ގާނޫނު ތަންފީޒުކުރާ އިދާރާތަކުގެ މަސައްކަތްތަކަށް ހުރަސްނޭޅުމަށް އެންއައިސީ އިން އިލްތިމާސްކޮށްފި
5 އޯގަސްޓު 2026 | ބުދަ 13:10ގާނޫނު ތަންފީޒުކުރާ އިދާރާތަކުގެ މަސައްކަތްތަކަށް ހުރަސްނޭޅުމަށާއި، އެ މުވައްޒަފުންނާމެދު ޝައްކު އުފެދޭ ގޮތަށް މީސްމީޑިއާގައި ވާހަކަ ނުދެއްކުމަށް ނޭޝަނަލް އިންޓެގްރިޓީ ކޮމިޝަނުން ވަނީ އިލްތިމާސްކޮށްފައި. މުވައްޒަފަކު ގާނޫނާ ހިލާފު އަމަލެއް ހިންގާ ކަމަށް ތުހުމަތުކުރެވޭނަމަ އެކަން ކޮމިޝަނަށް ހުށަހެޅުމަށް އެދިފައިވާއިރު، މިފަހަކަށް އައިސް ތަންފީޒީ އިދާރާތަކުގެ މުވައްޒަފުންނަށް އަމާޒުކޮށް ސޯޝަލް މީޑިއާގައި ފުރައްސާރަކުރުން ވަނީ އިތުރުވެފައި
ނޭޝަނަލް އިންޓެގްރިޓީ ކޮމިޝަނުން ފެމިލީ ޕްރޮޓެކްޝަން އޮތޯރިޓީއާ އެކު ބައްދަލުވުމެއްގެ ތެރެއިން | އެންއައިސީ
ގާނޫނު ތަންފީޒުކުރާ އިދާރާތަކުން އެ އިދާރާތަކުގެ ގާނޫނީ މަސްއޫލިއްޔަތާއި ޒިންމާ އަދާކުރުމަށް ކުރާ މަސައްކަތްތަކާމެދު، ރައްޔިތުންގެ މެދުގައި ޝައްކު އުފައްދައި ނުރަނގަޅު ތަސައްވުރެއް އުފެދޭގޮތަށް މީސްމީޑިއާގައި ވާހަކަދެއްކުމަކީ ކަންބޮޑުވާ ކަމެއް ކަމަށް ނޭޝަނަލް އިންޓެގްރިޓީ ކޮމިޝަން (އެންއައިސީ) އިން ބުނެފި އެވެ.
ބުދަ ދުވަހު އެ ކޮމިޝަނުން ނެރުނު ބަޔާނުގައި ބުނީ، ގާނޫނު ތަންފީޒުކުރާ އިދާރާތަކުން ކުރަމުންދާ މަސައްކަތްތަކަކީ ގައުމުގެ ސަލާމަތާއި ރައްޔިތުންގެ ރައްކާތެރިކަމަށް ކުރަމުންގެންދާ ނުހަނު އަގުހުރި މަސައްކަތްތަކެއް ކަމަށެވެ.
އެހެންކަމުން، އެ އިދާރާތަކުން ކުރަމުން ގެންދާ މަސައްކަތްތަކަށް ހުރަސްއެޅޭނެ ފަދަ ކަންކަން ނުކުރުމަށާއި، ގާނޫނުތައް ތަންފީޒުކުރުމަށް އެ އިދާރާތަކަށް ރައްޔިތުންގެ އެހީތެރިކަމާއި އެއްބާރުލުން ދިނުމަށް އެންއައިސީން ވަނީ އިލްތިމާސްކޮށްފަ އެވެ.
މީގެ އިތުރުން ގާނޫނު ތަންފީޒުކުރާ އިދާރާތަކާއި އެ އިދާރާތަކުގެ މުވައްޒަފުން ގާނޫނާއި ގަވާއިދާއި ކަނޑައެޅިފައިވާ އުސޫލުތަކާ ޚިލާފު އަމަލެއް ހިންގާ ކަމަށް ތުހުމަތު ކުރެވޭ ހާލަތުގައި، އެ ޝަކުވާ ނުވަތަ މައްސަލައެއް ބަލައިދިނުމަށް އެދި ކޮމިޝަނަށް ހުށަހެޅުމުގެ ފުރުސަތު ކޮންމެ ފަރާތަކަށް ވެސް ލިބިގެންވާކަން އެންއައިސީން ފާހަގަކޮށްފައިވެ އެވެ.
އެގޮތުން ހުށަހެޅޭ މައްސަލަތައް ތަހުގީގު ކުރުމަކީ ގާނޫނު ނަންބަރު 27/2015 (ނޭޝަނަލް އިންޓެގްރިޓީ ކޮމިޝަނުގެ ގާނޫނު) ގެ ދަށުން އެ ކޮމިޝަނުގެ މަސްއޫލިއްޔަތެއް ކަމަށް ވެސް ބުނެފައިވެ އެވެ.
އެންއައިސީން ބުނީ، އެއްވެސް މުވައްޒަފަކު ގާނޫނާ ޚިލާފު އަމަލެއް ކުރާ ކަމަށް ތުހުމަތު ކުރެވޭނަމަ، އެ ޝަކުވާ ގާނޫނުގައި ކަނޑައަޅާފައިވާ ގޮތުގެ މަތިން ކޮމިޝަނަށް ހުށަހެޅުމަށް އެދޭ ކަމަށެވެ. ހަމައެއާއެކު، ތަންފީޒީ އިދާރާތަކުގެ މުވައްޒަފުންގެ މަސްއޫލިއްޔަތުތަކާއި ޒިންމާތައް ގާނޫނީ އިމުގެ ތެރެއިން އަދާކުރުންމަތީ ދެމިތިބުމަށް ވެސް އެ ކޮމިޝަނުން ވަނީ ހަނދާން ކޮށްދީފަ އެވެ.
އެންއައިސީން މިފަދަ ބަޔާނެއް ނެރުނިއިރު، މިފަހުން ކަސްޓަމްސްގެ އަންހެން މުވައްޒަފެއްގެ ފޮޓޯ ސޯޝަލް މީޑިއާގައި އާއްމުކޮށް، ބޮޑެތި ތުހުމަތުތަކެއް ކޮށްފައިވެ އެވެ. އަދި މާލޭ ސިޓީ ކައުންސިލްގެ އަންހެން މުވައްޒަފަކު މަސައްކަތުގައި އުޅެނިކޮށް ހަޑިހުތުރުބަހުން މުހާތަބުކޮށް ފުރައްސާރަކުރާ ވީޑިއޯއެއް ވެސް އާއްމުކޮށްފައިވެ އެވެ. އަދި މި މައްސަލަތަކާ ގުޅިގެން މިކަން ތަހުގީގު ކޮށްދިނުމަށް އެދި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ)، ކޮމިޝަނަރ އޮފް ޕޮލިސް އަހުމަދު މުހައްމަދަށް ސިޓީއެއް ވެސް 3 އޯގަސްޓް 2026 ގައި ފޮނުއްވާފައިވެ އެވެ.
