ކ. އަތޮޅު ރިސޯޓެއްގެ ފަޅުތެރޭގައި އޮތް ލޯންޗެއްގައި އަލިފާން ރޯވެ، ކެޕްޓަނަށް އަނިޔާތަކެއް
10 ނޮވެމްބަރު 2026 | އަންގާރަ 04:11ކ. އަތޮޅު ރިސޯޓެއްގެ ފަޅުތެރޭގައި އޮތް ލޯންޗެއްގައި ރޯވި އަލިފާނުގެ މި ހާދިސާގައި، އުމުރުން 34 އަހަރުގެ ދިވެހި ކެޕްޓަންގެ މޭމައްޗާއި ކަރު ފިހިގެން މިހާރު ދަނީ އައިޖީއެމްއެޗްގައި ފަރުވާ ދެމުން. މިދިޔަ އާދީއްތަ ދުވަހުގެ ދަންވަރު ހިނގި މި ހާދިސާގައި އުޅަނދަށް ބޮޑެތި ގެއްލުންތަކެއް ލިބިފައިވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުން
ފައިލް ފޮޓޯ: އައްޑޫ ސިޓީ ފޭދޫ ކައިރީގައި އޮތް ސަފާރީއެއްގައި މީގެ ކުރިން ހިނގި އަލިފާނުގެ ހާދިސާއެއް | އެމްއެންޑީއެފް
ކ. އަތޮޅުގެ ރިސޯޓެއްގެ ފަޅުތެރޭގައި އޮތް ލޯންޗެއްގައި އަލިފާން ރޯވެ، އެ އުޅަނދުގެ ކެޕްޓަނަށް ބޮޑެތި އަނިޔާތަކެއް ލިބިއްޖެ އެވެ.
މި ހާދިސާގައި އަނިޔާވެފައިވަނީ އުމުރުން 34 އަހަރުގެ ދިވެހި ފިރިހެނަކަށެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ، ކ. އަތޮޅު ރިސޯޓެއްގެ ފަޅުތެރޭގައި އޮތް ލޯންޗެއްގައި އަލިފާން ރޯވެގެން އުޅޭކަމުގެ ރިޕޯޓު ފުލުހުންނަށް ލިބިފައިވަނީ 2026 ނޮވެމްބަރު 10 ވާ އާދީއްތަ ދުވަހުގެ ފަތިހު 05:30 އެހައިކަންހާއިރު ކަމަށެވެ.
ނަމަވެސް މި ހާދިސާ ހިނގާފައިވަނީ އެރޭ ދަންވަރު 03:00 އެހައިކަންހާއިރު ކަމަށް ފުލުހުންގެ ތަހުގީގަށް މިހާތަނަށް ވަނީ އެނގިފަ އެވެ.
މި ހާދިސާ ހިނގި ވަގުތު ލޯންޗުގައި ހުރީ ހަމައެކަނި އޭގެ ކެޕްޓަނެވެ. އަލިފާނުގެ ސަބަބުން އޭނާގެ ހަށިގަނޑުގެ ބައެއް ތަންތަން ފިހިފައިވާއިރު، އޭގެ ތެރޭގައި ކަރާއި މޭމަތި ހިމެނޭ ކަމަށް ފުލުހުން މައުލޫމާތު ދެ އެވެ. އަނިޔާވި ކެޕްޓަނަށް މިހާރު ދަނީ އައިޖީއެމް ހޮސްޕިޓަލުގައި ފަރުވާ ދެމުންނެވެ.
މި އަލިފާނުގެ ހާދިސާގައި ލޯންޗަށްވެސް ވަނީ އެކިވަރުގެ ގެއްލުންތައް ލިބިފަ އެވެ.
ފުލުހުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.
