ޗެމްޕިއަންސް ލީގު: ބާސާ އާއި ޖުވެންޓަސް ވެސް މޮޅުވެއްޖެ

ޔުއެފާ ޗެމްޕިއަންސް ލީގުގައި ބާސެލޯނާ އާއި ޖުވެންޓަސް ކުޅުނު މެޗުތަކުން އެ ދެ ޓީމުވެސް މޮޅު ވެއްޖެއެވެ.

ބުދަ ދުވަހުގެ ރޭ އަމިއްލަ ދަނޑުގައި ގްރީސްގެ އޮލިމްޕިއާކޯސް އާއި ދެކޮޅަށް ކުޅުނު މެޗު ބާސާއިން ކާމިޔާބު ކޮށްފައިވަނީ ތިން ލަނޑު އެއް ލަނޑުންނެވެ. މި މެޗުގެ ފުރަތަމަ ހާފުގައި ބާސާއިން ވަނީ އޮލިމްޕިއާކޯސްގެ ހާފުގައި ގިނަ ވަގުތު ބޯޅަ ގެންގުޅެ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ

އެގޮތުން ބާސާއަށް މެޗުގެ ލީޑު ލިބުނީ ފުރަތަމަ ހާފުގެ 18 ވަނަ މިނެޓުގައި އެ ޓީމުގެ ވިންގާރ ޖެރާޑް ޑެއުލޮފޫ ނަގައިދިން ހުރަހެއް އޮލިމްޕިއާކޯސް ގެ ޑިފެންޑާ ޑިމިޓްރިއޯސް ނިކޮލާއޫ އަތުން ބައިކޮޅަށް ވަނުމުންނެވެ. އޭގެ ހަތަރު މިނެޓު ފަހުން ޕައުލީނިއޯ ލަނޑެއް ޖެހި ނަމަވެސް ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ. ޕައުލީނިއޯ އޮފްސައިޑް ލަނޑު ޖެހިތާ ތިން މިނެޓު ފަހުން އޭނާ ފޮނުވާލި ހަމަލާ އަމާޒުވީ އޮލިމްޕިއާކޯސްގެ ގޯލުގެ ހުރަސް ދަނޑިއާއެވެ.

އެހެނަސް ބާސާއަށް މެޗުގައި އިތުރު ހުރަސްތަކަކާ ކުރިމަތިވީ އެ ޓީމުގެ ޑިފެންޑާ ޖެރާޑް ޕީކޭ ގަސްތުގައި އަތުން ލަނޑުޖެހި ކަމުގެ ކުށުގައި ރަތް ކާޑު ދައްކައި ދަނޑުން ފޮނުވާލުމުންނެވެ. ފުރަތަމަ ހާފު ނިމިފައިވަނީ އެއް ލަނޑު ސުން ލަނޑުން އޮލިމްޕިއާކޯސްގެ މައްޗަށް ބާސާ ކުރީގައި އޮވެގެންނެވެ.

ދެވަނަ ހާފަށް 10 ކުޅުންތެރިންނާއެކު ނުކުތް ބާސާއިން ވަނީ މި ހާފުގައިވެސް އޮލިމްޕިއާކޯސްގެ އެޓޭކުތަށް ހުއްޓުވައި އެ ޓީމުގެ ހާފުގައި ގިނަ ވަގުތު ބޯޅަ ގެންގުޅެފައެވެ. 10 ކުޅުންތެރިންނާއެކު ކުޅުނު ނަމަވެސް ބާސާއިން ވަނީ މިހާފުގައި ވެސް ދެ ލަނޑު ޖަހާފައެވެ. އެގޮތުން އެ ޓީމުގެ ދެވަނަ ލަނޑު 61 ވަނަ މިނެޓުގައި ލިބުނު ހިލޭޖެހުމަކުން ކާމިޔާބު ކޮށްދިނީ ލިއޮނެލް މެސީއެވެ. ބާސާއިން ވަނީ އޭގެ ތިން މިނެޓު ފަހުން ލީޑު އިތުރަށް ފުޅާކޮށްފައެވެ. މި ލަނޑު އެ ޓީމަށް ޖަހައިދިނީ މެސީގެ އެހީތެރިކަމާއެކު ލޫކަސް ޑިންޔޭއެވެ. މެޗުގެ އެންމެ ފަހު މިނެޓުގައި އޮލިމްޕިއާކޯސްއަށް ސުން ކަނޑުވާލަދިނީ ވެސް ނިކޮލާއޫއެވެ.

