ވަގުފު ކުންފުނީގެ ޗެއަރޕާސަންގެ މަގާމަށް ޝެއިޚް އިއްޒުއްދީން އަދި އެމްޑީގެ މަގާމަށް ޔާމީން ހިމެނޭހެން ޖުމްލަ ހަތް މެންބަރުން އައްޔަނުކޮށްފި
8 އޮކްޓޯބަރު 2026 | ބުރާސްފަތި 07:47މޯލްޑިވްސް އައުގާފް އިންވެސްޓްމަންޓްގެ ޗެއަރޕާސަންގެ މަގާމަށް އިއްޒުއްދީން އަދްނާން އަދި މެނޭޖިންގ ޑިރެކްޓަރުގެ މަގާމަށް ޔާމީން އިދްރީސް ހިމެނޭހެން ޖުމްލަ ހަތް މެންބަރުންގެ ބޯޑެއް ޕީސީބީން ވަނީ އެކުލަވާލާފައި. މި ކުންފުންޏަކީ ރާއްޖޭގައި ވަގުފުތައް ބިނާކޮށް، މިސްކިތްތައް މަރާމާތުކުރުމާއި އިސްލާމީ ޝަރީއަތް ހުއްދަކުރާ ވިޔަފާރިތައް ހިންގުމަށް ސަރުކާރުން އުފައްދާފައިވާ ކުންފުންޏެއް
ވަގުފު ކުންފުނީގެ ޗެއަރޕާސަންގެ މަގާމަށް އައްޔަނުކުރެއްވި އައްޝެއިޚް އިއްޒުއްދީން އަދްނާން އާއި އެ ކުންފުނީގެ މެނޭޖިން ޑިރެކްޓަރުގެ މަގާމަށް އައްޔަނުކުރެއްވި ޔާމީން އިދްރީސް | ޕީސީބީ
ރައީސް ޑރ. މުހައްމަދު މުއިއްޒުގެ ސަރުކާރުން އަލަށް އުފެއްދި ގައުމީ ވަގުފު ކުންފުނި، ''މޯލްޑިވްސް އައުގާފް އިންވެސްޓްމަންޓް ލިމިޓެޑް''ގެ ޑިރެކްޓަރުންގެ ބޯޑަށް މެންބަރުން އައްޔަނުކުރައްވައިފި އެވެ.
މި ބޭފުޅުން މަގާމުތަކަށް އައްޔަނުކުރައްވާފައިވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިންނެވެ.
އެ ކުންފުނީގެ ޗެއަރޕާސަންގެ މަގާމަށް އައްޔަނުކުރައްވާފައިވަނީ އައްޝެއިޚް އިއްޒުއްދީން އަދްނާން އެވެ. އަދި މެނޭޖިންގ ޑިރެކްޓަރުގެ މަގާމަށް ހަމަޖައްސަވާފައިވަނީ ޔާމީން އިދްރީސް އެވެ. ޔާމީން އިދްރީސް އަކީ މޯލްޑިވްސް ހައްޖު ކޯޕަރޭޝަންގެ ކުރީގެ މެނޭޖިން ޑިރެކްޓަރެވެ.
މީގެއިތުރުން، އައުގާފްގެ ޑިރެކްޓަރުންގެ ބޯޑަށް އިތުރު ފަސް މެމްބަރަކު ވަނީ އައްޔަނުކުރައްވާފަ އެވެ. އެ ބޭފުޅުންނަކީ:
ޑރ. މުހައްމަދު ޝުޖާއު
ހުސައިން ޝާމް އާދަމް
މަރްޔަމް ނިހާޔަތު
އަބްދުﷲ އަލީ
މުހައްމަދު ހިލްމީ
މޯލްޑިވްސް އައުގާފް އިންވެސްޓްމަންޓް ލިމިޓެޑަކީ ދިވެހި ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދީނީ ކަންކަމަށް ހޭދަކުރުމަށްޓަކައި ރާއްޖޭގެ އެކި ކަންކޮޅުތަކުގައި ވަގުފުތައް ބިނާކުރުމާއި، އެފަދަ ވަގުފު ބިނާތައް މަރާމާތުކޮށް ބެލެހެއްޓުމުގެ މަސައްކަތްތައް ކުރުމަށާއި، ރާއްޖޭގެ އެކި ސަރަހައްދުތަކުގައި މިސްކިތް ބިނާ ކުރުމާއި، މިސްކިތްތަކަށް ބޭނުންވާ އެންމެހާ ވަސީލަތްތައް ގާއިމުކޮށް ތަރައްގީ ކުރުމުގެ މަސައްކަތާއި، އިސްލާމީ ޝަރީއަތް ހުއްދަކުރާ ވިޔަފާރީގެ ހަރަކާތްތައް ދެމެހެއްޓެނިވި ގޮތެއްގައި ހިންގުމުގެ ގޮތުން ކުރަންޖެހޭ އެންމެހައި މަސައްކަތްތައް ކުރުމަށްޓަކައި ސަރުކާރުން އުފައްދާފައިވާ ކުންފުންޏެކެވެ.
މި ކުންފުންޏަކީ ރައީސް ޑރ. މުހައްމަދު މުއިއްޒު، ކުންފުންޏާ ބެހޭ ގާނޫނުގެ ދަށުން ލިބިވަޑައިގަންނަވާ ބާރުގެ ދަށުން 12 ސެޕްޓެމްބަރު 2026 ގައި ރައީސުލްޖުމްހޫރިއްޔާގެ ގަރާރަކުން އުފެއްދެވި ކުންފުންޏެކެވެ.
ރައީސް މުއިއްޒު އައު ކުންފުނިތައް އުފައްދަވަމުން ގެންދަވާއިރު، ހަރަދު ކުޑަ ކުރުމަށް ކަމަށް ބުނެ ބައެއް ކުންފުނިތައް އުވާލައި، ގިނަ ބަޔަކު ނުހައްގުން ވަޒީފާއިން ވަކިކުރަމުންދާ ކަމަށް ރައްޔިތުން ދަނީ ބުނަމުންނެވެ.
