ރާއްޖެ ޓީވީއަށް ދޭ ހަމަލާއަކީ މުޅި ރައްޔިތުންނަށް ދޭ ހަމަލާއެއް:ޑރ. ޑީީޑީ
16 އޮކްޓޯބަރު 2017 | ހޯމަ 02:00ރާއްޖެޓީވީ ނައްތާލުމަށް ކިތަންމެ މަސައްކަތެއް ކުރިއަސް ރައްޔިތުން އެކަން ކާމިޔާބުވިޔަކަނުދޭނެ
އެމްޑީޕީގެ ކުރީގެ ރައީސް ޑރ. އިބްރާހިމް ދިދީ
ދައުލަތުގެ މުއައްސަސާތަކުން ރާއްޖެ ޓީވީއަށް ކެނޑިނޭޅި ދެމުންދާ ހަމަލާތަކަކީ މުޅި ރައްޔިތުންނަށް ދޭ ހަމަލާތަކެއް ކަމަށް، އެމްޑީޕީގެ ކުރީގެ ރައީސް ޑރ. އިބްރާހިމް ދީދީ (ޑރ. ޑީޑީ ވިދާޅުވެއްޖެ އެވެ.
ރާއްޖެ ޓީވީގެ މިރައީސް ޕްރޮގްރާމްގައި ތިމަރަފުށީ ދާއިރާގެ މެމްބަރު މުހައްމަދު މުސްތަފާ، ރައީސް އަބްދުﷲ ޔާމީނަށް ފާޑުކިޔައި ދެއްކެވި ވާހަކައަކީ ގައުމީ ސަލާމަތަށް ނުރައްކަލެއްކަމަށް ބްރޯޑްކާސްޓިން ކޮމިޝަނުން ކަނޑައަޅައި 500،000 ލައްކަ ރުފިޔާއިން ކޮށްފައިވާ ޖޫރިމަނާ ދެއްކުމަށް ހުޅުވާފައިވާ އަބުރުފުޅު ފަންޑަށް އެހީވުމަށް ފަހު ޑރ. ޑީޑީ ވިދާޅުވީ ޖޫރިމަނާ ކުރުމަކީ ރައްޔިތުނަށް ދެވުނު ވަރަށްބޮޑު އަނިޔާއެއްކަމަށެވެ.
"ރާއްޖެޓިވިއަކީ ރައްޔިތުންގެ ޓީވީ. ރާއްޖެޓިވީއަށް ތަކުރާރުކޮށް މި ދިން ހަމަލާއަކީ، މުޅި ދިވެހި ރައްޔިތުނަށް ދެވުނު ހަމަލާއެއް" ޑީޑީ ވިދާޅުވިއެވެ.
އޭނާ ވިދާޅުވީ، ރާއްޖެޓީވީ މި ހަމަލާއިން ސަލާމަތްކުރުމަށް އޭނާއަށް ކުރެއްވެވުނު ހުރިހާ މަސައްކަތެއް ކޮށްދެއްވާނެކަމަށެވެ. ޑީޑީ ވިދާޅުވިގޮތުގައި މިއަދުގެ އަނިޔާވެރި ސަރުކާރުން މީޑިއާގެ މިނިވަންކަން ނަގާލުމަށާއި، ޚާއްސަކޮށް ރާއްޖެޓީވީއަށް އަމާޒުކޮށް ތަކުރާރުކޮށް ދޭ ހަމަލާތަކަކީ، މި ގައުމުގައި އޮތް މީޑިއާގެ މިނިވަންކަން ނައްތާލުމަށް ސަރުކާރުން ރާވައިގެން ހިންގާ އަމަލުތަކެއްކަމަށެވެ. ރާއްޖެޓީވީ ރޯކޮށްލުމަކީ އެ ސިލްސިލާގެ ބޮޅެއްކަމަށް ޑީޑީ ވިދާޅުވިއެވެ. އަދި ރޯކޮށްލުމުގެ އަޑީގައި މިއަދުގެ ސަރުކާރުގެ އަތެއްވާކަމަށް ފާހަގަކުރެވޭކަމަށާއި، އެވާހަކަ ވަރަށް ސާފުއިބާރަތުން ތިމަރަފުށީ ދާއިރާގެ މެންބަރު މުހައްމަދު މުސްތަފާ ވިދާޅުވެފައިކަމަށާއި، އެހެން ނަމަވެސް މުސްތަފާ އެ ވިދާޅުވި ވާހަކަފުޅުގެ ތަހުގީގު ހިންގުމަށް ކަމާބެހޭ އެއްވެސް ފަރާތަކުން މަސައްކަތް ނުކުރައްވާކަމަށް އޭނާ ވިދާޅުވިއެވެ.
އެހެންކަމުން މީޑިއާއަށް ދޭ ހަމަލާތަކުގެ އަޑީގައި ސަރުކާރުގެ އަތެއްވާނޭ ކަމަށް ޑީޑީ ވަނީ ވިދާޅުވެފައެވެ. އސަރުކާރުގެ ނުފޫޒް ބްރޯޑްކާސްޓިން ކޮމިޝަންގެ ތެރެއަށް ވަދެފައިވާ މިންވަރު އެ ކޮމިޝަންގެ މެންބަރުންގެ އަމަލުތަކުން ވަރަށް ސާފުވާކަމަށް ޑީޑީ ވިދާޅުވިއެވެ. އަދި ސަރުކާރުގެ މުށުތެރެއަށް ބްރޯޑްކޮމްގެ ވެރިން ވަދެ ފިތިފައިވާ މިންވަރު މިއަދު ރައްޔިތުންނަށް އެދަނީ ހާމަވަމުންކަމަށް ވެސް ޑރ. ޑީޑީ ވިދާޅުވިއެވެ.
ރާއްޖެޓީވީ ނައްތާލުމަށް ކިތަންމެ މަސައްކަތެއް ކުރިއަސް ރައްޔިތުން އެކަން ކާމިޔާބުވިޔަކަނުދޭނެ ކަމަށް ވެސް އޭނާ ވިދާޅުވި އެވެ.