މި ގްރޫޕުގެ ދެވަނަ މެޗުގައި އިޓަލީގެ ޖުވެންޓަސް ވަނީ އަމިއްލަ ދަނޑުގައި ޕޯޗުގަލްގެ ސްޕޯޓިން ލިސްބަން ދެ ލަނޑު އެއް ލަނޑުން ބަލިކޮށްފައެވެ. ޖުވެންޓަސްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑު ޖަހާ ލީޑު ނެގީ އެހެނަސް ސްޕޯޓިން ލިސްބަން އިންނެވެ. މެޗުގެ 12 ވަނަ މިނެޓުގައި އެ ޓީމަށް ލީޑު ލިބުނީ ޖުވެންޓަސްގެ ޑިފެންޑާ އެލެކްސް ސަންޑްރޯ އަތުން ބައިކޮޅަށް ވަން ލަނޑުންނެވެ.

މި ލަނޑަށްފަހު ޖުވެންޓަސްގެ ކުޅުން ރަނގަޅުކޮށް ނުރައްކާތެރި ހަމަލާތަށް އުފެއްދުމުގެ ނަތީޖާއަކަށް ވެގެންދިޔައީ ފުރަތަމަ ހާފުގެ 29 ވަނަ މިނެޓުގައި ލިބުނު ހިލޭ ޖެހުމަކުން މިރާލެމް ޕިޔާނިޗް ލަނޑެއް ޖަހާ ނަތީޖާ ހަމަހަމަ ކޮށްދިނުމެވެ. މި ލަނޑަށް ފަހުވެސް ޖުވެންޓަސްއިން ގިނަ ހަމަލާތަކެއް އުފެއްދި ނަމަވެސް ފުރަތަމަ ހާފު ނިމިގެން ދިޔައީ އެއް ލަނޑު އެއް ލަނޑުން ދެ ޓީމު އެއްވަރުވެ އޮވެގެންނެވެ.

ދެވަނަ ހާފުގައިވެސް ޖުވެންޓަސްއިން ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މި މެޗުގައި އެ ޓީމަށް ލީޑު ނަގައިދިނީ 84 ވަނަ މިނެޓުގައި ޑަގްލަސް ކޮސްޓާ ތަނަވަސްކޮށްދިން ފުރުސަތެއްގައި މާރިއޯ މަންޒުކިޗްއެވެ.

މި ގްރޫޕުގައި ހުރިހާ ޓީމެއްވެސް ތިން މެޗު ކުޅެފައިވާއިރު އެއްވަނައިގައި ކުޅުނު ހުރިހާ މެޗެއްވެސް ކާމިޔާބު ކޮށް ނުވަ ޕޮއިންޓާއެކު އޮތީ ބާސާއެވެ. ދެވަނައިގައި ހަ ޕޮއިންޓާއެކު ޖުވެންޓަސް އޮތްއިރު ތިންވަނައިގައި ތިން ޕޮއިންޓާއެކު އޮތީ ސްޕޯޓިން ލިސްބަންއެވެ. އަދި މި ގްރޫޕުގެ ފުލުގައި އެއްވެސް ޕޮއިންޓެއް ނުލިބި އޮތީ ބާސާއަތުން ބަލިވި އޮލިމްޕިއާކޯސްއެވެ.