ކޮޕާ އެމެރިކާާ ދެން އޮންނާނީ ކުރިން އޮތް ގޮތަށް ކޮންމެ ހަތަރު އަހަރަކުން އެއް އަހަރު

ދެކުނު އެމެރިކާގެ ޤައުމުތަކުގެ މެދުގައި ބާއްވާ އެންމެ ޝަރަފުވެރި ފުޓުބޯޅަ މުބާރާތް ކަމަށްވާ ކޮޕާ އެމެރިކާ، މީގެ ފަހުން ކޮންމެ ހަތަރު އަހަރަކުން އެއް އަހަރު ބޭއްވުމުގެ އުސޫލު އަލުން ދެމި އޮންނާނެ ކަމަށް ކޮންމެބޯލް އިން ކަށަވަރުކޮށްދީފި އެވެ.

މި ނިންމުމާއެކު، ދެން އެންމެ އަވަހަށް މި މުބާރާތް ބޭއްވުމަށް ހަމަޖެހިފައިވަނީ 2028 ވަނަ އަހަރު އެވެ. މިއީ އެންމެ ފަހުން އެމެރިކާގައި ބޭއްވި 2024 ވަނަ އަހަރުގެ މުބާރާތަށް ފަހު ހަތަރު އަހަރު ފުރޭ އަހަރެވެ. އެންމެ ފަހުން ބޭއްވި މުބާރާތުގެ ޗެމްޕިއަންކަން ހޯދާފައިވަނީ އާޖެންޓީނާ އެވެ.

ދުނިޔޭގައި މިހާރު ބާއްވަމުންދާ ބައްރުތަކުގެ މުބާރާތްތަކުގެ ތެރެއިން އެންމެ ދިގު ތާރީޚެއް އޮތް ކޮޕާ އެމެރިކާގެ 110 އަހަރުވީ ތާރީޚަށް ބަލާއިރު، މި މުބާރާތް ބާއްވާ ތާވަލަށް އެކި ދުވަސްވަރު ވަނީ ބޮޑެތި ބަދަލުތަކެއް އައިސްފައި އެވެ. ބައެއް ފަހަރު ކޮންމެ ހަތަރު އަހަރަކުން، ތިން އަހަރަކުން ނުވަތަ ދެ އަހަރަކުން އެއް ފަހަރު މުބާރާތް ބާއްވާފައިވާއިރު، ކޮންމެ އަހަރަކު އެއްފަހަރު ވެސް މުބާރާތް ބާއްވާފައިވެ އެވެ. އަދި ބައެއް ދުވަސްވަރު މުބާރާތް ނުބާއްވާ އަށް އަހަރުގެ ދިގު މެދުކެނޑުމެއް ވެސް އައިސްފައިވެ އެވެ.

މި މުބާރާތް ބާއްވާ ތާވަލަށް އެންމެ ފަހުން ބޮޑު ބަދަލެއް އައީ 2001 އާއި 2007 އާ ދެމެދުގައި އެވެ. އެ މުއްދަތުގައި ކޮންމެ ތިން އަހަރަކުން އެއް ފަހަރު މުބާރާތް ބޭއްވުމަށް ފަހު، ޔޫރަޕުގެ ޔޫރޯ ފުޓުބޯޅަ މުބާރާތާ އެއްގޮތަށް، ކޮންމެ ހަތަރު އަހަރަކުން އެއް ފަހަރު ބާއްވާ މުބާރާތަކަށް ކޮޕާ އެމެރިކާ ވަނީ ބަދަލުކޮށްފައި އެވެ. ނަމަވެސް މުބާރާތަށް 100 އަހަރު ފުރުން ފާހަގަ ކުރުމަށް 2016 ވަނަ އަހަރު ކޮންކާކަފްގެ ގައުމުތަކާ އެކު ޚާއްސަ މުބާރާތެއް ބޭއްވި އެވެ. މިއީ 2015 ވަނަ އަހަރުގެ މުބާރާތަށް ފަހު އެންމެ އަހަރެއްގެ ތެރޭގައި ބޭއްވި މުބާރާތެކެވެ.

މީގެ އިތުރުން 2019 ވަނަ އަހަރު މުބާރާތް ބޭއްވުމަށް ފަހު، ޔޫރޯ މުބާރާތާ އެއް ތާރީޚުތަކެއްގައި މުބާރާތް ބޭއްވުމުގެ ބޭނުމުގައި 2020 ވަނަ އަހަރު މުބާރާތް ބޭއްވުމަށް ނިންމި އެވެ. އެހެން ނަމަވެސް، ކޮވިޑް-19 ގެ ބަލިމަޑުކަމާ ގުޅިގެން އެ މުބާރާތް ފަސްކުރަން ޖެހުމުން، އެ މުބާރާތް ބޭއްވުނީ 2021 ވަނަ އަހަރު އެވެ. މި ހުރިހާ ބަދަލުތަކަކަށް ފަހު، 2024 ވަނަ އަހަރު މުބާރާތް ބާއްވާފައިވާއިރު، ދެން އޮންނަ މުބާރާތްތައް ކުރިއަށް ދާނީ ހަތަރު އަހަރުން އެއް ފަހަރު އެވެ. 

މިހާރު ހަމަޖެހިފައިވާ ގޮތުން 2028 ވަނަ އަހަރުގެ މުބާރާތް ބާއްވާނެ ޤައުމެއް ރަސްމީކޮށް އިއުލާާން ކޮށްފައި ނުވެ އެވެ. ނަމަވެސް ބައެއް ރިޕޯޓުތައް ބުނާ ގޮތުގައި މި މުބާރާތް އަނެއްކާ ވެސް އެމެރިކާގައި ބޭއްވުމުގެ ފުރުސަތު ބޮޑެވެ. އަދި މި މުބާރާތުގައި ވާދަކުރުމަށް މެކްސިކޯ އަށް ދައުވަތު ދިނުމަށް މަޝްވަރާ ކުރެވެމުންދާ ކަމަށް ވެސް މީޑިއާ ރިޕޯޓުތައް ބުނެ އެވެ.