އުރީދޫގެ ޕޭޕަލް ޚިދުމަތް 5000 ކަސްޓަމަރުންނަށް ވާސިލުވެއްޖެ

އުރީދޫ އެމް ފައިސާ އެކައުންޓްތަކާ ގުޅާލާފައިވާ ޕޭޕަލްގެ ޚިދުމަތް 5000 އަށްވުރެ ގިނަ ކަސްޓަމަރުން ބޭނުންކުރަމުން އަންނަކަމަށް އުރީދޫ ފިންޓެކުން ހާމަކޮށްފި އެވެ.

އުރީދޫ އިން ބުނީ، މިއީ ރާއްޖޭގައި ބައިނަލްއަޤުވާމީ ޑިޖިޓަލް ޕޭމަންޓް ޚިދުމަތްތައް ހޯދުމުގެ ފުރުސަތު ފުޅާކުރުމުގައި ހާސިލުކުރެވުނު މުހިންމު ލަނޑުދަނޑިއެއް ކަމަށެވެ. 

ޖޫން 2026 ގައި ތައާރަފުކުރުމާއެކު، ރާއްޖޭގެ ކަސްޓަމަރުންނަށް އެމީހުންގެ ޕޭޕަލް އެކައުންޓްތައް އެމްފައިސާއާ ގުޅާލައި، ޕޭޕަލްއިން ޑޮލަރ ފަސޭހަކަމާއެކު ސީދާ އެމްފައިސާ ޔޫއެސްޑީ ޕޮކެޓަށް ޖަމާކުރުމުގެ ޚިދުމަތް ވަނީ ފަށާފަ އެވެ. އަދި ނަގާފައިވާ ފައިސާ އަނބުރާ ގުޅާލާފައިވާ ޕޭޕަލް އެކައުންޓްތަކަށް ޓްރާންސްފަރ ކުރުމުގެ ފުރުސަތު ވެސް ކަސްޓަމަރުންނަށް ލިބިގެންދާއިރު، މީގެ ސަބަބުން ބައިނަލްއަޤުވާމީ ޑިޖިޓަލް ޕޭމަންޓްތައް މެނޭޖުކުރުމުގައި އިތުރު ލުއިފަސޭހަތަކެއް ލިބިގެންދާނެ ކަމަށް އުރީދޫއިން ބުނެ އެވެ. 

ޕޭޕަލް ޚިދިމަތް ރާއްޖެއަށް ތައާރަފް ކުރި ރަސްމިއްޔާތުގެ ތެރެއިން | އުރީދޫ

ފުރަތަމަ ތިން މަސް ދުވަހުގެ ތެރޭގައި 5000 އަށްވުރެ ގިނަ ޔޫޒަރުންނަށް ވާސިލުވުމަކީ، ފަސޭހައިން ބޭނުންކުރެވޭ ބައިނަލްއަޤުވާމީ ޕޭމަންޓް ސޮލިއުޝަންތަކަށް އޮންނަ ޑިމާންޑް އިތުރުވަމުންދާކަން ދައްކުވައިދޭ ކަމެއް ކަމަށާއި ޚާއްސަކޮށް ފްރީލާންސަރުންނާއި ވިޔަފާރިވެރިންނާއި ކޮންޓެންޓް ކްރިއޭޓަރުންގެ އިތުރުން ރާއްޖެއިން ބޭރުން ފައިސާ ލިބޭ ފަރާތްތަކުގެ މެދުގައި މި ޑިމާންޑް ބޮޑުކަމަށް އުރީދޫ އިން ބުނެ އެވެ. 

ޕޭޕަލް ޚިދިމަތް ރާއްޖެއަށް ތައާރަފް ކުރި ރަސްމިއްޔާތުގެ ތެރެއިން | އުރީދޫ

މި ޚިދުމަތުގެ ޒަރީއާއިން، ކަސްޓަމަރުންނަށް އެމީހުންގެ ޕޭޕަލް ފައިސާ އެމްފައިސާ ޔޫއެސްޑީ ޕޮކެޓަށް ޖަމާކޮށް، އެމްފައިސާއިން ބޭންކް އެކައުންޓަށް ފައިސާ ޓްރާންސްފަރ ކުރުން ނުވަތަ ނަގުދު ފައިސާ ނެގޭނެ އެވެ. އަދި ޕޭޕަލްއިން އެމްފައިސާއަށް ފައިސާ ޓްރާންސްފަރ ކުރުމަށް އުރީދޫން އިތުރު އެއްވެސް ފީއެއް މިވަގުތު ނުނަގާ ކަމަށް އުރީދޫ އިން ބުނެ އެވެ.

މި ގުޅާލުމުގެ ސަބަބުން، ދުނިޔޭގައި އެންމެ ފުޅާދާއިރާއެއްގައި ބޭނުންކުރާ އެއް ޑިޖިޓަލް ޕޭމަންޓް ޕްލެޓްފޯމް މެދުވެރިކޮށް ހޯދާ ނުވަތަ ލިބޭ ފައިސާ ދިވެހިންނަށް ފަސޭހަކަމާއެކު ނެގޭނެ މަގު ވަނީ ފަހިވެގެންގޮސްފަ އެވެ.

ޕޭޕަލް ގުޅާލުމަކީ، ޑިޖިޓަލް މާލީ ޚިދުމަތްތައް ހޯދުމުގެ ފުރުސަތު ފުޅާކޮށް، ބައިނަލްއަޤުވާމީ ޑިޖިޓަލް އިގުތިސާދުގައި ބައިވެރިވުމަށް ދިވެހިންނަށް އައު ފުރުސަތުތަކެއް ފަހިކޮށްދީގެން، ޝާމިލު ޑިޖިޓަލް މޯލްޑިވްސްއެއް ބިނާކުރުމަށް އުރީދޫ މޯލްޑިވްސްއިން ވެފައިވާ ފުޅާ ވައުދުގެ ތެރޭގައި ހިމެނޭ ކަމެކެވެ.