ޗެމްޕިއަންސް ލީގު: ކޮލިފައިވުމާ ގާތަށް ޕީއެސްޖީ ޖެހިލިއިރު ބަޔާން ވެސް އުއްމީދު ދަމަހައްޓައިފި

ޔުއެފާ ޗެމްޕިއަންސް ލީގުގައި ކުޅުނު މެޗު ކާމިޔާބުކޮށް ޕީއެސްޖީއިން ދެވަނަ ބުރަށް ކޮލިފައި ވުމާއި ގާތަށް ޖެހިލިއިރު ބަޔާން ވެސް ދެވަނަ ބުރުގެ އުއްމީދު ދަމަހައްޓައިފިއެވެ.

ޗެމްޕިއަންސް ލީގުގެ ގްރޫޕް "ބީ" ގައި ރަށުން ބޭރުގައި ބެލްޖިއަމްގެ އަންޑަލެކްޓާ ދެކޮޅަށް ކުޅުނު މެޗު ޕީއެސްޖީއިން ކާމިޔާބު ކޮށްފައިވަނީ 4-0 ގެ ނަތީޖާއަކުންނެވެ. ދެ ޓީމުގެ ފަރާތުންވެސް ގާތްގަނޑަކަށް ހަމަހަމަ ކުޅުމެއް ފެނިގެންދިޔަ މި މެޗުގައި ޕީއެސްޖީއިން ވަނީ އެ ޓީމަށް ލިބުނު ފުރުސަތުތަކުގެ ބޭނުން ހިފާފައެވެ. އެހެނަސް އަންޑަލެކްޓަށް ލިބުނު ފުރުސަތުތަކުގެ ބޭނުން އެ ޓީމަށް ހިފިފައެއް ނުވެއެވެ.

ޕީއެސްޖީގެ ފުރަތަމަ ލަނޑު މެޗުގެ ތިން ވަނަ މިނެޓުގައި މާކޯ ވެރާޓީދިން ޕާހަކުން އެ ޓީމަށް ޖަހައިދިނީ މި ސީޒަނުގައި އެ ޓީމާއި އަލަށް ގުޅުނު ޒުވާން ފޯވާޑް ކިލިއަން އެމްބާޕޭއެވެ. ޕީއެސްޖީއިން އެ ޓީމުގެ ދެވަނަ ލަނޑު ޖަހާފައިވަނީ ފުރަތަމަ ހާފު ނިމެން އެންމެ މިނެޓަކަށް ވެފައިވަނިކޮށެވެ. މި ލަނޑަކީ އެމްބާޕޭ ތަނަވަސް ކޮށްދިން ފުރުސަތެއްގައި ކަވާނީ އެ ޓީމަށް ކާމިޔާބު ކޮށްދިން ލަނޑެކެވެ. ފުރަތަމަ ހާފު ނިމިފައިވަނީ ދެ ލަނޑު ސުން ލަނޑުން އެންޑަލެކްޓްގެ މައްޗަށް ޕީއެސްޖީ ކުރީގައި އޮވެގެންނެވެ.

ދެވަނަ ހާފު ފެށިގެން ވެސް ޕީއެސްޖީއިން ވަނީ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. އެގޮތުން މެޗުގެ 50 ވަނަ މިނެޓުގައި ކަވާނީ ފޮނުވާލި ހަމަލާއެއް އަމާޒުވީ އަންޑަލެކްޓެގެ ގޯލުގެ ހުރަސް ދަނޑިއާއެވެ. އޭގެ ނުވަ މިނެޓު ފަހުން ޕީއެސްޖީއިން ލަނޑެއް ޖެހި ނަމަވެސް ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ. ޕީއެސްޖީއަށް އެ ޓީމުގެ ލީޑު އިތުރަށް ފުޅާކޮށްދިނީ ދުނިޔޭގެ އެންމެ އަގުބޮޑު ކުޅުންތެރިޔާ ނޭމާއެވެ. މި ލަނޑަކީ އޭނާ ހިލޭޖެހުމަކުން އެ ޓީމަށް ކާމިޔާބު ކޮށްދިން ލަނޑެކެވެ. ޕީއެސްޖީއިން މި ލަނޑު ޖެހިތާ ތިން މިނެޓު ފަހުން ކަވާނީ ލަނޑެއް ޖެހި ނަމަވެސް ރެފްރީ ނިންމާފައިވަނީ އެ ލަނޑަކީވެސް އޮފްސައިޑް ލަނޑެއް ކަމަށެވެ. ޕީއެސްޖީގެ ހަތަރު ވަނަ ލަނޑު 88 ވަނަ މިނެޓުގައި އެ ޓީމަށް ޖަހައިދިނީ އެންހެލް ޑިމަރިއާއެވެ.

