ޔުއެފާ ޗެމްޕިއަންސް ލީގުގައި ލިވަޕޫލް އާއި ސްޕާޓަކް މޮސްކޯ ކުޅުނު މެޗުތަކުން އެ ދެ ޓީމު ވެސް ތަފާތު ބޮޑު ނަތީޖާއަކުން މޮޅުވެއްޖެއެވެ.

ޗެމްޕިއަންސް ލީގުގެ ގްރޫޕް 'އީ' ގައި ރަށުން ބޭރުގައި ސްލޮވޭނިއާގެ މަރިބޯއާ ދެކޮޅަށް ކުޅުނު މެޗު ލިވަޕޫލްއިން ކާމިޔާބު ކޮށްފައި ވަނީ 7-0 އިންނެވެ. މި މެޗުގައި ލިވަޕޫލްގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު އެ ޓީމަށް މަރިބޯގެ ގޯލު މެޗުގެ ހަތަރު ވަނަ މިނެޓުގައި ހުޅުވައިދިނީ ރޮބާޓޯ ފިރްމީނޯއެވެ. ލިވަޕޫލްގެ ދެވަނަ ލަނޑު މެޗުގެ 13 ވަނަ މިނެޓުގައި ޖޭމްސް މިލްނާގެ އެހީތެރި ކަމާއެކު އެ ޓީމަށް ޖަހައިދިނީ ފިލިޕޭ ކުޓީނިއޯއެވެ.

މި ލަނޑަށް ފަހު ވެސް ލިވަޕޫލްއިން ފުރުސަތުތައް ތަނަވަސް ކުރުމުގެ ނަތީޖާއަކަށް ވެގެން ދިޔައީ ފިރްމީނޯ ދިން ހިތްގައިމު ޕާހަކުން 19 ވަނަ މިނެޓުގައި ސަލާހް ލަނޑެއް ޖަހައި އެ ޓީމުގެ ލީޑު ފުޅާ ކޮށްދިނުމެވެ. ސަލާހް މެޗުގައި ޖެހި ދެ ވަނަ ލަނޑު އަލްބާޓޯ މޮރޭނޯގެ އެހީތެރި ކަމާއެކު އޭނާ ޖެހީ މެޗުގެ 40 ވަނަ މިނެޓުގައެވެ. ފުރަތަމަ ހާފުގެ ކުޅުން ނިމިގެންދިޔައީ ހަތަރު ލަނޑު ސުން ލަނޑުން މަރިބޯގެ މައްޗަށް ލިވަޕޫލް ކުރީގައި އޮވެގެންނެވެ.

ދެވަނަ ހާފުގައި ވެސް ލިވަޕޫލްއިން ވަނީ މޮޅަށް ކުޅެ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. އެގޮތުން އެ ޓީމުގެ ފަސް ވަނަ ލަނޑު މެޗުގެ 54 ވަނަ މިނެޓުގައި ކާމިޔާބު ކޮށްދިނީ ފިރްމީނޯއެވެ. ލިވަޕޫލްގެ ހަވަނަ ލަނޑު މެޗުގެ 86 ވަނަ މިނިޓުގައި އެ ޓީމަށް ޖަހައިދިނީ މި ސީޒަނުގައި އެ ޓީމާ އަލަށް ގުޅުނު މިޑްފީލްޑާ އެލްކްސް އޮކްސަލޭޑް ޗެމްބަލިންއެވެ. އަދި މެޗުގެ 90 ވަނަ މިނިޓުގައި ޒުވާން ޑިފެންޑާ ޓްރެންޓް އެލްކެޒެންޑާ އާނޯލްޑް ވަނީ ލަނޑެއް ޖަހާ މެޗުން ލިވަޕޫލްއަށް ތިން ޕޮއިންޓް ކަށަވަރު ކޮށްދީފައެވެ.

މި ގްރޫޕުގެ ދެވަނަ މެޗުގައި ރަޝިއާގެ ސްޕާޓަކް މޮސްކޯއިން ވަނީ 5-1 އިން ސެވިއްޔާ ބަލިކޮށް އެ ޓީމު ހަމަ ބިމަށް ތިރިކޮށްފައެވެ. ފޯރިގަދަ ބަލާހިތްވާ ޒާތުގެ ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ ސްޕާޓަކް މޮސްކޯއިންނެވެ. ފުރަތަމަ ހާފުގެ 18 ވަނަ މިނެޓުގައި އެ ޓީމަށް މި ލަނޑު ޖަހައިދިނީ ކުއިންސީ ޕްރޯމޭސްއެވެ. އެހެނަސް ސައިމޮން ކާޔާ ވަނީ ފުރަތަމަ ހާފުގެ 30 ވަނަ މިނެޓުގައި ލަނޑެއް ޖަހާ ސެވިއްޔާއަށް ނަތީޖާ ހަމަހަމަ ކޮށްދީފައެވެ. ފުރަތަމަ ހާފު ނިމިފައި ވަނީ 1-1 އިން ދެ ޓީމު އެއްވަރުވެ އޮވެގެންނެވެ.

ދެވަނަ ހާފުގައި ސްޕާޓަކްއަށް އަލުން އަނބުރާ މެޗުގެ ލީޑު ނަގައިދިނީ ލޯރެންޒް މެލްގަރޭޖޯއެވެ. އެ ޓީމުގެ ތިން ވަނަ ލަނޑު ޑެނިސް ގުލްޝަކޯވް ޖަހައިދިން އިރު 74 ވަނަ މިނެޓުގައި އެ ޓީމުގެ ހަތަރު ވަނަ ލަނޑު ޖަހައިދިނީ ބްރެޒިލްގެ ފޯވާޑް ލުއިސް އެޑްރިއާނޯއެވެ. ސްޕާޓަކްގެ ފަސް ވަނަ ލަނޑު ވެސް އެ ޓީމަށް ޖަހައިދިނީ ފުރަތަމަ ލަނޑު ވެސް ޖަހައިދިން ކުއިންސީ ޕްރޯމޭސްއެވެ.

މި ގްރޫޕުގައި ހުރިހާ ޓީމަކުން ވެސް ތިން މެޗު ކުޅެފައިވާއިރު އެއްވަނައިގައި ފަސް ޕޮއިންޓް ހޯދައި ފައިދާ ހަތް ލަނޑާއެކު އޮތީ ލިވަޕޫލްއެވެ. ސްޕާޓަކްއަށް ލިވަޕޫލް އާއި އެއް އަދަދަކަށް ޕޮއިންޓް ލިބުނު ނަމަވެސް އެ ޓީމަށް ދެވަނަ ލިބެނީ ފައިދާ ލަނޑުގެ ތަފާތުންނެވެ. ހަތަރު ޕޮއިންޓާއެކު ތިން ވަނައިގައި ސެވިއްޔާ އޮތްއިރު އެއް ޕޮއިންޓާއެކު ހަތަރު ވަނައިގައި އޮތީ މަރިބޯއެވެ.