17 އަހަރުގެ ޚިދުމަތަށް ފަހު، ރެޑް ކްރެސެންޓުން އެޅީ މުސްތަގުބަލުގެ ބިންގާ
18 އޯގަސްޓު 2026 | އަންގާރަ 09:12މޯލްޑިވިއަން ރެޑް ކްރެސެންޓް (އެމްއާރްސީ) ގެ އިންސާނީ ޚިދުމަތްތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ހުޅުމާލޭގައި 14 ފަންގިފިލާގެ "ދަ ސްޓޭޓް ކްރެސެންޓް ޓަވަރ" ބިނާކުރުމުގެ މަޝްރޫއު އިފްތިތާހުކޮށްފި. މި އިމާރާތުން ލިބޭ އާމްދަނީ އާއި ވަސީލަތްތަކުގެ އެހީގައި އެ ޖަމިއްޔާގެ އިދާރީ ހިންގުމާއި ކުއްލި ހާލަތްތަކުގައި އެހީތެރިކަން ފޯރުކޮށްދިނުމުގެ ގާބިލުކަން އިތުރަށް ވަރުގަދަވެގެންދާނެ. މި މަޝްރޫއުގައި ބައިވެރިވުމުގެ ފުރުސަތު އާންމުންނާއި ވިޔަފާރިތަކަށް މިހާރު ވަނީ ހުޅުވާލާފައި
ހުޅުމާލޭގެ ހިތްފަސޭހަ ސަރަހައްދެއްގައި ތަރައްގީކުރާ 14 ފަންގިފިލާގެ "ދަ ސްޓޭޓް ކްރެސެންޓް ޓަވަރ" މަޝްރޫއު އިފްތިތާހުކުރުމަކީ އެ ޖަމިއްޔާގެ ދެމެހެއްޓެނިވި ކުރިމަގު ބިނާކުރުމަށް އެޅުނު އެންމެ މުހިންމު ފިޔަވަޅެއް | ރެޑް ކްރެސެންޓް
ދިވެހިރާއްޖޭގެ އިންސާނީ އެހީތެރިކަމުގެ މަސައްކަތްތަކުގެ ތާރީޚުގައި އައު ބާބެއް ފެށިގެން ހިނގައްޖެ އެވެ. ހިލޭ ސާބަހަށް މަސައްކަތްކުރާ އެންމެ ބޮޑު ޖަމިއްޔާ، މޯލްޑިވިއަން ރެޑް ކްރެސެންޓް (އެމްއާރްސީ) އިން، ހުޅުމާލޭގެ ހިތްފަސޭހަ ސަރަހައްދެއްގައި ތަރައްގީކުރާ 14 ފަންގިފިލާގެ "ދަ ސްޓޭޓް ކްރެސެންޓް ޓަވަރ" މަޝްރޫއު އިފްތިތާހުކުރުމަކީ އެ ޖަމިއްޔާގެ ދެމެހެއްޓެނިވި ކުރިމަގު ބިނާކުރުމަށް އެޅުނު އެންމެ މުހިންމު ފިޔަވަޅެވެ. ތާރީޚީ މުނާސަބަތަކާ އެކު އައު ފެށުމެއް އެމްއާރްސީ އުފެދުނުތާ 17 އަހަރު ފުރުނު މުނާސަބަތާ ދިމާކޮށް މީރުމާގައި ބޭއްވި ހާއްސަ ރަސްމިއްޔާތެއްގައި، މި ޕްރޮޖެކްޓް އާންމުކޮށް ހުޅުވާލީ ސަރުކާރާއި، ޑިޕްލޮމެޓިކް ދާއިރާއާއި، މާލީ އަދި ވިޔަފާރީގެ ދާއިރާގެ އިސް ބޭފުޅުންގެ ހާޒިރުގަ އެވެ.
ހުޅުމާލޭ ފޭސް 1 ގެ ސެންޓްރަލް ޕާކުގެ ކުރިމަތިން، މިރިހި މަގުގައި އޮންނަ އެމްއާރްސީގެ އަމިއްލަ ބިމުގައި، ދެ މަގަކަށްވާ ގޮތަށް ތަރައްގީކުރާ މި ޒަމާނީ އިމާރާތަކީ ގާތްގަނޑަކަށް 70،000 އަކަފޫޓުގެ ޖާގައެއް ހިމެނޭ ތަނެކެވެ. މި މަޝްރޫއާ ގުޅޭގޮތުން ވާހަކަފުޅު ދައްކަވަމުން އެމްއާރްސީގެ ރައީސް އަލީ ނަޝީދު ވިދާޅުވީ، މި އިމާރާތުގެ އަގު ވަޒަންކުރަން ޖެހޭނީ އޭގެ އުސްމިނަކުން ނުވަތަ އިމާރާތުގެ އަގަކުން ނޫން ކަމަށެވެ. އޭނާ ފާހަގަކުރެއްވި ގޮތުގައި، މިއީ އިންސާނިއްޔަތަށްޓަކައި މެދުކެނޑުމެއްނެތި މަސައްކަތްކުރެވޭނެ މަގު ތަނަވަސްކޮށްދޭ ދާއިމީ ތަރިކައެކެވެ. މިއީ އަންނަން އޮތް ޖީލުތަކަށް ދިވެހި ރައްޔިތުންނަށް ޚިދުމަތްކުރުމަށް އެޅޭ ވަރުގަދަ ބިންގަލެއްކަމަށް އޭނާ ވިދާޅުވި އެވެ.