މި ގްރޫޕުގެ ދެވަނަ މެޗުގައި ޖަރުމަނުގެ ޗެމްޕިއަން ބަޔާން މިއުނިކް އިން ވަނީ އަމިއްލަ ދަނޑުގައި ސްކޮޓްލޭންޑުގެ ޗެމްޕިއަން ސެލްޓިކް ތިން ލަނޑު ސުން ލަނޑުން ބަލިކޮށްފައެވެ.

ބަޔާންގެ ކޯޗުކަމާއި އަލުން އަނބުރާ އެ ޓީމަށް 2013 ވަނަ އަހަރުގެ ޗެމްޕިއަންސް ލީގު ކާމިޔާބު ކޮށްދިން ޖުޕް ހެއިންކޭސް ހަވާލުވި ފަހުން އެ ޓީމު މި ސީޒަނުގެ ޗެމްޕިއަންސް ލީގުގައި ކުޅުނު ފުރަތަމަ މެޗުގައި އެ ޓީމަށް ސެލްޓިކްގެ ގޯލު ހުޅުވާލަދިނީ 17 ވަނަ މިނެޓުގައި ތޯމަސް މުލާއެވެ. ބަޔާންގެ ދެވަނަ ލަނޑު މެޗުގެ 29 ވަނަ މިނެޓުގައި ކިންގްސްލީ ކޯމަން ތަނަވަސް ކޮށްދިން ފުރުސަތެއްގައި އެ ޓީމަށް ކާމިޔާބު ކޮށްދިނީ ޒުވާން ޑިފެންޑާ ޖޯޝުއާ ކިމިޗްއެވެ.

ފުރަތަމަ ހާފު ދެ ލަނޑު ސުން ލަނޑުން ބަޔާން ކުރީގައި އޮވެގެން ނިމިގެން ދިޔައިރު އެ ޓީމުން ވަނީ ދެ ވަނަ ހާފުގައިވެސް ގިނަ ވަގުތު ސެލްޓިކްގެ ހާފުގައި ބޯޅަ ގެންގުޅެ ލަނޑުޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. އެގޮތުން ބަޔާންގެ ތިން ވަނަ ލަނޑު ރޮބެން ނަގައިދިން ކޯނަރަކުން ބޮލުން ގޯލުގެ ތެރެއަށް ބޯޅަ ފޮނުވާލައިގެން އެ ޓީމަށް ކާމިޔާބު ކޮށްދިނީ މެޓްސް ހުމެލްސްއެވެ.

މި ގްރޫޕުގެ ހުރިހާ ޓީމެއްވެސް ތިން މެޗު ކުޅެފައިވާއިރު އެއްވަނައިގައި ނުވަ ޕޮއިންޓާއެކު އޮތީ ޕީއެސްޖީއެވެ. ދެވަނައިގައި ހަ ޕޮއިންޓާއެކު ބަޔާން އޮތްއިރު ތިން ޕޮއިންޓާއެކު ތިން ވަނައިގައި އޮތީ ސެލްޓިކްއެވެ. އަދި މި ގްރޫޕުގެ ފުލުގައި ކުޅުނު ހުރިހާ މެޗަކުން ވެސް ބަލިވެ އޮތީ އެންޑަލެކްޓްއެވެ.