުގަދަކޮށްފައެވެ. އެގޮތުން 50 ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޑެނިއަލް ސްޓަރިޖްއެވެ.

މި ލަނޑަށްފަހު ވެސް ލިވަޕޫލް އިން ދިޔައީ ފުލުފުލުގައި ހަޑަސްފިލްޑްގެ ގޯލަށް ނުރައްކާ ކުރަމުންނެވެ. އެގޮތުން 58 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ރޮބާޓޯ ފިރްމީނޯއެވެ.

މެޗުގައި ލިވަޕޫލް އިން ކާމިޔާބުކުރި ތިންވަނަ ލަނޑު 75 ވަނަ މިނެޓުގައި އެޓީމަށް ކާމިޔާބުކޮށްދިނީ ވައިނަލްޑަމްއެވެ.

މި ނަތީޖާއާއެކު ލިވަޕޫލް ވަނީ 10 މެޗުން 16 ޕޮއިންޓް ހަމަކޮށްފައެވެ. އެޓީމު އޮތީ ހަވަނައިގައެވެ. ހަޑަސްފިލްޑް އޮތީ 10 މެޗުން ލިބުނު 12 ޕޮއިންޓާއެކު ޕޮއިންޓް ތާވަލުގެ 11 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން އާސެނަލް މޮޅުވީ ސްވަންސީ ސިޓީއާ ވާދަކޮށް 1-2 ގެ ނަތީޖާއަކުންނެވެ.

އާސެނަލް ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ ސްވަންސީންނެވެ. މި ލަނޑު 22 ވަނަ މިނެޓުގައި އެޓީމަށް ކާމިޔާބުކޮށްދިނީ ކްލޫކަސްއެވެ.

މި ލަނޑަށްފަހު ވެސް ސްވަންސީ އަށް ވަނީ ލީޑު ފުޅާކުރުމަށް ފުރުސަތުތަކެއް ލިބި ބޭކާރުވެފައެވެ. ސްވަންސީގެ އިތުރުން އާސެނަލްއަށްވެސް ވަނީ ފުރަތަމަ ހާފްގައި ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން އާސެނަލްގެ މައްޗަށް ސްވަންސީ ކުރީގައި އޮވެގެންނެވެ.

ދެވަނަ ހާފް ފެށިގެން އާސެނަލް އިން ވަނީ އެޓީމުގެ ކުޅުން އިތުރަށް ރަނގަޅުކޮށްފައެވެ. އެގޮތުން 51 ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކޮލަސިނަކްއެވެ.

މި ލަނޑަށްފަހުވެސް އާސެނަލް އިން ދިޔައީ ލަނޑު ޖެހުމަށް ފުރުސަތު ހޯދަމުންނެވެ. އެގޮތުން 58 ވަނަ މިނެޓުގައި އާރޮން ރަމްސީ ކާމިޔާބުކުރި ލަނޑުން އެޓީމުން ވަނީ މެޗުގެ ލީޑު އިތުރަށް ފުޅާކޮށްފައެވެ.

މި ނަތީޖާއާއެކު އާސެނަލް ވަނީ 10 މެޗުން 19 ޕޮއިންޓް ހަމަކޮށް ޕޮއިންޓް ތާވަލުގެ ފަސްވަނައިގައި ހަމަޖެހިލާފައެވެ. މެޗުން ބަލިވި ސްވަންސީ އޮތީ 8 ޕޮއިންޓާއެކު ޕޮއިންޓް ތާވަލުގެ 17 ވަނައިގައެވެ.