"ދަ ސްޓޭޓް ކްރެސެންޓް ޓަވަރ" މަޝްރޫއު އިފްތިތާހުކުރުން | ރެޑް ކްރެސެންޓް
މި ޓަވަރުގެ ސަބަބުން އެމްއާރްސީގެ އިދާރީ އަދި އޮޕަރޭޝަނަލް ހުރިހާ މަސައްކަތްތަކެއް އެއް ފުރާޅެއްގެ ދަށުން ވިލަރެސްކުރެވޭނެ އެވެ. ޖަމިއްޔާގެ އައު ހެޑްކުއާޓަރުގެ އިތުރުން، މުޖުތަމައުގެ ބައްދަލުވުންތަކަށް ހާއްސަ މާލަމަކާއި، ކެފޭ، ބިޒްނަސް ލައުންޖް، ޖިމް، ކިޑްސް ކްލަބް އަދި ކުއްޔަށް ދޫކުރާ އޮފީސް ޖާގަތައް މި އިމާރާތުގައި ހުންނާނެ އެވެ. މިއީ އެ ޖަމިއްޔާގެ ކުއްލި ހާލަތްތަކަށް ތައްޔާރުވުމާއި، ވޮލަންޓިއަރުންގެ ހަރަކާތްތައް ހިންގުމަށް ލިބޭ ވަރަށް ބޮޑު ކުރިއެރުމެއްކަމަށް އެމްއާރްސީގެ ސެކްރެޓަރީ ޖެނެރަލް އަހަމަދު ޝާބިން ވިދާޅުވި އެވެ.
މި މަޝްރޫއުގެ ފައިނޭންޝަލް އެޑްވައިޒަރ އަދި ޕްރޮޖެކްޓް މެނޭޖަރުގެ ދައުރު އަދާކުރަނީ ފަސްޓް ނޭޝަނަލް ފައިނޭންސް ކޯޕަރޭޝަނުންނެވެ. އެ ކުންފުނީގެ ސީއީއޯ ހަސަން ޒިޔަތު ވިދާޅުވި ގޮތުގައި، މި މަޝްރޫއު ފަރުމާކޮށްފައި ވަނީ ހަމައެކަނި މާލީ ފައިދާއަށް ބެލުމުގެ ބަދަލުގައި، މުޖުތަމައަށް ފައިދާހުރި "ބްލެންޑެޑް ފައިނޭންސް" މޮޑެލްއެއްގެ މައްޗަށެވެ. މި މަޝްރޫއުގެ ފުރަތަމަ ޕާޓްނަރެއްގެ ގޮތުން މޯލްޑިވްސް އިސްލާމިކް ބޭންކް (އެމްއައިބީ) ވަނީ މިހާރު ވެސް ބައިވެރިވެފަ އެވެ.
"ދަ ސްޓޭޓް ކްރެސެންޓް ޓަވަރ" މަޝްރޫއު އިފްތިތާހުކުރުން | ރެޑް ކްރެސެންޓް
މި މަޝްރޫއުގައި ބައިވެރިވުމަށް ހަތަރު ގޮތެއް އެމްއާރްސީން ވަނީ ހުޅުވާލާފަ އެވެ. އެއީ ޑޯނަރެއްގެ ގޮތުން އެހީވުމާއި، ވަކިވަކި ފްލޯތައް ލީސްކުރުމާއި، ފައިނޭންސް ކުރުމުގެ އިތުރުން މަޝްރޫއުގެ ވަކިވަކި ބައިތައް ސްޕޮންސަރ ކުރުމެވެ. އާންމު ފަރުދުންނަށް 1،000 ރުފިޔާގެ ޑޮނޭޝަނަކުން ވެސް މި މަޝްރޫއުގައި ބައިވެރިވެވޭއިރު، 500،000 ރުފިޔާއަށް ވުރެ ގިނައިން އެހީވާ ކޯޕަރޭޓް ފަރާތްތަކުގެ ނަން އިމާރާތުގެ ހާއްސަ "ރިކޮގްނިޝަން ވޯލް" ގައި ފާހަގަކުރެވޭނެ އެވެ.
މި ޓަވަރުން ލިބޭ އާމްދަނީ ބޭނުންކޮށްގެން ރާއްޖޭގެ އެކި ކަންކޮޅުތަކުގައި އެމްއާރްސީން ފޯރުކޮށްދޭ އިންސާނީ އެހީތެރިކަމުގެ މަސައްކަތްތައް ފުޅާކޮށް، މުޖުތަމައުތަކުގެ ވިލުންތެރިކަން އިތުރުކުރުމަށް ވަނީ ހަމަޖެހިފަ އެވެ. ކޮންމެ ވަގުތަކު، ކޮންމެ ތަނެއްގައި އެހީތެރިކަން ބޭނުންވި ނަމަވެސް އެކަން ފޯރުކޮށްދިނުމުގެ ގާބިލުކަން އެމްއާރްސީގައި ހުރިކަން ކަށަވަރުކޮށްދޭނެ މި މަޝްރޫއާ ބެހޭ އިތުރު މައުލޫމާތުތައް www.thecrescenttower.mv ވެބްސައިޓުން ލިބެން ހުންނާނެ އެވެ.
