އާންމު އިޖުތިމާއީ މިންގަނޑުތަކާއި ހިލާފަށް ހެދުން އަޅާ ބިދޭސީންނަށް ފިޔަވަޅު އަޅާނެކަމުގެ އިންޒާރު ފުލުހުން ދީފި
2 އޮކްޓޯބަރު 2026 | ހުކުރު 11:44ރާއްޖޭގައި އުޅޭ ބިދޭސީންނާއި ފަތުރުވެރިން އާންމު ތަންތަނުގައި އުޅޭއިރު، މުޖުތަމައުގެ އަހުލާގީ މިންގަނޑުތަކަށް ފެތޭގޮތަށް ހެދުން އެޅުމަށް ފުލުހުން އިލްތިމާސްކޮށްފި. މިކަމަށް ސަމާލުކަން ދިނުމަށް ބިދޭސީންގެ ބެލެނިވެރި ފަރާތްތަކަށް އަންގާފައިވާއިރު، އިޖުތިމާއީ މިންގަނޑާ ހިލާފަށް ނިވާކަން ކުޑަ ހެދުން އަޅާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމުގެ އިންޒާރު ވެސް ފުލުހުން ވަނީ ދީފައި
އާންމު އިޖުތިމާއީ މިންގަނޑުތަކާއި ހިލާފަށް ހެދުން އަޅާ ބިދޭސީންނަށް ފިޔަވަޅު އަޅާނެ ކަމުގެ އިންޒާރު ދިވެހި ފުލުހުންގެ ހިދުމަތުން ވަނީ ދީފައި | ސޯޝަލް މީޑިއާ
އާންމު އިޖުތިމާއީ މިންގަނޑުތަކާއި ހިލާފަށް ހެދުން އަޅާ ބިދޭސީންނަށް ފިޔަވަޅު އަޅާނެ ކަމުގެ އިންޒާރު ދިވެހި ފުލުހުންގެ ހިދުމަތުން ދީފި އެވެ.
ފުލުހުން ނެރުނު ނޫސްބަޔާނެއްގައި ބުނެފައިވަނީ، ދިވެހި މުޖުތަމައުގައި އަހުލާގީ އަދި އާންމު އިޖުތިމާއީ މިންގަނޑުތައް ހިފެހެއްޓުމަކީ، ދިވެހިރާއްޖޭގައި ދިރިއުޅޭ އެންމެހައި ފަރާތްތަކުން އަދާކުރަން ޖެހޭ މަސްއޫލިއްޔަތަކަށް ވީނަމަވެސް ދިވެހިރާއްޖޭގައި ދިރިއުޅޭ ބިދޭސީން ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމްކޮށް، އާންމު ތަންތަނާއި މަގުމަތީގައި އުޅޭ އުޅުމުގައި، މުޖުތަމައުގެ އާންމު އިޖުތިމާއި އަދި އަހުލާގީ މިންގަނޑުތައް ހިފެހެއްޓުމުގެ ޒިންމާ އަދާކުރުމަށް އެ ފަރާތްތަކަށް ހަނދާން ކޮށްދޭ ކަމަށެވެ.
މިހާރަކަށް އައިސް ދިވެހިރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައި އަދި އެނޫން އާންމު ތަންތަނުގައި އުޅޭކަން ފުލުހުންގެ ހިދުމަތަށް ފާހަގަކުރެވިފައިވާ ކަމަށް ބަޔާނުގައި ބުނެފައިވެ އެވެ. އަދި ބައެއް ބިދޭސީންގެ މިފަދަ އަމަލުތަކަކީ، މުޖުތަމައުގެ އާންމު ސުލޫކީ އަދި އަހުލާގީ މިންގަނޑުތަކާ ހިލާފު އަމަލުތަކެއް ކަމަށާއި، އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފޭނެ ހާލަތްތަކެއް ހުއްޓުވުމުގެ ގޮތުން އެފަދަ ފަރާތްތަކަށް ފިޔަވަޅު އަޅާނެ ކަމަށް ފުލުހުން ވަނީ ބުނެފަ އެވެ.
މީގެ އިތުރުން، ފުލުހުން ވަނީ ބިދޭސީންނާއި ހަވާލުވެތިބި ފަރާތްތަކަށް އެފަރާތެއްގެ ބެލުމުގެ ދަށުން ދިވެހިރާއްޖޭގައި ދިރިއުޅޭ ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އެ ބިދޭސީންގެ އަމަލުތައް ބެހެއްޓުމަށް ހާއްސަ ސަމާލުކަމެއް ދިނުމަށް އިލްތިމާސްކޮށް، ހަނދާންކޮށްދީފަ އެވެ.
ދިވެހިރާއްޖޭގައި ދިރިއުޅޭ ފަރާތްތަކުގެ އިތުރުން ދިވެހިރާއްޖެއަށް ޒިޔާރަތްކުރާ ފަތުރުވެރިންނަށް ހާއްސަކޮށް ކަނޑައަޅާފައިވާ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭ އުޅުމުގައި ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކޮށް، މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް އެފަދަ ފަރާތްތަކަށް ހިދުމަތް ދޭފަރާތްތަކުން ހާއްސަ ސަމާލުކަމެއް ދިނުމަށް އެފަރާތްތަކަށް ވަނީ ފުލުހުން އިލްތިމާސްކޮށްފަ އެވެ. އަދި މިއާއި ހިލާފަށް އަމަލުކުރާ ފަރާތްތަކާމެދު ގާނޫނީ ފިޔަވަޅު އަޅާނެ ކަމަށް ފުލުހުން އިންޒާރުދީފައިވެ އެވެ.
